ທ່ານນາຍົກລັດຖະມົນຕີ ຫງວຽນເຕີນຢຸງ ຕ້ອນຮັບລັດຖະມົນຕີກະຊວງການຄ້າ - ອຸດສາຫະກຳອິນເດຍ
( ພາບ: cpv.org.vn )
|
( vovworld ) - ຕອນເຊົ້າວັນທີ 8/3, ຢູ່ສຳນັກງານລັດຖະບານຫວຽດນາມທີ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໃຫ້ການຕ້ອນຮັບທ່ານລັດຖະມົນຕີກະຊວງການຄ້າ - ອຸດສາຫະກຳ ແລະ ຕໍ່າແຜ່ນອີນເດຍ Anand Sharma ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ ຫງວຽນເຕີນຢຸງ ຖືວ່າການຢ້ຽມຢາມ ແລະ ເຮັດວຽກຢູ່ຫວຽດນາມ ຂອງທ່ານລັດຖະມົນຕີ Anand Sharma ຄັ້ງນີ້ໄດ້ປະກອບສ່ວນຢ່າງແທດຈິງ, ຊຸກຍູ້ການພົວພັນຮ່ວມມືລະຫວ່າງຫວຽດນາມ - ອິນເດຍ ບົນພື້ນຖານຄວາມສາມາດບົ່ມຊ້ອນການຮ່ວມມືລະຫວ່າງສອງປະເທດຍັງໃຫຍ່ຫຼວງຢູ່. ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ ຫວຽດນາມ ຈະມານະພະຍາຍາມຈົນສຸດຄວາມສາມາດຂອງຕົນເພື່ອພ້ອມກັບອີນເດຍ ສືບຕໍ່ນຳສາຍພົວພັນມິດຕະພາບທີ່ເປັນມູນເຊື້ອ, ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດທີ່ນັບມື້ນັບໄດ້ຮັບການພັດທະນາຢ່າງເລິກເຊິ່ງ ແລະ ກວ້າງຂວາງ, ນຳມາເຊິ່ງຜົນປະໂຫຍດອັນແທ້ຈິງໃຫ້ແກ່ສອງຝ່າຍ. ທ່ານນາຍົກລັດຖະມົນຕີ ຫງວຽນເຕີນຢຸງ ປາດຖະໜາວ່າ ອິນເດຍຈະສ້າງເງື່ອນໄຂສະດວກເພື່ອໃຫ້ສິນຄ້າຫວຽດນາມ ແຊກຊຶມເຂົ້າຕະຫຼາດອິນເດຍ, ສ້າງຄວາມດູນດຽງດ້ານການຄ້າລະຫວ່າງຫວຽດນາມ - ອິນເດຍ ເທື່ອລະກ້າວ, ພ້ອມກັນນັ້ນທ່ານກໍຢືນຢັນວ່າ ຍາມໃດຫວຽດນາມ ກໍ່ສະໜັບສະໜູນບັນດາໂຄງການລົງທຶນຂອງອິນເດຍເຂົ້າຫວຽດນາມ ໂດຍສະເພາະແມ່ນບັນດາໂຄງການລົງທຶນໃຫຍ່.
ທ່ານນາຍົກລັດຖະມົນຕີ ຫງວຽນເຕີນຢຸງ ຍັງປາດຖະໜາວ່າ ສອງຝ່າຍຈະສົມທົບກັນຢ່າງແໜ້ນແຟ້ນໃນການຈັດຕັ້ງບັນດາເຫດການເຄື່ອນໄຫວສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນດ້ານການທູດລະຫວ່າງຫວຽດນາມ - ອິນເດຍ ແລະ 5 ປີ ແຫ່ງວັນສ້າງຕັ້ງສາຍພົວພັນຄູ່ຮ່ວມມືຍຸດທະສາດລະຫວ່າງສອງປະເທດຢ່າງເລິກເຊິ່ງ, ກວ້າງຂວາງ, ແທດຈິງ.
ສ່ວນທ່ານລັດຖະມົນຕີ Anand Sharma ກໍສະເໜີໃຫ້ສອງຝ່າຍສ້າງຕັ້ງຄະນະຂັ້ນກຳມະການກົມເພື່ອແກ້ໄຂບັນດາສິ່ງຄ້າງຄາໃນວິວັດການຮ່ວມມືລະຫວ່າງສອງປະເທດ, ໂດຍສະເພາະແມ່ນໃນຂົງເຂດພະລັງງານ, ເຕັກໂນໂລຊີ, ການຢາ... ທ່ານລັດຖະມົນຕີ Anand Sharma ໄດ້ສະແດງຄວາມປາດຖະໜາຢາກເພີ່ມທະວີກັບຫວຽດນາມ ໃນຂົງເຂດດັ່ງກ່າວກວ່າອີກ.