(vovworld) -ຕອນບ່າຍວັນທີ 08/05, ຢູ່ສຳນັກງານລັດຖະບານ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໃຫ້ການຕ້ອນຮັບທ່ານເອກອັກຄະລັດຖະທູດ ຕີມໍຕາເວັນອອກ Jorge Trindade Neves de Camoes ເຂົ້າຢ້ຽມຂໍ່ານັບຕາມພິທີການທູດເນື່ອງໃນໂອກາດມາຮັບໜ້າທີ່ການທູດຢູ່ຫວຽດນາມ. ທີ່ການຕ້ອນຮັບ, ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ ຍາມໃດຫວຽດນາມ ກໍຖືເປັນສຳຄັນການຊຸກຍູ້ການພົວພັນຮ່ວມມືຫຼາຍດ້ານກັບ ຕີມໍຕາເວັນອອກ, ໂດຍສະເພາະແມ່ນຊຸກຍູ້ການພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ ເພື່ອຜົນປະໂຫຍດອັນແທ້ຈິງ ແລະ ເພື່ອການພັດທະນາລວມຂອງ 2 ປະເທດ. ທ່ານນາຍົກລັດຖະມົນຕີຫວັງວ່າ ຕີມໍຕາເວັນອອກ ຈະສ້າງເງື່ອນໄຂສະດວກເພື່ອໃຫ້ວິສາຫະກິດຂອງ 2 ປະເທດ ເພີ່ມທະວີການຮ່ວມມືດ້ານເສດຖະກິດ, ແລກປ່ຽນການຄ້າ ກໍຄືສະໜັບສະໜູນບັນດາວິສາຫະກິດຂອງຫວຽດນາມ ມາຮ່ວມມືລົງທຶນຢູ່ ຕີມໍຕາເວັນອອກ. ທ່ານນາຍົກລັດຖະມົນຕີຢືນຢັນວ່າ ບົນຫຼັກການຂອງຕະຫຼາດ, ຫວຽດນາມ ພ້ອມແລ້ວທີ່ຈະຊຸກຍູ້ການເຄື່ອນໄຫວສົ່ງອອກເຂົ້າສານໄປຍັງ ຕີມໍຕາເວັນອອກ ເພື່ອແນໃສ່ປະກອບສ່ວນຮັປະກັນດ້ານສະບຽງອາຫານໃຫ້ແກ່ ຕີມໍຕາເວັນອອກ.
ສ່ວນທ່ານເອກອັກຄະລັດຖະທູດ ຕີມໍຕາເວັນອອກ ຢືນຢັນວ່າ ຈະມານະພະຍາຍາມເຮັດຈົນສຸດຄວາມສາມາດຂອງຕົນເພື່ອຊຸກຍູ້ການພົວພັນ 2 ຝ່າຍ ໃນທຸກຂົງເຂດ, ພິເສດແມ່ນໃນຂົງເຂດກະສະກຳ; ປາດຖະໜາວ່າ ຫວຽດນາມ ຈະແບ່ງປັນບົດຮຽນ, ເພີ່ມທະວີການຮ່ວມມືກັບ ຕີມໍຕາເວັນອອກ ໃນການກໍ່ສ້າງພື້ນຖານໂຄງລ່າງ, ຄົມມະນາຄົມ, ພັດທະນາກະສິກຳ.