(vovworld) - ຕອນຄໍ່າວັນທີ 15/05, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ໄປຮອດນະຄອນຫຼວງ Minsk, ເລີ່ມຕົ້ນການຢ້ຽມຢາມເບລາຣຸດ ຢ່າງເປັນທາງການໃນລະຫວ່າງວັນທີ 15 – 17/05, ຕາມຄຳເຊີນຂອງທ່ານນາຍົກລັດຖະມົນຕີ ເບລາຣຸດ Mikhail Myiasnikovich. ການຢ້ຽມຢາມ ເບລາຣຸດ ຢ່າງເປັນທາງການຄັ້ງນີ້ຂອງທ່ານນາຍົກລັດຖະມົນຕີ ຫງວຽນເຕີນຢຸງ ເພື່ອແຍໃສ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອກັບ ເບລາຣຸດ, ສ້າງພື້ນຖານປັບປຸງ ແລະ ຊຸກຍູ້ການຮ່ວມມື 2 ຝ່າຍໃນທຸກຂົງເຂດ, ໂດຍສະເພາະແມ່ນຫັນໂຄງການຮ່ວມມືເສດຖະກິດຫວຽດນາມ - ເບລາຣຸດ ໄລຍະ 2013 – 2015 ເປັນລະອຽດ, ເຊິ່ງແມ່ນໜຶ່ງໃນບັນດາຄາດໝາຍນຳວົງເງິນການຄ້າ 2 ສົ້ນໃຫ້ຂຶ້ນເຖິງລະດັບ 1 ຕື້ USD ແລະ ຊຸກຍູ້ວິວັດການເຈລະຈາສັນຍາການຄ້າເສລີ (FTA) ລະຫວ່າງຫວຽດນາມ - ພັນທະມິດພາສີ ລັດເຊຍ - ເບລາຣຸດ ແລະ ກາຊັກສຖານ.
ກ່ອນໜ້ານັ້ນ, ຕອນບ່າຍວັນທີ 15/05, ທີ່ການພົບປະເຈລະຈາກັບທ່ານປະທານາທິບໍດີສະຫະພັນລັດເຊີຍ Vladimir Putin, ທ່ານນາຍົກລັດຖະມົນຕີຫງວຽນເຕີນຢຸງ ຢືນຢັນວ່າ; ລັດເຊຍ ແມ່ນຄູ່ຮ່ວມມືທີ່ສຳຄັນຂອງຫວຽດນາມ ແລະ ຫວຽດນາມ ຈະສືບຕໍ່ມານະພະຍາຍາມພ້ອມກັບຝ່າຍລັດເຊຍ ບົນພື້ນຖານການພົວພັນດ້ານການເມືອງ, ຄວາມໄວ້ເນື້ອເຊື່ອໃຈແນໃສ່ເພີ່ມທະວີເປີດກວ້າງການຮ່ວມມືຢ່າງຮອບດ້ານ,. ທ່ານນາຍົກລັດຖະມົນຕີຫງວຽນເຕີນຢຸງ ເວົ້າວ່າ.
“ຫວຽດນາມ ຕີລາຄາສູງທິດສະດີການຕ່າງປະເທດຂອງສະຫະພັນລັດເຊຍ ເຊິ່ງທ່ານປະທານາທິບໍດີໄດ້ເຊັ່ນອະນຸມັດເມື່ອເດືອນ 2 ປີ 2013. ໃນນັ້ນສືບຕໍ່ຢືນຢັນວ່າ ຫວຽດນາມ ແມ່ນຄູ່ຮ່ວມມືສຳຄັນຂອງສະຫະພັນລັດເຊຍ ແລະ ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານກັບຫວຽດນາມ ຢ່າງບໍ່ຢຸດຢັ້ງ”.
ສ່ວນທ່ານປະທານາທິບໍດີລັດເຊຍ Vladimir Putin ຢືນຢັນວ່າ ການຮ່ວມມືໃນຂົງເຂດພະລັງງານ ແມ່ນໜຶ່ງໃນບັນດາທິດທາງຮ່ວມມືໃຫ້ບຸລິມະສິດອັນດັບໜຶ່ງລະຫວ່າງ 2 ປະເທດ. ລັດເຊຍ ຈະສືບຕໍ່ເຂົ້າຮ່ວມການຂຸດຄົ້ນນ້ຳມັນອາຍແກັດຢູ່ໄຫຼ່ທະວີບຂອງຫວຽດນາມ ຢ່າງຕັ້ງໜ້າ ກໍຄືສົ່ງເສີມບັນດາບໍລິສັດຮ່ວມທຸລະກິດລະຫວ່າງ 2 ປະເທດເປີດກວ້າງການຮ່ວມມືຢູ່ລັດເຊຍ. ທ່ານປະທານາທິບໍດີ Vladimir Putin ເນັ້ນໜັກວ່າ.
“ການພົວພັນລະຫວ່າງ 2 ປະເທດພວກເຮົາລວມທັງການພົວພັນຮ່ວມກ່ຽວກັບຂົງເຂດພະລັງງານ, ນ້ຳມັນອາຍແກັດ, ພະລັງງານປະລະມານູ, ຜະລິດກົນຈັກ ແລະ ເຕັກນິກການທະຫານ. ຂ້າພະເຈົ້າຫວັງວ່າ, ບັນດາບໍລິສັດຮ່ວມທຸລະກິດລະຫວ່າງ 2 ປະເທດຂອງພວກເຮົາ ຈະສືບຕໍ່ພັດທະນາບັນດາກົນໄກຮ່ວມມືລະຫວ່າງ 2 ປະເທດສຳເລັດຜົນ”.
2 ຝ່າຍກໍຈະຮ່ວມມືຢ່າງແໜ້ນແຟ້ນ, ຜັນຂະຫຍາຍໂຄງການກໍ່ສ້າງໂຮງງານໄຟຟ້ານິວເຄຼຍ ນິງທ້ວນ 1 ໃຫ້ຖືກກັບຄວາມຄືບໜ້າ ບົນພື້ນຖານເຕັກໂນໂລຊີທັນສະໄໝທີ່ສຸດ, ຮັບປະກັນຄວາມປອດໄພ, ມີຄຸນນະພາບ ແລະ ບັນລຸປະສິດທິຜົນສຸງສຸດ. ທ່ານນາຍົກລັດຖະມົນຕີຫວຽດນາມ ແລະ ທ່ານປະທານາທິບໍດີລັດເຊຍ ໄດ້ຕີລາຄາສູງການພົວພັນຮ່ວມມືໃນຂົງເຂດເຕັກນິກການທະຫານ ແລະ ບາງຂົງເຂດຮ່ວມມືອື່ນໆອີກ.
ສິ້ນສຸດການຢ້ຽມຢາມ, 2 ປະເທດໄດ້ອອກຖະແຫຼງການຮ່ວມຫວຽດນາມ - ສະຫະພັນລັດເຊຍ ໂດຍເຫັນດີເປັນເອກະພາບວ່າ ການຢ້ຽມຢາມສະຫະພັນລັດເຊຍ ຢ່າງເປັນທາງການຂອງທ່ານນາຍົກລັດຖະມົນຕີຫງວຽນເຕີນຢຸງ ຄັ້ງນີ້ໄດ້ປະກອບສ່ວນສຳຄັນເຂົ້າໃນການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ ແລະ ສະຫະພັນລັດເຊຍ.