ຕອນເຊົ້າວັນທີ 21/12, ຢູ່ສຳນັກງານປະທານາທິບໍດີ ມ້ຽນມາ ທີ່ນະຄອນຫລວງ Naypydaw, ທ່ານປະທານາທິບໍດີ Thein Sein ແລະ ພັນລະຍາ ໄດ້ເປັນປະທານພິທີຕ້ອນຮັບທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ ແລະ ພັນລະຍາມາຢ້ຽມຢາມມ້ຽນມາເປັນທາງການຢ່າງສົມກຽດ. ພາຍຫຼັງພິທີຮັບ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການເຈລະຈາ ກັນ ທ່ານປະທານາທິບໍດີ Thein Sein. 2 ຝ່າຍໄດ້ແລກປ່ຽນກ່ຽວກັບການກຳນົດທິດ ແລະ ເຫັນດີເປັນເອກະສັນນຳກັນຫຼາຍມາດຕະການຢ່າງເລິກເຊິ່ງ ແລະ ກ້ວາງຂວາງ ເພື່ອແນໃສ່ຮັດແໜ້ນການພົວພັນຮ່ວມມືອັນເປັນມູນເຊື້ອ ແລະ ຊຸກຍູ້ການຮ່ວມມືຫວຽດນາມ - ມ້ຽນມາ. ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານປະທານາທິບໍດີ Thein Sein ໄດ້ເຫັນດີສືບຕໍ່ສະຫງວນບຸລິມະສິດໃຫ້ແກ່ 12 ຂົງເຂດທີ່ໄດ້ລະບຸໄວ້ໃນ
ຖະແຫຼງການຮ່ວມລະຫວ່າງ 2 ປະເທດເມື່ອເດືອນ ເມສາ 2010, ສຸ້ຊົນນຳວົງເງິນການຄ້າ 2 ປະເທດ ຂຶ້ນເປັນ 500 ລ້ານ USD ໃນປີ 2015. ທ່ານນາຍົກລັດຖະມົນຕີ ຫງວຽນເຕີນຢູງເວົ້າວ່າ:
“ຂ້າພະເຈົ້າຂໍຂອບອົກຂອບໃຈຕໍ່ການຕ້ອນຮັບອັນອົບອຸ່ນ, ສົມກຽດ ເຊິ່ງທ່ານປະທານາທິບໍດີ, ລັດຖະບານ ແລະ ປະຊາຊົນ ມ້ຽນມາໄດ້ສະຫງວນໃຫ້ແກ່ຂ້າພະເຈົ້າ ແລະ ຄະນະຜູ້ແທນຫວຽດນາມ. ຂ້າພະເຈົ້າຖືວ່າ: ການຢ້ຽມຢາມນີ້ ແມ່ນໂອກາດທີ່ດີ ເພື່ອໃຫ້ພວກເຮົາຕີລາຄາສະພາບການຮ່ວມມື, ແລກປ່ຽນບັນດາທິດທາງ ແລະ ມາດຕະການ, ພິເສດແມ່ນໃນ 12 ຂົງເຂດທີ່ໄດ້ຮັບບຸລິມະສິດ ເພື່ອແນໃສ່ນຳການພົວພັນຮ່ວມມືລະຫວ່າງ 2 ປະເທດພັດທະນາຢ່າງແຂງແຮງກ່ວາອີກ”
ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານປະທານາທິບໍດີ Thein Sein ກໍ່ໄດ້ແລກປ່ຽນຄວາມເຫັນກ່ຽວກັບບັນດາບັນຫາຢູ່ພາກພື້ນ ແລະ ຢູ່ໃນໂລກທີ່ຕ່າງຝ່າຍຕ່າງມີຄວາມສົນໃຈ. 2 ຝ່າຍຢືນຢັນຈະປະກອບສ່ວນຢ່າງຕັ້ງໜ້າໃຫ້ແກ່ຄວາມມານະພະຍາຍາມລວມຂອງອາຊຽນ ໃນການປະຕິບັດຈຸດໝາຍສ້າງ ປະຊາຄົມອາຊຽນສາມັກຄີ, ໝັ້ນຄົງເຂັ້ມແຂງໃນປີ 2015 ໃຫ້ສຳເລັດຜົນ. 2 ຝ່າຍເຫັນດີຈະສົມທົບກັນ ແລະ ຮ່ວມມືກັບບັນດາປະເທດທີ່ກ່ຽວຂ້ອງໃນການນຳໃຊ້ແຫຼ່ງນ້ຳແມ່ນ້ຳຂອງຢ່າງໝັ້ນຄົງ, ສະໜັບສະໜູນເລື່ອງປະຕິບັດຖະແຫຼງການກ່ຽວກັບການປະພຶດຕໍ່ຂອງຝ່າຍຕ່າງໆຢູ່ທະເລຕາເວັນອອກ (ຫຼື DOC) ຢ່າງເຂັ້ມງວດ ແລະ ຄົບຖ້ວນ, ພ້ອມກັນນັ້ນກໍສູ້ຊົນກັບບັນດາປະເທດອາຊຽນ ແລະ ຈີນ ສ້າງລະບຽບການກ່ຽວກັບການປະພຶດຕໍ່ຢູ່ທະເລຕາເວັນອອກ (ຫຼື COC) ເພື່ອສັນຕິພາບ, ສະຖຽນລະພາບ, ຄວາມສະຫງົບ ແລະ ຮັບປະກັນຄວາມປອດໄພໃນການເດີນທະເລຢູ່ພາກພື້ນ.
ພາຍຫຼັງການເຈລະຈາ, ທ່ານນາຍົກລັດຖະມົນຕີ ຫງວຽນເຕີນຢູງ ແລະ ທ່ານປະທານາທິບໍດີ Thein Sein ໄດ້ເປັນສັກຂີພິຍານພິທີລົງນາມໃນບົດບັນທຶກຊ່ວຍຈຳກ່ຽວກັບການ ຮ່ວມມືໃນຂົງເຂດ ກະສິກຳ ແລະ ພັດທະນາຊົນນະບົດລະຫວ່າງ ກະຊວງກະສິກຳ 2 ປະເທດ, ບົດບັນທຶກກ່ຽວກັບການຊ່ວຍເຫຼືອລ້າດ້ານເຕັກນິກທີ່ມີມູນຄ່າ 2 ແສນ 5 ໝື່ນ USDຂອງທະນາຄານລົງທຶນພັດທະນາຫວຽດນາມ BIDV ໃຫ້ແກ່ກະຊວງກະສິກຳ ແລະ ຊົນລະປະທານມ້ຽນມາ.
ຕອນບ່າຍວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢູງ ແລະ ພັນລະຍາ ພ້ອມ ກັບຄະນະຜູ້ແທນລັດຖະບານຫວຽດນາມໄດ້ອອກຈາກນະຄອນຫລວງ Naypydaw ກັບເມືອຮ່າໂນ້ຍ, ສິ້ນສຸດການເຂົ້າຮ່ວມກອງປະຊຸມສຸດຍອດບັນດາປະເທດ ອະນຸພາກພື້ນແມ່ນ້ຳຂອງເປີດກ້ວາງຄັ້ງທີ່ 4 ແລະ ການຢ້ຽມຢາມມ້ຽນມາຢ່າງເປັນທາງການ.