(vovworld) - ໂດຍສືບຕໍ່ການເຂົ້າຮ່ວມບັນດາກອງປະຊຸມສຸດຍອດຢູ່ນະຄອນຫຼວງວຽງຈັນ, ຕອນເຊົ້າວັນທີ 13/03, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ພ້ອມກັບນາຍົກລັດຖະມົນຕີບັນດາປະເທດ ກຳປູເຈຍ, ໄທ, ຮອງປະທານາທິບໍດີມຽນມາ ແລະ ເລຂາທິການໃຫຍ່ອາຊຽນ ເຂົ້າຮ່ວມກອງປະຊຸມສຸດຍອດຍຸດທະສາດການຮ່ວມມືເສດຖະກິດ Ayeyawadi – Chao Phraya – Mekong ຄັ້ງທີ 5 (ACMECS 5). ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຖືວ່າ: ຄຽງຂ້າງບັນດາຜົນງານທີ່ຕັ້ງໜ້າ ຄວາມຈິ່ງແລ້ວຍັງມີບັນດາໂຄງການຮ່ວມມື ACMECS ບໍ່ສາມາດປະຕິບັດໄດ້ ຫຼື ຜັນຂະຫຍາຍຢ່າງຊັກຊ້າດ້ວຍປະສິດທິຜົນບໍ່ສູງ. ທ່ານນາຍົກລັຖະມົນຕີ ຫງວຽນເຕີນຢຸງ ເນັ້ນໜັກວ່າ.
“ເພື່ອໃຫ້ ACMECS ເສີມຂະຫຍາຍໄດ້ຄວາມສາມາດບົ່ມຊ້ອນຂອງຕົນຢ່າງແທ້ຈິງ ແລະ ສວມບົດບາດສຳຄັນໃນວິວັດການເຊື່ອມໂຍງເຂົ້າກັບພາກພື້ນ ກໍຄືການພັດທະນາຂອງແຕ່ລະປະເທດ, ຂ້າພະເຈົ້າຖືວ່າ ການຮ່ວມມື ACMECS ໃນໄລຍະຈະມາເຖິງ ຕ້ອງມຸ່ງໄປເຖິງ 3 ຈຸດໝາຍຕົ້ນຕໍ່ນັ້ນແມ່ນ: ທີໜຶ່ງແມ່ນເພີ່ມລັກສະນະແກ່ງແຍ້ງຂອງບັນດາປະເທດສະມາຊິກ ບົນພື້ນຖານເຊື່ອມຕໍ່ຕະຫຼາດ, ສ້າງລະບົບສະໜອງສິນຄ້າ ແລະ ຜະລິດຕະພັນໃນພາກພື້ນ ແລະ ຍົກສູງຄຸນນະພາບແຫຼ່ງຊັບພະຍາກອນມະນຸດ. ທີ 2 ແມ່ນ ໜູນຊ່ວຍວິວັດທະນາການສ້າງປະຊາຄົມເສດຖະກິດອາຊຽນໃນປີ 2015. ທີ 3 ແມ່ນ, ຕ້ອງຮັບປະກັນການພັດທະນາແບບຍືນຍົງຂອງພາກພື້ນ”.
ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຖືວ່າ ບັນດາໂຄງການຮ່ວມມື ACMECS ຄວນສຸມໃສ່ເຂົ້າໃນບາງບັນຫາຕົ້ນຕໍ່ທີ່ກຽວຂ້ອງເຖິງການຍູ້ແຮງການຮ່ວມມືດ້ານການຄ້າ, ການລົງທຶນ ແລະ ທ່ອງທ່ຽວ; ເພີ່ມທະວີການເຊື່ອມຕໍ່ລະຫວ່າງພາກພື້ນຫຼາຍກວ່າອີກ ດ້ວຍຈຸດສຸມແມ່ນພັດທະນາບັນດາແລວເສດຖະກິດ ແລະ ບັນດາເສັ້ນທາງຄົມມະນາຄົມລະຫວ່າງຊາດ, ຕິດພັນກັບການເພີ່ມທະວີການຂົງສົ່ງດ້ວຍຍານພາຫະນະຫຼາຍປະເພດ ທີ່ເຊື່ອມຕໍ່ບັນດາເສັ້ນທາງຄົມມະນາຄົມ.
ຕີລາຄາສູງບັນດາຂໍ້ສະເໜີຂອງຫວຽດນາມ ກ່ຽວກັບບັນດາການເຄື່ອນໄຫວໃນອະນາຄົດຂອງ ACMECS, ບັນດາການນຳທີ່ເຂົ້າຮ່ວມກອງປະຊຸມໄດ້ຮັບຮອງເອົາຖະແຫຼງການວຽງຈັນ ແລະ ໂຄງການເຄື່ອນໄຫວ ACMECS ໄລຍະ 2013 – 2015 ແລະ ປະຕິບັດແຜນສັງລວມກ່ຽວກັບການເຊື່ອມຕໍ່ອາຊຽນ.
ແລະກໍໃນຕອນເຊົ້າວັນດຽວກັນ, ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງໄດ້ມີການພົບປະ 2 ຝ່າຍກັບທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ ແລະ ທ່ານຮອງປະທານາທິບໍດີມຽນມາ Sai Mauk Kham.
ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ທ່ານນາງນາຍົກລັດຖະມົນຕີໄທ ຍິງຣັກ ຊິນນະວັດ ໄດ້ເຫັນດີເປັນເອກະພາບນຳກັນຊີ້ນຳກະຊວງການຕ່າງປະເທດ 2 ປະເທດ ກໍສ້າງທິດທາງສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ໄທ ແລະ ຊຸກຍູ້ກົນໄກປະຊຸມຄະນະກຳມະການປະສົມ 2 ຝ່າຍ ໃນປີ 2013 ນີ້. ນາຍົດລັດຖະມົນຕີ 2 ທ່ານ ກໍເຫັນດີກ່ຽວກັບຄວາມຈຳເປັນຕ້ອງຮັກສາສິ່ງແວດລ້ອມ ແລະ ຮັບປະກັນແຫຼ່ງນ້ຳແມ່ນ້ຳຂອງ, ກໍຄືເຫັນດີກ່ຽວກັບການສົມທົບກັນ ແລະ ສະໜັບສະໜູນຫຼັກໝັ້ນລວມຂອງອາຊຽນ ຄືດັ່ງທີ່ໄດ້ຍົກອອກໃນຖະແຫຼ່ງການ 6 ຂໍ້ກ່ຽວກັບບັນຫາທະເລຕາເວັນອອກ.
ໃນການຕ້ອນຮັບທ່ານຮອງປະທານາທິບໍດີມຽນມາ, ທ່ານນາຍົກລັດຖະມົນຕີຫງວຽນເຕີຍຢຸງ ຢືນຢັນວ່າ ຫວຽດນາມ ຖືເປັນສຳຄັນການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຢ່າງແໜ້ນແຟ້ນກັບມຽນມາ. ທ່ານນາຍົກລັດຖະມົນຕີຫງວຽນເຕີນຢຸງ ກໍຢືນຢັນວ່າ ຫວຽດນາມ ສະໜັບສະໜູນເພື່ອໃຫ້ມຽນມາ ຮັບບົດບາດໜ້າທີ່ເປັນປະທານອາຊຽນໃນປີ 2014 ໃຫ້ສຳເລັດ, ພ້ອມທັງປາດຖະໜາວ່າ ມຽນມາຈະກາຍເປັນສະມາຊິກຂອງຄະນະກຳມາທິການແມ່ນ້ຳຂອງສາກົນ ໂດຍໄວ. ການນຳ 2 ທ່ານ ໄດ້ເຫັນດີເປັນເອກະພາບນຳກັນວ່າ ຈະເພີ່ມທະວີການແລກປ່ຽນຄະນະ ແລະ ການພົບປະຂັ້ນສູງ, ເປີດກວ່າງການຮ່ວມມືລະຫວ່າງບັນດາທ້ອງຖິ່ນ ແລະ ການພົວພັນແລກປ່ຽນປະຊາຊົນ; ຜັນຂະຫຍາຍບັນດາຂໍ້ຕົກລົງເຊິ່ງບັນລຸໄດ້ຢ່າງຕັ້ງໜ້າ, ສູ້ຊົນບັນລຸວົງເງິນການຄ້າ 2 ສົ້ນຢ່າງໜ້ອຍແມ່ນ 500 ລ້ານ USD ໃນປີ 2015.
ບັນດາກອງປະຊຸມສຸດຍອດຢູ່ວຽງຈັນ ໄດ້ສິ້ນສຸດລົງຢ່າງຈົບງາມ, ຕອນບ່າຍວັນດຽວກັນ, ທ່ານນາຍົກລັດຖະມົນຕີຫງວຽນເຕີນຢຸງ ໄດ້ໄປຢ້ຽມຢາມ ແລະ ເຮັດວຽກຢູ່ບັນດາແຂວງທາງພາກເໜືອຂອງລາວ.