(vovworld) - ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ພັນລະຍາ, ພ້ອມກັບຄະນະຜູ້ແທນຂັ້ນສູງຫວຽດນາມ ເລີ່ມເຂົ້າຮ່ວມວາລະປຶກສາຫາລືຂັ້ນສູງຂອງສະມັດຊາໃຫຍ່ສະຫະປະຊາຊາດຊຸດທີ 68 ຢູ່ອາເມລິກາ ໃນລະຫວ່າງວັນທີ 27 – 28 ກັນຍາ. ທີ່ການຕ້ອນຮັບທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຄະນະຜູ້ແທນຫວຽດນາມ ຢູ່ສະໜາມບິນການທະຫານ Andrew ໃນຕອນຄໍ່າວັນທີ 27 ກັນຍາ (ຕາມເວລາຫວຽດນາມ) ມີທ່ານເອກອັກຄະລັດຖະທູດ Scott Marciel, ຮອງຜູ້ຊ່ວຍວຽກລັດຖະມົນຕີການຕ່າງປະເທອາເມລິກາ, ຜູ້ບັນຊາການສະໜາມບິນ Andrew ທ່ານ Larry Riddick, ທ່ານເອກອັກຄະລັດຖະທູດຫວຽດນາມ ປະຈຳອາເມລິກາ ຫງວຽນກ໋ວກເກື່ຶອງ, ພະນັກງານ, ພາລະກອນສະຖານທູດຫວຽດນາມ ແລະ ປະຊາຄົມຊາວຫວຽດນາມ ອາໄສຢູ່ອາເມລິກາ.
ພາຍຫຼັງໄປຮອດນະຄອນຫຼວງ ວໍຊິງເຕັນ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມີການພົບປະ 2 ຝ່າຍຕ່າງໆກັບການນຳກະຊວງການຄ້າອາເມລິກາ, ທະນາຄານໂລກ, ຜູ້ຕາງໜ້າການຄ້າອາເມລິກາ ແລະ ການນຳກອງທຶນເງິນຕາສາກົນ IMF.
ທີ່ການຕ້ອນຮັບປະທານທະນາຄານໂລກ (WB) Jim Yong Kim, ທ່ານນາຍົກລັດຖະມົນຕີຫງວຽນເຕີນຢຸງ ຕີລາຄາສູງເລື່ອງຄະນະການນຳ WB ເຫັນດີນຳຫວຽດນາມ ເຂົ້າບັນຊີລາຍຊື່ບັນດາປະເທດສືບຕໍ່ໄດ້ຮັບແຫຼ່ງທຶນບຸລິມະສິດໃນ 3 ປີຂ້າງໜ້າ (2014-2017) ພ້ອມທັງຕີລາຄາສູງເລື່ອງ WB ພວມມານະພະຍາຍາມເຈລະຈາ, ເກັ້ຍກ່ອມບັນດານັກອຸປະຖຳເພື່ອລະດົມແຫຼ່ງທຶນໃຫ້ແກ່ສະຫະສະມາຄົມພັດທະນາສາກົນ (IDA). ທ່ານນາຍົກລັດຖະມົນຕີຫງວຽນເຕີນຢຸງ ຢືນຢັນບົດບາດນັບມື້ນັບສຳຄັນຂອງ WB ທີ່ມີຕໍ່ພາລະກິດພັດທະນາເສດຖະກິດສັງຄົມຂອງຫວຽດນາມ, ພິເສດແມ່ນໃນໄລຍະຈະມາເຖິງ. ສ່ວນທ່ານປະທານ WB Jim Yong Kim ຢືນຢັນວ່າ WB ຈະສືບຕໍ່ສະໜັບສະໜູນຫວຽດນາມ ໃນການພັດທະນາ ແລະ ໃຫ້ຮູ້ວ່າ: WB ສືບຕໍ່ປະຕິບັດບັນດາຄຳໝັ້ນສັນຍາໜູນຊ່ວຍຫວຽດນາມ ສຳພັດກັບແຫຼ່ງທຶນ IDA 2014-2017, ພ້ອມແລ້ວທີ່ຈະໜູນຊ່ວຍຫວຽດນາມ ດ້ານທຶນຮອນໃຫ້ບັນດາໂຄງການ, ທີ່ປຶກສານະໂຍບາຍ ແລະ ໜູນຊ່ວຍດ້ານເຕັກນິກ…
ໃນການຕ້ອນຮັບທ່ານ Christine Largarde, ຜູ້ອຳນວຍການໃຫ່ຍກອງທຶນເງິນຕາສາກົນ (IMF), ທ່ານນາຍົກລັດຖະມົນຕີຫງວຽນເຕີນຢຸງ ຕີລາຄາສູງການຮ່ວມມື ແລະ ໜູນຊ່ວຍຂອງ IMF ສະຫງວນໃຫ້ແກ່ຫວຽດນາມ ນັບແຕ່ກ່ອນມາຮອດປະຈຸບັນ. ທ່ານສະເໜີໃຫ້ IMF ສືບຕໍ່ສົມທົບກັບລັດຖະບານຫວຽດນາມ ຢ່າງແໜ້ນແຟ້ນ ເພື່ອຍົກອອກບັນດາການຕີລາຄາ, ສະເໜີນະໂຍບາຍກ່ຽວຂ້ອງເຖິງການຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້; ເພີ່ມທະວີການໃຫ້ຄຳປຶກສາ, ໂອ້ລົມສົນທະນານະໂຍຍາຍ, ໜູນຊ່ວຍດ້ານເຕັກນິກໃຫ້ແກ່ຫວຽດນາມ. ສ່ວນຜູ້ອຳນວຍການໃຫ່ຍກອງທຶນເງິນຕາສາກົນ Christine Largarde ຢືນຢັນຈະສືບຕໍ່ໜູນຊ່ວຍຫວຽດນາມ ແລະ ເຊື່ອໝັ້ນວ່າ, ດ້ວຍບັນດາມາດຕະການຮອບດ້ານຄືປະຈຸບັນ, ພື້ນຖານເສດຖະກິດຫວຽດນາມ ຈະຜ່ານຜ່າບັນດາສິ່ງທ້າທາຍກ່ຽວກັບເສດຖະກິດມະຫາພາກ.
ທີ່ການຕ້ອນຮັບທ່ານລັດຖະມົນຕີກະຊວງການຄ້າອາເມລິກາ Penny Pritzker ແລະ ຜູ້ຕາງໜ້າການຄ້າອາເມລິກາ Michael Froman ລ້ວນແຕ່ຢືນຢັນຈະສືບຕໍ່ຊຸກຍູ້ການຮ່ວມມືຫຼາຍດ້ານກັບຫວຽດນາມ, ໂດຍສະເພາະແມ່ນໃນຂົງເຂດເສດຖະກິດ, ການຄ້າ, ການລົງທຶນ, ຢືນຢັນຄວາມຕັດສິນໃຈຍູ້ໄວວິວັດການເຈລະຈາສັນຍາຮ່ວມມື ຄູ່ຮ່ວມມືເສດຖະກິດເຂດປາຊີຝີກ (TPP) ກັບຫວຽດນາມ ກໍ່ຄືກັບຄູ່ຮ່ວມມືອື່ນໆ ເພື່ອສາມາດສຳເລັດສັນຍານີ້ໂດຍໄວ.
ທ່ານນາຍົກລັດຖະມົນຕີ ຫງວຽນເຕີນຢຸງ ກໍ່ຢືນຢັນຄວາມຕັດສິນໃຈຂອງຫວຽດນາມ ແມ່ນຊຸກຍູ້ການເຈລະຈາທີ່ໄດ້ລະບຸໄວ້ໃນຂໍ້ຕົກລົງລະຫວ່າງການນຳ 2 ປະເທດເມື່ອປີ 2012, ພ້ອມແລ້ວທີ່ຈະຮ່ວມມືກັບອາເມລິກາ ແລະ ບັນດາປະເທດເຈລະຈາອື່ນໆ ເພື່ອສິ້ນສຸດ ແລະ ລົງນາມໃນສັນຍາ TPP ຕາມແຜນການທີ່ໄດ້ວາງອອກ, ພ້ອມທັງສະເໜີໃຫ້ຝ່າຍອາເມລິກາ ມີໄຫວພິບທີ່ຈຳເປັນໃຫ້ແກ່ຫວຽດນາມ ໃນວິວັດການນີ້. ທ່ານນາຍົກລັດຖະມົນຕີ ຫງວຽນເຕີນຢຸງ ຊົມເຊີຍກະຊວງການຄ້າອາເມລິກາ ໃນໄລຍະຜ່ານມາໄດ້ປະກາດຫວຽດນາມ ບໍ່ອຸດໜູນສຳລັບຜະລິດຕະພັນກຸ້ງ, ສະເໜີໃຫ້ອາເມລິກາ ຮັບຮອງຫວຽດນາມ ແມ່ນພື້ນຖານເສດຖະກິດການຕະຫຼາດ, ຢຸດຕິການສືບສວນສຳລັບ 12 ກໍລະນີການແກ່ງແຍ້ງດ້ານການຄ້າກັບຫວຽດນາມ. ບັນດາລັດຖະມົນຕີອາເມລິກາ ໄດ້ຮັບຮູ້ຄຳເຫັນຂອງທ່ານນາຍົກລັດຖະມົນຕີ ຫງວຽນເຕີນຢຸງ ທີ່ການພົບປະ ແລະ ໃຫ້ຄຳໝັ້ນສັນຍາວ່າ ຈະຕັ້ງໜ້າພິຈາລະນາເພື່ອມີບັນດາມາດຕະການທີ່ເໝາະສົມໃນໄລຍະຈະມາເຖິງ.