(vovworld) - ຕອນເຊົ້າວັນທີ 24 ກັນຍາ, ຕາມເວລາຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ພັນລະຍາ ພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ໄປຮອດນະຄອນຫຼວງປາຣີ, ເລີ່ມຕົ້ນການຢ້ຽມຢາມສ.ຝລັ່ງ ໃນເວລາ 3 ວັນ ຢ່າງເປັນທາງການ, ຕາມຄຳເຊີນຂອງທ່ານນາຍົກລັດຖະມົນຕີຝລັ່ງ Jean Marc Ayrault. ອອກຕ້ອນຮັບທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນສາກົນ, ນະຄອນຫຼວງປາຣີ ມີບັນດາເຈົ້າໜ້າທີ່ກະຊວງການຕ່າງປະເທດຝລັ່ງ, ຜູ້ວ່າການເຂດ Val de Marne, ເອກອັກຄະລັດຖະທູດຝລັ່ງປະຈຳຫວຽດນາມ, ເອກອັກຄະລັດຖະທູດຫວຽດນາມ ປະຈຳຝລັ່ງ ພ້ອມກັບພະນັກງານ, ພາລະກອນສະຖານທູດເປັນຈຳນວນຫຼາຍ ແລະ ບັນດາອົງການຕາງໜ້າຫວຽດນາມປະຈຳຝລັ່ງ, ນັກສຶກສາຫວຽດນາມ ພວມຮໍ່າຮຽນຢູ່ຝລັ່ງ. ພິທີຕ້ອນຮັບທ່ານນາຍົກລັດຖະມົນຕີ ຫງວຽນເຕີນຢຸງ ແລະ ພັນລະຍາ ພ້ອມກັບຄະນະຜູ້ແທນຫວຽດນາມ ຢ່າງເປັນທາງການ ໄດ້ດຳເນີນໃນຕອນບ່າຍວັນດຽວກັນ, ຢູ່ວັງ Invalides. ການຢ້ຽມຢາມຝລັ່ງ ຄັ້ງນີ້ຂອງທ່ານນາຍົກລັດຖະມົນຕີ ຫງວຽນເຕີນຢຸງ ດຳເນີນໄປກົງກັບໂອກາດ 2 ປະເທດພວມຈັດຕັ້ງບັນດາການເຄື່ອນໄຫວສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດ ແລະ ໃນຈຸດເວລາທີ່ການພົວພັນ 2 ປະເທດພວມໄດ້ຮັບຜົນງານຫຼາຍຢ່າງເພື່ອກ້າວໄປເຖິງການສ້າງຕັ້ງການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ຝລັ່ງ.
ແລະ ກໍໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢຸງ ພ້ອມດ້ວຍພັນລະຍາໄດ້ເຂົ້າຮ່ວມ ແລະ ຕັດແຖບຜ້າເປີດສຳນັກງານໃໝ່ຂອງສະຖານທູດຫວຽດນາມປະຈຳຝະລັງທີ່ນະຄອນຫຼວງປາຣີ. ເມື່ອໂອ້ລົມກັບພະນັກງານ, ພາລະກອນ ສະຖານທູດຫວຽດນາມປະຈຳຝະລັງ ແລະ ຜູ້ຕາງໜ້າຊາວຫວຽດນາມອາໄສຢູ່ຝະລັງ, ພາຍຫຼັງແຈ້ງໃຫ້ຊາບສະພາບການເສດຖະກິດ, ສັງຄົມ, ການພົວພັນຕ່າງປະເທດຂອງຫວຽດນາມໃນໄລຍະ 5 ປີມານີ້, ທ່ານນາຍົກລັດຖະມົນຕີ ຫງວຽນເຕີນຢຸງໄດ້ເນັ້ນໜັກເຖິງການປະກອບສ່ວນຢ່າງຕັ້ງໜ້າເຂົ້າໃນຜົນງານລວມຂອງປະເທດຊາດ, ຂອງວົງຄະນະຍາດຊາວຫວຽດນາມພວມດຳລົງຊີວິດຢູ່ບັນດາປະເທດໃນໂລກເວົ້າລວມ ແລະ ຢູ່ຝະລັງເວົ້າສະເພາະ.
ຕອນຄ່ຳຂອງວັນດຽວກັນ, ທ່ານນາຍົກລັດຖະມົນຕີ ຫງວຽນເຕີນຢຸງໄດ້ໃຫ້ການຕ້ອນຮັບທ່ານລັດຖະມົນຕີກະຊວງປ້ອງກັນຊາດຝະລັງ, ການນຳພັກກອມມູນິດຝະລັງ ແລະ ການນຳສະມາຄົມມິດຕະພາບຝະລັງ-ຫວຽດນາມ.
ໃນຂອບເຂດການຢ້ຽມຢາມຝລັ່ງ, ທ່ານນາຍົກລັດຖະມົນຕີ ຫງວຽນເຕີນຢຸງ ຈະພ້ອມກັບບັນດາການຳຝລັ່ງ ປຶກສາຫາລື ແລະ ເປັນເອກະພາບບັນດາມາດຕະການຢ່າງລະອຽດ ເພື່ອແນໃສ່ເຮັດມໃຫ້ການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດປະກົດຜົນເປັນຈິງ, ໂດຍສະເພາະແມ່ນຍູ້ແຮງການຮ່ວມມືດ້ານເສດຖະກິດ, ການຄ້າ, ການລົງທຶນ, ສ້າງບາດກ້າວບຸກທະລຸໃນການຮ່ວມມືພັດທະນາວິທະຍາສາດ, ເຕັກໂນໂລລີ, ການສຶກສາ, ບຳລຸງສ້າງ ແລະ ວັດທະນະທຳ, ການທ່ອງທ່ຽວລະຫວ່າງ 2 ປະເທດ.