(vovworld) - ໃນຂອບເຂດການຢ້ຽມຢາມທາງລັດຖະກິດເຖິງສ.ກູບາ ຕາມຄຳເຊີນຂອງທ່ານປະທານສະພາແຫ່ງລັດ ແລະ ສະພາລັດຖະມົນຕີສ.ກູບາ Raul Castro Ruz, ຕອນເຊົ້າວັນທີ 27/03 (ຕາມເວລາຫວຽດນາມ), ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມີການພົບປະເຈລະຈາກັບທ່ານປະທານສະພາແຫ່ງຊາດກູບາ, ຢ້ຽມຢາມສະຖາບັນກູບາມິດຕະພາບກັບປະຊາຊາດ (ICAP) ແລະ ສະມາຄົມມິດຕະພາບກູບາ - ຫວຽດນາມ, ວາງພວງມາລາຢູ່ອານຸສາວະລີປະທານໂຮ່ຈິມິນ, ຢ້ຽມຢາມສະຖານທູດຫວຽດນາມປະຈຳກູບາ.
ກ່ອນໜ້ານັ້ນ, ຕອນຄໍ່າວັນທີ 26/03, ພາຍຫຼັງເດີນທາງໄປຮອດກູບາ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໄປວາງພວງມາລາຢູ່ອານຸສາວະລີ Jose Marti ຢູ່ນະຄອນຫຼວງ La Habana, ມີການພົບປະກັບທ່ານຮອງປະທານຜູ້ທີໜຶ່ງສະພາແຫ່ງລັດ ແລະ ສະພາລັດຖະມົນຕີສ.ກູບາ Miguel Diaz Canel Bermudez.
ທີ່ການພົບປະ, ການນຳ 2 ທ່ານໄດ້ປຶກສາຫາລືບາງມາດຕະການເພື່ອເຮັດໃຫ້ການພົວພັນລະຫວ່າງ 2 ປະເທດໃນໄລຍະຈະມາເຖິງສືບຕໍ່ເລິກເຊິ່ງ, ແທດຈິງ ແລະ ມີປະສິດທິຜົນ, ໃນນັ້ນໄດ້ເນັ້ນໜັກເຖິງຄວາມສຳຄັນຂອງການເພີ່ມທະວີການທາບທາມຄວາມເຫັນ ແລະ ການຮ່ວມມືລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດຢ່າງແໜ້ນແຟ້ນ. ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ ຫວຽດນາມ ພ້ອມແລ້ວທີ່ຈະຮ່ວມມື, ໜູນຊ່ວຍກູບາ ໃນບັນດາຂົງເຂດເຊິ່ງຫວຽດນາມ ມີທ່າແຮງ ແລະ ເໝາະສົມກັບຄວາມສາມາດຂອງຕົນ.
ໃນການຮ່ວມມືດ້ານເສດຖະກິດ, ທ່ານຮອງປະທານຜູ້ທີໜຶ່ງສະພາແຫ່ງລັດ ແລະ ສະພາລັດຖະມົນຕີສ.ກູບາ Miguel Diaz Canel Bermudez ປາດຖະໜາວ່າ ຫວຽດນາມ ຈະສືບຕໍ່ໜູນຊ່ວຍກູບາ ກ່ຽວກັບການພັດທະນາກະສິກຳ. ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ, ຫວຽດນາມ ໃຫ້ຄຳໝັ້ນສັນຍາສືບຕໍ່ສະຫງວນແຫຼ່ງກຳລັງເພື່ອຜັນຂະຫຍາຍໄລຍະ 2 ຂອງແຜນການພັດທະນາສາລີ, ໝາກຖົ່ວເຫຼືອງ ແລະ ໂຄງການໜູນຊ່ວຍພັດທະນາການລ້ຽງປູກສິນໃນນ້ຳ, ພ້ອມທັງຜັນຂະຫຍາຍການຮ່ວມມືເບື້ອງຕົ້ນກ່ຽວກັບການພັດທະນາຕົ້ນກາເຟ.
ການນຳ 2 ທ່ານ ກໍ່ປຶກສາຫາລືບາງມາດຕະການເພື່ອແນໃສ່ຊຸກຍູ້ການພົວພັນຮ່ວມມືດ້ານສາທາລະນະສຸກ ແລະ ເຕັກໂນໂລຊີຊີວະສາດ, ນ້ຳມັນອາຍແກດ, ກໍ່ສ້າງ, ທ່ອງທ່ຽວ...