ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ໃຫ້ການຕ້ອນຮັບ ຫົວໜ້າອົງການກວດກາລັດຖະບານລາວ
ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ແລະ ທ່ານບຸນທອງ ຈິດມະນີ, ຫົວໜ້າອົງການກວດກາລັດຖະບານລາວ
(ພາບ: baodientuchinhphu)
|
(vovworld)- ຕອນບ່າຍວັນທີ 7/7, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ໄດ້ໃຫ້ການຕ້ອນຮັບທ່ານບຸນທອງ ຈິດມະນີ, ຫົວໜ້າອົງການກວດກາລັດຖະບານລາວພ້ອມດ້ວຍຄະນະຊຶ່ງພວມຢູ່ຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ໄດ້ຕີລາຄາສູງໝາກຜົນແຫ່ງການເຈລະຈາລະຫວ່າງຄະນະຜູ້ແທນອົງການກວດກາລັດຖະບານຫວຽດນາມ ແລະ ຄະນະຜູ້ແທນອົງການກວດກາລັດຖະບານ ລາວ. ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ຢືນຢັນວ່າ ພັກ ແລະ ລັດ ແລະ ປະຊາຊົນຫວຽດນາມ ມີທັດສະນະສະເໝີຕົ້ນ ສະເໝີປາຍຈະເຮັດຈົນ ສຸດຄວາມສາມາດຂອງຕົນເພື່ອເພີ່ມພູນຄູນສ້າງສາຍພົວພັນ ຮ່ວມມືພິເສດ ລະຫວ່າງ 2 ປະເທດ, ນຳສາຍພົວພັນຫວຽດນາມ-ລາວນັບມື້ນັບມີປະສິດທິຜົນ ແລະ ເຂົ້າສູ່ລວງເລິກ. ທ່ານນາຍົກລັດຖະມົນຕີ ຫວຽດນາມ ຫງວຽນເຕີ້ນຢຸງ ຫວັງວ່າ ອົງການກວດກາລັດຖະບານ ຂອງ 2 ປະເທດສືບຕໍ່ເພີ່ມທະວີແລກປ່ຽນຄະນະ ຜູ້ແທນ, ຮ່ວມມືຢ່າງແໜ້ນແຟ້ນ ແລະ ຢືນຢັນວ່າ ຫວຽດນາມພ້ອມແລ້ວທີ່ຈະຊ່ວຍເຫຼືອລາວໃນການກໍ່ສ້າງພະນັກງານຂະແໜງກວດກາ.
ທ່ານ ຮິ່ງຟອງແຈງ ແລະ ທ່ານ ບຸນທອງ ຈິດມະນີ
(ພາບ: Lâm Khánh/TTXVN)
ກ່ອນໜ້ານັ້ນຄືໃນຕອນເຊົ້າວັນທີ 7/7, ຢູ່ຮ່າໂນ້ຍ, ຄະນະຜູ້ແທນອົງການກວດກາລັດຖະບານ ຫວຽດນາມ ໂດຍທ່ານຫົວໜ້າອົງການກວດກາລັດຖະບານ ຮິ່ງຟອງແຈງ, ເປັນຫົວໜ້າຄະນະມີການເຮັດວຽກກັບຄະນະຜູ້ແທນຂັ້ນສູງອົງການກວດກາລັດຖະບານລາວ ໂດຍທ່ານ ບຸນທອງ ຈິດມະນີ, ກຳມະການກົມການເມືອງ, ເລຂາສູນກາງພັກ, ຫົວໜ້າຄະນະກຳມະການກວດກາສູນກາງພັກ, ຫົວໜ້າອົງການກວດກາລັດຖະບານ, ປະທານອົງການປ້ອງກັນ, ຕ້ານການສໍ້ລາດບັງຫຼວງສູນກາງພັກ ປະຊາຊົນປະຕິວັດລາວ ນຳໜ້າ, ເນື່ອງໃນໂອກາດຄະນະມາຢ້ຽມຢາມ ແລະ ເຮັດວຽກຢູ່ ຫວຽດນາມ ແຕ່ວັນທີ 6 – 12/7. ທ່ານ ຮິ່ງຟອງແຈງ, ຢືນຢັນວ່າ: ອົງການກວດກາລັດຖະບານ ຫວຽດນາມ ຖືການຢ້ຽມຢາມ ແລະ ເຮັດວຽກຄັ້ງນີ້ຂອງຄະນະກວດກາລັດຖະບານ ລາວ ແມ່ນກາລະໂອກາດທີ່ລ້ຳຄ່າເພື່ອໃຫ້ 2 ຝ່າຍກ້າວເຂົ້າສູ່ການປຶກສາຫາລື, ແລກປ່ຽນບົດຮຽນ, ປະກອບສ່ວນປັບປຸງ, ເພີ່ມທະວີການພົວພັນມິດຕະພາບ ການຮ່ວມມືຍິ່ງກ່ວາອີກລະຫວ່າງ 2 ອົງການເວົ້າສະເພາະ ແລະ ການພົວພັນມິດຕະພາບແບບພິເສດລະຫວ່າງ ຫວຽດນາມ ແລະ ລາວ ເວົ້າລວມ.
ໃນໄລຍະຢູ່ຢ້ຽມຢາມ ຫວຽດນາມ, ຄະນະຜູ້ແທນອົງການກວດກາລັດຖະບານ ລາວ ຈະຊອກຮູ້ພຶດຕິກຳຕົວຈິງກ່ຽວກັບວຽກງານກວດກາ, ແກ້ໄຂຄຳຮ້ອງຟ້ອງ, ຮ້ອງທຸກ, ປ້ອງກັນ, ຕ້ານການສໍ້ລາດບັງຫຼວງຢູ່ ດ່ານັ້ງ ແລະ ນະຄອນ ໂຮ່ຈີມິນ.