(vovworld) - ຕອນບ່າຍວັນທີ 12/05, ທ່ານນາຍົກລັດຖະມົນຕີ ຫງວຽນເຕີນຢຸງ ແລະ ຄະນະຜູ້ແທນຫວຽດນາມ ໄດ້ເດີນທາງໄປຮອດນະຄອນຫຼວງມົດສກູ, ເລີ່ມຕົ້ນການຢ້ຽມຢາມສະຫະພັນລັດເຊຍ ຢ່າງເປັນທາງການໃນລະຫວ່າງວັນທີ 12 – 15/05, ຕາມຄຳເຊີນຂອງທ່ານນາຍົກລັດຖະມົນຕີສະຫະພັນລັດເຊຍ Dmitry Medvedev. ກ່າວຄຳເຫັນທີ່ການພົບປະກັບຜູ້ຕາງໜ້າປະຊາຄົມຊາວຫວຽດນາມອາໄສຢູ່ສະຫະພັນລັດເຊຍ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຕີລາຄາສູງໂຄງການລົງທຶນໃຫຍ່ຂອງກຸ່ມບໍລິສັດ INCENRTRA ດ້ວຍການກໍ່ສ້າງສູນວັດທະນະທຳ, ການຄ້າ, ໂຮງແຮມຮ່າໂນ້ຍ - ມົດສກູ ຢູ່ນະຄອນຫຼວງຂອງສະຫະພັນລັດເຊຍ, ອັນໄດ້ປະກອບສ່ວນສ້າງສະຖານທີ່ດຳເນີນຊີວິດວັດທະນະທຳດ້ານຈິດໃຈ ແລະ ດຳເນີນທຸລະກິດຢ່າງສະດວກໃຫ້ແກ່ປະຊາຄົມຊາວຫວຽດນາມ. ທ່ານນາຍົກລັດຖະມົນຕີ ກໍຢືນຢັນວ່າ ນະໂຍບາຍສະເໝີຕົ້ນສະເໝີປາຍຂອງພັກ, ລັດ ແມ່ນຖືປະຊາຄົມຊາວຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ຂາດບໍ່ໄດ້ຂອງຊາດຫວຽດນາມ ແລະ ຍາມໃດກໍສະຫງວນຄວາມເອົາໃຈໃສ່ຢ່າງໃຫຍ່ຫຼວງໃຫ້ແກ່ປະຊາຄົມດັ່ງກ່າວ. ທ່ານນາຍົກລັດຖະມົນຕີ ກໍຕີລາຄາສູງບັນດາທ່າແຮງຂອງປະຊາຄົມຊາວຫວຽດນາມ ອາໄສຢູ່ສະຫະພັນລັດເຊຍ.
“ຂ້າພະເຈົ້າຫວັງໜາວ່າ ປະຊາຄົມຈະສືບຕໍ່ສືມຂະຫຍາຍມູນເຊື້ອອັນດີງາມຂອງຕົນ, ນັ້ນແມ່ນສາມັກຄີ, ຮັກແພງ, ຊ່ວຍເຫຼືອເຊິ່ງກັນ ແລະ ກັນ, ຜ່ານຜ່າທຸກຄວາມຫຍຸ້ງຍາກເພື່ອທຳມາຫາກິນດຳລົງຊີວິດ, ເຊື່ອມໂຍງ ແລະ ຕິດພັນກັບປະຊາຄົມລັດເຊຍ. ພວກເຮົາຕ້ອງເຊື່ອມໂຍງ ແລະ ເຄົາລົບກົດໝາຍ, ປະຕິບັດກົດໝາຍ, ເຄົາລົບອຳນາດການປົກຄອງ ແລະ ຮັກສາສີສັນວັດທະນະທຳຂອງຫວຽດນາມ ໄວ້”.