(vovworld) - ໃນຂອບເຂດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງຄະນະຊາວຫນຸ່ມກອມມູນິດໂຮ່ຈິມິນ ທີ່ພວມດຳເນີນໄປຢູ່ຮ່າໂນ້ຍ, ວັນທີ 14/12, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໂອ້ລົມສົນທະນາກັບຊາວໜຸ່ມ. ນີ້ແມ່ນເຫດການໃຫຍ່ທີ່ມີຄວາມໝາຍຕໍ່ກອງປະຊຸມໃຫຍ່ ກໍຄືຕໍ່ວຽກງານຄະນະຊາວໜຸ່ມ ແລະ ຂະບວນການຊາວໜຸ່ມ, ເຍົາວະຊົນເວົ້າລວມ. ທີ່ການໂອ້ລົມສົນທະນາ, ບັນດາຜູ້ແທນສະເໜີຕໍ່ລັດຖະບານ, ນາຍົກລັດຖະມົນຕີ ບັນດາກົນໄກ, ນະໂຍບາຍກ່ຽວກັບການສຶກສາ, ບຳລຸງສ້າງ, ພັດທະນາແຫຼ່ງຊັບພະຍາກອນມະນຸດໜຸ່ມທີ່ມີຄຸນນະພາບສູງ. ບັນດາຜູ້ແທນກໍເຕື້ອງເຖິງບັນຫາວຽກເຮັດງານທຳໃຫ້ແກ່ຊາວໜຸ່ມ, ກ່ຽວກັບບັນດາມາດຕະການທີ່ມີລັກສະນະບຸກທະລຸຂອງລັດຖະບານ, ນາຍົກລັດຖະມົນຕີ ເພື່ອປະຕິບັດຍຸດທະສາດພັດທະນາຊາວໜຸ່ມຫວຽດນາມ ໄລຍະ 2011 - 2020.
ເມື່ອຕອບຄຳຖາມທີ່ກ່ຽວຂ້ອງເຖິງໂຄງປະກອບແຫຼ່ງຊັບພະຍາກອນຊາວໜຸ່ມຂອງຫວຽດນາມ, ການເລືອກເຟັ້ນ ກໍ່ຄືການບຳລຸງສ້າງແຫຼ່ງຊັບພະຍາກອນມະນຸດນີ້, ທ່ານນາຍົກລັດຖະມົນຕີ ຫງວຽນເຕິ໋ຢຸງຢືນຢັນວ່າ:
”ພັກ ແລະ ລັດ ຍາມໃດກໍ່ຖືບົດບາດ, ທີ່ຕັ້ງຂອງຊາວໜຸ່ມເປັນສຳຄັນ, ແລະ ກຳນົດວ່າ, ກຳລັງຊາວໜຸ່ມ ແມ່ນກຳລັງປະຈັນບານຂອງການປະຕິວັດ, ວຽກງານຊາວໜຸ່ມແມ່ນບັນຫາເປັນຕາຍຂອງປະເທດຊາດ. ລັດຖະບານຈະສືບຕໍ່ມີນະໂຍບາຍຕ່າງໆ, ເພື່ອສ້າງເງື່ອນໄຂໃຫ້ລຸ້ນໜຸ່ມພັດທະນາຢ່າງໄວກວ່າ, ແຂງແຮງກວ່າ. ຍາມໃດລັດຖະບານກໍ່ພ້ອມແລ້ວທີ່ຈະແລກປ່ຽນກັບພວກເພື່ອນຊາວໜຸ່ມບັນດາບັນຫາເຊິ່ງພວກເພື່ອນມີຄວາມສົນໃຈ”.
ເມື່ອຕອບຄຳຖາມກ່ຽວກັບນະໂຍບາຍດຶງດູດປັນຍາຊົນໜຸ່ມຫວຽດນາມຢູ່ຕ່າງປະເທດ, ທ່ານນາຍົກລັດຖະມົນຕີ ຫງວຽນເຕິ໋ຢຸງແບ່ງປັນວ່າ:
”ປະຈຸບັນ, ຫວຽດນາມມີຄວາມຕ້ອງການຖັນແຖວຊັບພະຍາກອນໜຸ່ມທີ່ມີຄຸນນະພາບສູງທີ່ສຸດ. ດ້ານໜຶ່ງ, ພັກ ແລະ ລັດສຸມໃສ່ສຶກສາ ບຳລຸງສ້າງຢູ່ພາຍໃນປະເທດ, ດ້ານໜຶ່ງແມ່ນຮຽກຮ້ອງການອຸທິດສ່ວນຂອງບັນດາເພື່ອນໜຸ່ມຫວຽດນາມທີ່ຮຳ່ຮຽນຢູ່ຕ່າງປະເທດ. ປະຈຸບັນ, ມີນັກສຶກສາຫວຽດນາມ 100.000 ຄົນພວມຮຳ່ຮຽນຢູ່ຕ່າງປະເທດ, ພັກ ແລະ ລັດມີຄວາມເອົາໃຈໃສ່ທີ່ສຸດເຖິງແຫຼ່ງກຳລັງນີ້ ແລະ ໄດ້ມີນະໂຍບາຍຕ່າງໆ ເພື່ອດຶງດູດຊາວໜຸ່ມເຫຼົ່ານີ້ກັບເມືອຮັບໃຊ້ປະເທດຊາດ. ແລະ ຫວັງວ່າພົນລະເມືອງຫວຽດນາມ ແລະ ຊາວໜຸ່ມທີ່ພວມຮຳ່ຮຽນຢູ່ຕ່າງປະເທດກໍ່ຈະມີການແບ່ງປັນສະໜັບສະໜູນປະເທດຊາດ”.
ພາຍຫຼັງການໂອ້ລົມສົນທະນາລະຫວ່າງທ່ານນາຍົກລັດຖະມົນຕີ ຫງວຽນເຕີນຢຸງ ກັບຜູ້ແທນຊາວໜຸ່ມ, ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 10 ຂອງຄະນະຊາວຫນຸ່ມກອມມູນິດໂຮ່ຈິມິນ ໄດ້ອັດລົງ. ຜ່ານການເຮັດວຽກເປັນເວລາ 4 ວັນ, ກອງປະຊຸມໃຫຍ່ໄດ້ປຶກສາຫາລື ແລະ ຮັບຮອງເອົາບັນດາເອກະສານທີ່ສຳຄັນຄື: ບົດລາຍງານຂອງຄະນະປະຕິບັດງານສູນກາງຊາວໜຸ່ມຄັ້ງທີ 9 ຢູ່ທີ່ກອງປະຊຸມໃຫຍ່ຄະນະຊາວຫນຸ່ມຄັ້ງທີ 10; ບົດລາຍການສຳຫຼວດກວດກາຄະນະປະຕິບັດງານສູນກາງຊາວໜຸ່ມອາຍຸການ 2007 – 2012; ກົດລະບຽບຄະນະຊາວໜຸ່ມສະບັບປັບປຸ່ງ, ເພີ່ມເຕີ່ມ. ກອງປະຊຸມໃຫຍ່ໄດ້ສະເໜີຕົວຄະນະປະຕິບັດງານສູນກາງຊາວໜຸ່ມຊຸດທີ 10 ເຊິ່ງລວມມີ 151 ຄົນ, ຄະນະປະຈຳສູນກາງຊາວໜຸ່ມລວມມີ 33 ຄົນ; ຄະນະເລຂາ ລວມມີ 7 ຄົນ. ທ່ານ ຫງວຽນດັ໋ກວິງ ໄດ້ຮັບການເລືອກຕັ້ງເປັນເລຂາທີຫນຶ່ງສູນກາງຄະນະຊາວຫນຸ່ມ ຄືນໃໝ່. ກໍທີ່ວາລະອັດກອງປະຊຸມ, ກອງປະຊຸມໃຫຍ່ໄດ້ຮັບຮອງເອົາມະຕິຂອງກອງປະຊຸມໃຫຍ່; ປະກາດຈົດໝາຍສົ່ງເຖິງໄວໜຸ່ມທົ່ວປະເທດ. ກ່າວຄຳເຫັນທີ່ວາລະອັດກອງປະຊຸມ. ທ່ານ ຫງວຽນດັ໋ກວິງ ເລຂາທີຫນຶ່ງສູນກາງຄະນະຊາວຫນຸ່ມຊຸດທີ 10 ເນັ້ນໜັກວ່າ: ກອງປະຊຸມໃຫຍ່ທົ່ວປະເທດຄັ້ງທີ 10 ແມ່ນກອງປະຊຸມແຫ່ງຄວາມໄຝຝັອັນແຮງກ້າຂອງໄວໜຸ່ມ, ດ້ວຍຄວາມເຊື່ອໝັ້ນຢ່າງແນ່ນອນ, ເຈດຈຳນົງທີ່ເຂັ້ມແຂງ, ນ້ຳໃຈສາມັກຄີເປັນຈິດໜຶ່ງໃຈດຽວ, ປະຈັນບານມີຫົວຄິດປະດິດສ້າງ ໝັ້ນຄົງໜັກແໜ້ນບົນເສັ້ນທາງຍູ້ແຮງການຫັນປະເທດຊາດເປັນອຸດສາຫະກຳ ແລະ ທັນສະໄໝ, ເຊື່ອມໂຍງເຂົ້າກັບສາກົນ; ສະແດງໜ້າທີ່ຮັບຜິດຊອບຂອງໄວໜຸ່ມໃນການຝຶກພົນຫຼໍ່ຫຼອມ, ພັດທະນາຂອງຕົນເອງ ແລະ ມີການປະກອບສ່ວນໃຫ້ແກ່ວົງຄະນະຍາດ ແລະ ສົງຄົມຢ່າງມີປະສິດທິຜົນ.