ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບ
ຮອງນາຍົກລັດຖະມົນຕີ ລາວ ສອນໄຊ ສີພັນດອນ
(vovworld) – ຕອນບ່າຍວັນທີ 17/11, ທີ່ການຕ້ອນຮັບທ່ານຮອງນາຍົກລັດຖະມົນຕີ ລາວ ສອນໄຊ ສີພັນດອນ ເນື່ອງໃນໂອກາດມາ ຫວຽດນາມ ເຂົ້າຮ່ວມກອງປະຊຸມສາກົນກ່ຽວກັບການປ້ອງກັນຕ້ານການຄ້າຂາຍສັດປ່າ,ພືດທຳມະຊາດຢ່າງຜິດກົດໝາຍ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ ການຢ້ຽມຢາມ ລາວ ຂອງທ່ານເລຂາທິການໃຫຍ່ ຫງວຽນຟູຈ້ອງ ຈະມາເຖິງ ແມ່ນການຢ້ຽມຢາມຕ່າງປະເທດທຳອິດ ພາຍຫລັງກອງປະຊຸມໃຫຍ່ຄັ້ງທີ 12 ຂອງພັກ. ນີ້ແມ່ນເຫດການພິເສດໃນການພົວພັນລະຫວ່າງ 2 ປະເທດ, ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີ 2 ຝ່າຍກວດກາຄືນບັນດາວຽກງານ, ກະກຽມເປັນຢ່າງດີ ເພື່ອໃຫ້ການຢ້ຽມຢາມປະສົບຜົນສຳເລັດຢ່າງຈົບງາມ. ທ່ານນາຍົກລັດຖະມົນຕີ ຫງວຽນຊວນຟຸກ ສະເໜີ 2 ຝ່າຍສືບຕໍ່ຊຸກຍູ້ບັນດາໂຄງການຮ່ວມມື 2 ປະເທດ, ຍູ້ໄວການຜັນຂະຫຍາຍບັນດາໂຄງການ ຫວຽດນາມ ຢູ່ ລາວ, ນຳມາເຊິ່ງຜົນປະໂຫຍດໃຫ້ທັງ 2 ຝ່າຍ. ຫວຽດນາມ ພ້ອມແລ້ວທີ່ຈະແບ່ງປັນບົດຮຽນ ແລະ ການຮ່ວມມືກັບ ລາວ ໃນບັນດາຂົງເຂດຄື: ກະສິກຳ, ປ່າໄມ້. 2 ຝ່າຍຄວນສືບຕໍ່ສຶກສາລຸ້ນໜຸ່ມ 2 ປະເທດ ເພື່ອຮັກສາການພົວພັນທີ່ເປັນມູນເຊື້ອລະຫວ່າງ 2 ປະເທດ, ພິເສດແມ່ນຈັດຕັ້ງບັນດາການເຄື່ອນໄຫວສະເຫຼີມສະຫຼອງວັນບຸນໃຫຍ່ຕ່າງໆຂອງ 2 ປະເທດໃນປີ 2017.
ສ່ວນທ່ານຮອງນາຍົກລັດຖະມົນຕີ ລາວ ສອນໄຊ ສີພັນດອນ ເຊື່ອໝັ້ນວ່າ 2 ປະເທດຈະຮ່ວມມືເປັນຢ່າງດີ ໃນການຮັກສາສັດປ່າ. ເພີ່ມທະວີການສຶກສາສະຕິຂອງປະຊາຊົນໃນການປະຕິບັດກົດໝາຍກ່ຽວກັບການຮັກສາສັດປ່າ, ພືດທຳມະຊາດ. ທ່ານຮອງນາຍົກລັດຖະມົນຕີສະເໜີວ່າ 2 ຝ່າຍປຶກສາຫາລືການຮ່ວມມືສົ່ງເສີມການລົງທຶນ ກໍ່ສ້າງເສັ້ນທາງຄວາມໄວສູງ ຮ່າໂນຍ - ວຽງຈັນ, ໂຄງການທໍ່ສົ່ງນ້ຳມັນທ່າກ່ຳປ່ັນ ຮ່ອນລາ - ຄຳມ່ວນ, ຊຸກຍູ້ການຮ່ວມມືລະຫວ່າງບັນດາທ້ອງຖິ່ນ 2 ປະເທດ; ຊຸກຍູ້ບັນດາໂຄງການລົງທຶນຂອງ ຫວຽດນາມ ປະຈຳ ລາວ.