ທ່ານນາຍົກລັດຖະມົນຕີ ຫງວຽນຊວນຟຸກ
ຕ້ອນຮັບເອກອັກຄະລັດຖະທູດຍີ່ປຸ່ນ
(vovworld) - ຕອນບ່າຍວັນທີ 11/11 ຢູ່ ສຳນັກງານລັດຖະບານ, ກ່າວຄຳເຫັນທີ່ການຕ້ອນຮັບທ່ານ Kunio Umeda ເອກອັກຄະລັດຖະທູດ ຍີ່ປຸ່ນ ຄົນໃໝ່, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ຢືນຢັນວ່າ: ນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ແມ່ນຖືເປັນຄຳຄັນການພັດທະນາສາຍພົວພັນກັບ ຍີ່ປຸ່ນ ດ້ວຍຖານະເປັນຄູ່ຮ່ວມມືສຳຄັນແຖວໜ້າ, ຍາວນານ ແລະ ສະໜັບສະໜູນ ຍີ່ປຸ່ນ ມີບົດບາດ, ທີ່ຕັ້ງບົນເວທີສາກົນ, ປະກອບສ່ວນເຂົ້າໃນການສ້າງສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ. ທ່ານນາຍົກລັດຖະມົນຕີສະເໜີ 2 ຝ່າຍສືບຕໍ່ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ໂດຍຜ່ານການຮັກສາບັນດາການຢ້ຽມຢາມ, ພິເສດແມ່ນການພົບປະຂັ້ນສູງ. ທ່ານນາຍົກລັດຖະມົນຕີປາດຖະໜາວ່າ ຝ່າຍ ຍີ່ປຸ່ນ ສືບຕໍ່ເອົາໃຈໃສ່, ໃຫ້ບຸລິມະສິດການລົງທຶນບັນດາໂຄງການສະໜອງພະລັງງານຄື: ໄຟຟ້າພະລັງຄວາມຮ້ອນ, ໄຟຟ້າພະລັງແຮງລົມ, ເຕັກໂນໂລຢີສູງທີ່ບໍ່ສົ່ງມົນລະພິດເຖິງສິ່ງແວດລ້ອມແມ່ນບັນດາຂົງເຂດ ເຊິ່ງ ຫວຽດນາມ ພວມຕ້ອງການພັດທະນາ. ທ່ານນາຍົກລັດຖະມົນຕີກໍ່ສະເໜີທ່ານເອກອັກຄະລັດຖະທູດ ຕັ້ງໜ້າຂົນຂວາຍລັດຖະບານ ແລະ ສະພາແຫ່ງຊາດ ຍີ່ປຸ່ນ ສືບຕໍ່ສະຫງວນ ODA ໃຫ້ ຫວຽດນາມ ໃນໄລຍະຈະມາເຖິງ; ສົ່ງເສີມການເຄື່ອນໄຫວລົງທຶນຂອງບັນດາທ້ອງຖິ່ນ ແລະ ວິສາຫະກິດ ຍີ່ປຸ່ນ ລົງທຶນຮ່ວມມືກັບ ຫວຽດນາມ ໃນຂົງເຂດກະສິກຳເຕັກໂນໂລຢີສູງໃຫ້ຫລາຍກ່ວາອີກ.
ສ່ວນທ່ານ Kunio Umeda ເອກອັກຄະລັດຖະທູດ ຍີ່ປຸ່ນ ປະຈຳ ຫວຽດນາມ ຢືນຢັນວ່າ: ຈະມານະພະຍາຍາມຈົນສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນການຊຸກຍູ້ສາຍພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດ ໃນທຸກຂົງເຂດ ພິເສດແມ່ນເສດຖະກິດ, ການປ້ອງກັນຊາດ ປ້ອງກັນຄວາມສະຫງົບ ແລະ ພົບປະແລກປ່ຽນປະຊາຊົນຢ່າງເລິກເຊິ່ງກ້ວາງຂວາງ.