(vovworld) - ຕອນບ່າຍວັນທີ 24/4, ທີ່ການຕ້ອນຮັບ ທ່ານເອກອັກຄະລັດຖະທູດ ບຣູໄນ ມາຮັບໜ້າທີຢູ່ ຫວຽດນາມ, ທ່ານນາຍົກລັດຖະມົນຕີ ຫງວຽນເຕີ໋ນຢູ້ງ ສະແດງຄວາມເຊື່ອໝັ້ນວ່າໃນອາຍຸການປະຕິບັດງານ, ທ່ານເອກອັກຄະລັດຖະທູດ Pengiran Haji Sahari Bin Pengiran Haji Salleh ຈະສົມທົບຢ່າງແໜ້ນແຟ້ນກັບບັນດາອົງການທີ່ກ່ຽວຂ້ອງຂອງສອງປະເທດແນໃສ່ຮັດແໜ້ນສາຍພົວພັນມິດຕະພາບ ແລະ ຍູ້ແຮງການຮ່ວມມື ຫວຽດນາມ - ບຣູໄນໃຫ້ເຂົ້າສູ່ລວງເລິກ, ນຳຜົນປະໂຫຍດທີ່ແທດຈິງມາໃຫ້ທັງສອງຝ່າຍ, ກໍ່ຄືປະກອບສ່ວນຢ່າງຕັ້ງໜ້າເຂົ້າໃນວິວັດການສ້າງປະຊາຄົມ ອາຊຽນ ທີ່ສາມັກຄີ, ເຂັ້ມແຂງໃນປີ 2015. ທ່ານນາຍົກລັດຖະມົນຕີ ຫງວຽນເຕີ໋ນຢູ້ງ ສະເໜີໃຫ້ສອງຝ່າຍຈັດຕັ້ງຄະນະກຳມະການປະສົມ ຫວຽດນາມ - ບຣູໄນ ໂດຍໄວ ແນໃສ່ຕິດຕາມກວດກາ ແລະ ວາງອອກບັນດາມາດຕະການທີ່ແທດຈິງເພື່ອຂຸດຄົ້ນຄວາມສາມາດບົມຊ້ອມ, ທ່າແຮງໃຫ້ດີກວ່າເພື່ອພ້ອມກັນພັດທະນາ. ທ່ານນາຍົກລັດຖະມົນຕີ ຫງວຽນເຕີ໋ນຢູ້ງ ຢືນຢັນວ່າ ຫວຽດນາມ ພ້ອມແລ້ວຈະສົມທົບກັບ ບຣູໄນ, ມາໄລເຊຍ ແລະ ສິງກະໂປ ຊຸກຍູ້ການເຈລະຈາສັນຍາຄູ່ຮ່ວມມືຂ້າມ ປາຊີຟິກ(TPP) ໃຫ້ສຳເລັດໂດຍໄວ. ທ່ານນາຍົກລັດຖະມົນຕີ ຫງວຽນເຕີ໋ນຢູ້ງ ກໍ່ສະເໜີໃຫ້ ບຣູໄນ ພ້ອມກັບ ຫວຽດນາມ ແລະ ບັນດາປະເທດທີ່ກ່ຽວຂ້ອງສືບຕໍ່ຢືນຢັນຫຼັກໝັ້ນລວມຂອງ ອາຊຽນ ຊຶ່ງສະແດງໃນຖະແຫຼງການກ່ຽວກັບຂໍ້ກຳນົດ 6 ຂໍ້ຂອງ ອາຊຽນ ກ່ຽວກັບທະເລຕາເວັນອອກ; ແກ້ໄຂການພິພາດໂດຍສັນຕິວິໄນ, ເຄົາລົບຕາມກົດໝາຍສາກົນ, ພິເສດແມ່ນສົນທິສັນຍາຂອງ ສປຊ ກ່ຽວກັບກົດໝາຍວ່າດ້ວຍທະເລປີ 1982; ພ້ອມທັງປະຕິບັດຢ່າງຄົບຖ້ວນ ແລະ ເຂັ້ມງວດຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ(DOC) ແລະ ມານະພະຍາຍາມບັນລຸໄດ້ຂະບວນລະບຽບການການປະພຶດຢູ່ທະເລຕາເວັນອອກ(COC).