ທ່ານນາຍົກລັດຖະມົນຕີຫວຽດນາມຕ້ອນຮັບຜູ້ອຳນວຍການໃຫຍ່ສຳນັກຂ່າວສານປະເທດລາວ
ທ່ານນາຍົກລັດຖະມົນຕີ ຫງວຽນຊວນຟຸກ ຕ້ອນຮັບ ທ່ານ ສູນທອງ ຄັນທະວົງ ຜູ້ອຳນວຍການໃຫຍ່ສຳນັກຂ່າວສານປະເທດລາວ
(vovworld) - ທີ່ການຕ້ອນຮັບໃນຕອນບ່າຍວັນທີ 07/12 ຢູ່ສຳນັກງານລັດຖະບານ ຫວຽດນາມ ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ພັກ, ລັດຖະບານ ຫວຽດນາມ ຍາມໃດກໍ່ຖືເປັນສຳຄັນເລື່ອງເພີ່ມພູນຄູນສ້າງສາຍພົວພັນແບບພິເສດລະຫວ່າງ 2 ປະເທດ; ຍາມໃດກໍ່ສ້າງເງື່ອນໄຂສະດວກໃຫ້ບັນດາກະຊວງ, ຂະແໜງການ 2 ປະເທດສຳເລັດໜ້າທີ່ດ້ານການເມືອງເຊິ່ງໄດ້ຮັບມອບໝາຍເປັນຢ່າງດີ; ບັນດາວິສາຫະກິດ 2 ປະເທດສຳເລັດໜ້າທີ່ພັດທະນາເສດຖະກິດ - ສັງຄົມ, ປະກອບສ່ວນປະຕິບັດແນວທາງການຕ່າງປະເທດສະເໝີຕົ້ນສະເໝີປາຍຂອງ 2 ປະເທດໃນການເພີ່ມທະວີສາຍພົວພັນ, ສະໜິດຕິດພັນໄວ້ເນື້ອເຊື່ອໃຈ ແລະ ຮ່ວມມື. ທ່ານນາຍົກລັດຖະມົນຕີ ຕີລາຄາສູງໝາກຜົນແຫ່ງການເຮັດວຽກ, ການຮ່ວມມືລະຫວ່າງ 2 ອົງການສຳນັກຂ່າວສານຂອງ 2 ປະເທດໃນໄລຍະຜ່ານມາ ແລະ ສະເໜີວ່າ ໃນໄລຍະຈະມາເຖິງ 2 ຝ່າຍຄວນສືບຕໍ່ປຶກສາຫາລື, ປັບປຸງ, ເຫັນດີເປັນເອກະພາບແຜນການ, ທິດທາງຮ່ວມມື ເພື່ອນັບມື້ນັບເສີມຂະຫຍາຍບົດບາດ, ໜ້າທີ່ຂອງສຳນັກຂ່າວສານແຕ່ລະປະເທດກ່ວາອີກ ໃນການສະໜອງຂໍ້ມູນຂ່າວໃຫ້ຖືກຕ້ອງ, ທັນການເຖິງສື່ີມວນຊົນແຕ່ລະປະເທດ. ເພີ່ມທະວີວຽກງານໂຄສະນາແນວທາງ, ແຜນນະໂຍບາຍ, ນະໂຍບາຍຂອງ 2 ປະເທດ ເພື່ອໃຫ້ປະຊາຊົນເຂົ້າໃຈ ແລະ ກຳແໜ້ນ; ໂຄສະນາເຜີຍແຜ່ຮູບພາບ ແລະ ການພົວພັນຄວາມສາມັກຄີແບບພິເສດລະຫວ່າງ 2 ປະເທດເຖິງເພື່ອນມິດສາກົນ; ສົມທົບກັນຢ່າງແໜ້ນແຟ້ນໃນການເຄື່ອນໄຫວພົວພັນຕ່າງປະເທດທີ່ບັນດາເວທີປາໄສສາກົນ ແລະ ພາກພື້ນ ເຊິ່ງ 2 ຝ່າຍເປັນສະມາຊິກ ເພື່ອມຸ່ງໄປເຖິງສະພາບຮັບປະກັນໃຫ້ຂໍ້ມູນຂ່າວສານມີຄວາມດຸ່ນດ່ຽງ, ພາວະວິໄສ.