( vovworld ) – ຕອນບ່າຍວັນທີ 27/3, ຢູ່ຮ່າໂນ້ຍ, ທ່ານປະທານປະເທດ Truong Tan Sang ໄດ້ໃຫ້ການຕ້ອນຮັບທ່ານ ຄຳສານ ສຸວົງ ກຳມະການສູນກາງພັກປະຊາຊົນປະຕິວັດລາວ, ຫົວໜ້າອົງການໄອຍະການປະຊາຊົນສູງສຸດຂອງລາວພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທ່ານປະທານປະເທດ Truong Tan Sang ຢືນຢັນວ່າ, ດ້ວຍນ້ຳໃຈສາມັກຄີມິດຕະພາບຖານອ້າຍນ້ອງ, ຫວຽດນາມ ພ້ອມແລ້ວທີ່ຈະໃຫ້ການຊ່ວຍເຫຼືອລາວ ໃນທຸກໆຂົງເຂດ, ໃນນັ້ນຂະແໜງໄອຍະການຫວຽດນາມ ກໍຈະເພີ່ມທະວີການຮ່ວມມືກັບຂະແໜງໄອຍະການລາວ ຫຼາຍກວ່າອີກໃນການບຳລຸງສ້າງພະນັກງານ, ຕໍ່ສູ້ກັບພວກອາດຊະຍາກຳໂດຍສະເພາະແມ່ນອາດຊະຍາກຳຢູ່ຕາມເສັ້ນຊາຍແດນ ແລະ ອາດຊະຍາກຳຂ້າມຊາດ. ທ່ານປະທານປະເທດກໍປາດຖະໜາວ່າ, ສອງຝ່າຍຄວນແລກປ່ຽນບັນດາຄະນະຜູ້ແທນລະຫວ່າງສອງປະເທດ ບໍ່ພຽງແຕ່ຢູ່ຂັ້ນສູນກາງເທົ່ານັ້ນ ຫາກຍັງຢູ່ທຸກໆຂັ້ນອີກດ້ວຍເພື່ອແລກປ່ຽນບົດຮຽນ, ບັນດາຮູບແບບດີເດັ່ນລະຫວ່າງສອງປະເທດ. ທ່ານປະທານປະເທດກໍເນັ້ນໜັກວ່າ ດ້ວຍບົດບາດ, ທີ່ຕັ້ງສຳຄັນຂອງຂະແໜງໄອຍະການ, ສອງຝ່າຍຄວນສົມທົບກັນເພື່ອຮັກສາສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຂອງແຕ່ລະປະເທດ ແລະ ພາກພື້ນຢ່າງແໜ້ນແຟ້ນ.
ສ່ວນທ່ານ ຄຳສານ ສຸວົງ ໃຫ້ຮູ້ວ່າ, ເພື່ອຮັດແໜ້ນສາຍພົວພັນລະຫວ່າງອົງການໄອຍະການລະຫວ່າງສອງປະເທດຍິ່ງກ່ວາອີກ, ສອງຝ່າຍໄດ້ເປັນເອກະພາບນຳກັນໃນ 9 ຂົງເຂດທີ່ສະແດງໃຫ້ເຫັນແຜນນະໂຍບາຍ, ແນວທາງຂອງສອງພັກ, ສອງລັດ, ຜ່ານນັ້ນເພີ່ມທະວີສາຍພົວພັນສາມັກຄີສັດຊື່ບໍລິສຸດລະຫວ່າງຫວຽດນາມ ແລະ ລາວ ໃຫ້ດີຍິ່ງໆຂຶ້ນ.