ທ່ານປະທານາທິບໍດີ Nursultan Nazarbayev ຊົມເຊີຍການມາຢ້ຽມຢາມ ຂອງທ່ານປະທານປະເທດຫວຽດນາມ Truong Tan Sang
( ພາບ: internet)
|
(vovworld) - ພິທີຕ້ອນຮັບທ່ານປະທານປະເທດຫວຽດນາມ Truong Tan Sang ຢ້ຽມຢາມທາງລັດຖະກິດປະເທດ Kazakhstan ຢ່າງເປັນທາງການ ຕາມຄຳເຊື້ອເຊີນຂອງທ່ານປະທານາທິບໍດີ Nursultan Nazarbayev ຖືກຈັດຂຶ້ນຢ່າງສົມກຽດຢູ່ທຳນຽບປະທານາທິບໍດີ Kazakhstan ໃນຕອນເຊົ້າວັນທີ 10/9. ພາຍຫຼັງພິທີ່ຕ້ອນຮັບ, ສອງຝ່າຍໄດ້ດຳເນີນການເຈລະຈາ. ທ່ານປະທານປະເທດ Truong Tan Sang ໄດ້ສະແດງຄວາມປິຕິຊົມຊື່ນຕໍ່ບັນດາຜົນງານດີເດັ່ນກ່ຽວກັບການພັດທະນາເສດຖະກິດ, ສັງຄົມເຊິ່ງ Kazakhstan ບັນລຸໄດ້, ບົດບາດ ແລະ ທີ່ຕັ້ງຂອງ Kazakhstan ຢູ່ພາກພື້ນ ແລະ ສາກົນ ໄດ້ຮັບປັບປຸງ ແລະ ເພີ່ມຂຶ້ນຢ່າງບໍ່ຢຸດຢັ້ງ. ທ່ານປະທານາທິບໍດີ Nursultan Nazarbayev ກໍໄດ້ຕີລາຄາສູງບັນດາຜົນງານສຳຄັນຂອງປະຊາຊົນຫວຽດນາມ ໃນພາລະກິດປ່ຽນໃໝ່ ແລະ ອິດທິຜົນຊື່ສຽງຂອງຫວຽດນາມ ນັບມື້ນັບໄດ້ຮັບການຍົກສູງຂຶ້ນໃນພາກພື້ນ ແລະ ສາກົນ. ທ່ານປະທານາທິບໍດີ Nursultan Nazarbayev ເນັ້ນໜັກວ່າ.
“ Kazakhstan ຖືຫວຽດນາມ ແມ່ນຄູ່ຮ່ວມມືຍຸດທະສາດຢູ່ພາກພື້ນອາຊີ. ການຢ້ຽມຢາມຫວຽດນາມຂອງຂ້າພະເຈົ້າໃນປີ 2011 ແລະ ການຢ້ຽມຢາມ Kazakhstan ຂອງທ່ານປະທານປະເທດ Truong Tan Sang ຄັ້ງນີ້ຈະສ້າງເງື່ອນໄຂເພື່ອໃຫ້ສອງຝ່າຍເພີ່ມທະວີການຮ່ວມມື. ບັນດາຂໍ້ສັນຍາທີ່ໄດ້ຮັບການລົງນານໃນການຢ້ຽມຢາມ ຫວຽດນາມ ຂອງຂ້າພະເຈົ້າໃນຄັ້ງກອນ ກໍຄືບັນດາຂໍ້ສັນຍາເຊິ່ງໄດ້ຮັບການລົງນາມໃນຄັ້ງນີ້ ຈະຊ່ວຍໃຫ້ການພົວພັນສອງຝ່າຍໃກ້ຊິດ ແລະ ເລິກເຊິ່ງກວ່າ”.
ທີ່ການເຈລະຈາ, ສອງຝ່າຍໄດ້ເຫັນດີແລກປ່ຽນຄະນະຜູ້ແທນຂັ້ນຕ່າງໆເປັນປະຈຳ, ໂດຍສະເພາະແມ່ນຄະນະຜູ້ແທນຂັ້ນສູງ. ສອງຝ່າຍໄດ້ຢືນຢັນຈະສືບຕໍ່ປະຕິບັດແຜນການດຳເນີນງານລວມລະຫວ່າງຫວຽດນາມ - Kazakhstan ໄລຍະ 2011 – 2013 ຢ່າງຕັ້ງໜ້າ ແລະ ຮອບດ້ານ; ຮັກສາ ແລະ ຍົກສູງປະສິດທິຜົນການເຄື່ອນໄຫວຂອງຄະນະກຳມາທິການລະຫວ່າງລັດຖະບານຫວຽດນາມ - Kazakhstan ກ່ຽວກັບການຮ່ວມມືໃນຂົງເຂດເສດຖະກິດ, ການຄ້າ ແລະ ວິທະຍາສາດ, ເຕັກນິກ.
ພາຍຫຼັງການເຈລະຈາ, ທ່ານປະທານປະເທດ Truong Tan Sang ແລະ ປະທານາທິບໍດີ Kazakhstan ທ່ານ Nursultan Nazarbayev ໄດ້ພົບປະກັບວົງການນັກຂ່າວ. ທ່ານປະທານປະເທດ Truong Tan Sang ຢືນຢັນວ່າ :
“ພວກຂ້າພະເຈົ້າຢືນຢັນຄວາມຫວັງ ແລະ ຄວາມຕັດສິນໃຈຂອງການນຳ ແລະ ປະຊາຊົນຫວຽດນາມ, ນຳການພົວພັນລະຫວ່າງ 2 ປະເທດໃຫ້ຂຶ້ນສູ່ລະດັບສູງໃໝ່, ເປັນເອກະສັນກັນສືບຕໍ່ເພີ່ມທະວີການສົນທະນາທີ່ໄວ້ເນື້ອເຊື່ອໃຈ, ສ້າງກຳລັງໜູນຊຸກຍູ້ການຮ່ວມມືໃນທຸກຂົງເຂດ, ເປັນຕົ້ນແມ່ນເສດຖະກິດ, ການຄ້າ ແລະ ການລົງທຶນ. ຂ້າພະເຈົ້າເຊື່ອແນວ່າ ການຮ່ວມມືຢ່າງມີປະສິດທິຜົນລະຫວ່າງ 2 ປະເທດພວກເຮົາຈະປະກອບສ່ວນປະຕິບັດບັນດາໜ້າທີ່ທີ່ໄດ້ວາງອອກຢ່າງມີໄຊ ”
ເນື່ອງໃນໂອກາດນີ້, ທ່ານປະທານປະເທດ Truong Tan Sang ແລະ ປະທານາທິບໍດີ Kazakhstan ທ່ານ Nursultan Nazarbayev ໄດ້ເປັນສັກຂີພິຍານພິທີລົງນາມໃນສັນຍາລະຫວ່າງ ລັດຖະບານ 2 ປະເທດໃນຂົງເຂດກັກກັນພືດ; ສັນຍາກ່ຽວກັບການຂົນສົ່ງທາງອາກາດຜ່ານເຂດນາ່ນຟ້າຂອງ 2 ປະເທດ ແລະ ອ່ືນໆ. ແລະເນື່ອງໃນໂອກາດນີ້, ວັນທີ 10/9, 2 ຝ່າຍໄດ້ອອກຖະແຫຼງການຮ່ວມ. 2 ຝ່າຍໄດ້ຕີລາຄາສູງບັນດາຜົນງານໃນການຮ່ວມມືລະຫວ່າງ 2 ປະເທດໃນ 20 ປີທີ່ຜ່ານມານັບແຕ່ 2 ປະເທດໄດ້ສ້າງຕັ້ງການພົວພັນທາງການທູດ ແລະ ຢືນຢັນຄວາມຕັດສິນໃຈສືບຕໍ່ຊຸກຍູ້ການພົວພັນຮ່ວມມືໃຫ້ດີຍິ່ງໆຂຶ້ນແນໃສ່ນຳການພົວພັນໃຫ້ຂຶ້ນສູ່ລະດັບສູງໃໝ່.