(vovworld) - ຕອນເຊົ້າວັນທີ 9/2, ທ່ານປະທານປະເທດຫວຽດນາມ ເຈືອງເຕີນຊາງ ແລະ ພັນລະຍາພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ເດີນທາງໄປຮອດນະຄອນຫຼວງວຽງຈັນ ເລີ່ມຕົ້ນການຢ້ຽມຢາມ ສປປ ລາວ ຢ່າງເປັນທາງການ ຕາມຄຳເຊື້ອເຊີນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດ ລາວ, ປະທານປະເທດ ສປປ ລາວ ຈຸມມາລີ ໄຊຍະສອນ. ພາຍຫຼັງພິທີຕ້ອນຮັບຢ່າງສົມກຽດທີ່ສຳນັກງານປະທານປະເທດ, ທ່ານປະທານປະເທດ ເຈືອງເຕີນຊາງ ແລະ ທ່ານປະທານປະເທດ ລາວ ຈຸມມາລີ ໄຊຍະສອນ ໄດ້ນຳໜ້າຄະນະຜູ້ແທນຂັ້ນສູງ 2 ປະເທດດຳເນີນການເຈລະຈາ. ທີ່ການເຈລະຈາ, ທ່ານປະທານປະເທດ ເຈືອງເຕີນຊາງໄດ້ສະແດງຄວາມພາກພູມໃຈເພາະວ່ານີ້ເປັນຄັ້ງທຳອິດທີ່ໄດ້ໄປຢ້ຽມ ຢາມ ສປປ ລາວ ໃນຖານະເປັນປະທານປະເທດຫວຽດນາມ, ພ້ອມກັນນັ້ນກໍ່ສະແດງຄວາມເຊື່ອໝັ້ນວ່າ ສປປ ລາວ ຈະສືບຕໍ່ບັນລຸໄດ້ຜົນງານອັນໃຫຍ່ຫຼວງຫຼາຍຢ່າງໃນວຽກງານປັບປຸງຊີວິດການເປັນຢູ່ຂອງປະຊາຊົນ, ສ້າງສາປະເທດຊາດ, ຍົກສູງທີ່ຕັ້ງບົດບາດ ຢູ່ພາກພື້ນ ແລະ ຢູ່ໃນໂລກກ່ວາອີກ.
ທີ່ການພົບປະກັບວົງການນັກຂ່າວພາຍຫຼັງການເຈລະຈາ, ທ່ານປະທານປະເທດ ເຈືອງເຕີນຊາງ ສະແດງຄວາມຫວັງຢາກຊຸກຍູ້ສາຍພົວພັນມິດຕະພາບແບບພິເສດລະຫວ່າງ 2 ປະເທດໃນອະນາຄົດກ່ວາອີກ. ທ່ານປະທານປະເທດ ເຈືອງເຕີນຊາງ ເວົ້າວ່າ:
“2 ຝ່າຍຕີລາຄາສູງ ແລະພາກພູມໃຈເມື່ອເຫັນວ່າ: ສາຍພົວພັນທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດໃນໄລຍະຜ່ານມາ ໄດ້ຮັບການປັງປຸງ ແລະ ເພີ່ມທະວີຢ່າງບໍ່ຢຸດຢັ້ງ ແລະ ທັງ 2 ຝ່າຍໄດ້ປຶກສາຫາລືບັນດາມາດຕະການເພື່ອແນໃສ່ເພີ່ມທະວີສາຍພົວພັນອັນດີງາມນີ້ໃນທຸກໆຂົງເຂດກ່ວາອີກ. 2 ຝ່າຍໄດ້ເຫັນດີເປັນເອກະສັນນຳກັນຜັນຂະຫຍາຍວຽກງານເຜີຍແຜ່, ໂຄສະນາ ກ່ຽວກັບປະຫວັດສາດແຫ່ງການພົວພັນແບບພິເສດ ຫວຽດນາມ - ລາວ ແລະ ສົມທົບກັນຈັດຕັ້ງບັນດາການເຄື່ອນໄຫວສະເຫຼີມສະຫຼອງໃນປີ 2012 ໃຫ້ສຳເລັດຜົນ. ຂ້າພະເຈົ້າເຊື່ຶອໝັ້ນວ່າ: ເລື່ອງຈັດຕັ້ງເຫດການນີ້ສຳເລັດຜົນ ຈະເປັນຂີດໝາຍແຫ່ງການພັດທະນາບຸກທະລຸຂອງສາຍພົວພັນແບບພິເສດລະຫວ່າງ ຫວຽດນາມ - ລາວ.”
ທ່ານປະທານປະເທດ ເຈືອງເຕີນຊາງ ແລະ ທ່ານເລຂາທິການໃຫຍ່, ປະທານປະເທດ ສປປ ລາວ ຈຸມມາລີ ໄຊຍະສອນ ໄດ້ເປັນສັກຂີພິຍານພິທີລົງນາມໃນອະນຸສັນຍາ ກ່ຽວກັບການຮ່ວມມືບຳລຸງສ້າງແຫຼ່ງຊັບພະຍາກອນມະນຸດໃຫ້ແກ່ ສປປ ລາວ ຢູ່ຫວຽດນາມ, ແຜນການຮ່ວມມືປີ 2012 ລະຫວ່າງ ກະຊວງສຶກສາບຳລຸງສ້າງຫວຽດນາມ ແລະ ກະຊວງສຶກສາທິການລາວ, ບົດບັນທຶກຊ່ວຍຈຳກ່ຽວກັບເລື່ອງທະນາຄານ Vietin Bank ສະໜອງສິນເຊື່ອໃຫ້ແກ່ທະນາຄານສູນກາງລາວ...
ກໍ່ໃນຕອນເຊົ້າວັນດຽວກັນ, ທ່ານປະທານປະເທດ ເຈືອງເຕີນຊາງ ໄດ້ມີການເຈລະຈາກັບ ນາຍົກລັດຖະມົນຕີ ລາວ ທອງສິງ ທຳມະວົງ, ເຈລະຈາກັບທ່ານນາງປະທານສະພາແຫ່ງຊາດ ປານີ ຢາທໍຕຸ ແລະ ໄປວາງພວງມາລາຢູ່ອະນຸສາວະລີນັກຮົບນິລະນາມ.
ເນື່ອງໃນໂອກາດນີ້ຫນັງສືພິມທັງໝົດຂອງລາວ ສະບັບອອກວັນທີ 9/2 ລ້ວນແຕ່ ລົງພິມໃນຫນ້າທຳອິດ ຮູບພາບ ແລະ ປະຫວັດຫຍໍ້ຂອງທ່ານປະທານ ປະເທດຫວຽດນາມ ເຈືອງເຕີນຊາງ. ບົດນຳຂອງ ຫນັງສືພິມປະຊາຊົນ ລາວ ຊີ້ແຈງວ່າ: ປະຊາຊົນລາວບັນດາເຜົ່າ ມີຄວາມປິຕິຊົມຊື່ນ ແລະ ເອກອ້າງທະນົງໃຈໄດ້ຮັບການຕ້ອນຮັບທ່ານປະທານປະເທດຫວຽດນາມ ເຈືອງເຕີນຊາງ ແລະ ຄະນະຜູ້ແທນຫວຽດນາມ. ການຢ້ຽມຢາມແມ່ນສະແດງໃຫ້ເຫັນຄວາມສາມັກຄີມິດຕະພາບອັນຍິ່ງໃຫຍ່ຂອງປະຊາຊົນຫວຽດນາມ ທ່ີສະຫງວນໃຫ້ແກ່ປະຊາຊົນລາວອ້າຍນອ້ງ. ການພົວພັນມິດຕະພາບທີ່ເປັນມູນເຊື້ອ ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ລາວ ຫວຽດນາມ ກາຍເປັນຊັບສົມບັດອັນລ້ຳຄ່າ ແຫ່ງການຄົງຕົວ ແລະ ພັດທະນາຂອງສອງຊາດ. ສາຍພົວພັນນີ້ ນັບກໍແມ່ນປະຖົມປັດໃຈຕັດສິນຊີ້ຂາດໄຊຊະນະຂອງແຕ່ລະປະເທດ ແລະ ພວມໄດ້ຮັບການເພີ່ມທະວີ ພັດທະນາ ແລະ ແຕກດອກອອກຜົນໃນທຸກຂົງເຂດຢ່າງບໍ່ຢຸດຢັ້ງ. ໃນຂະນະນັ້ນ ຫນັງສືພິມອື່ນຫລາຍສະບັບ ກໍລົງພິມບົດນຳໂດຍແນະນຳກ່ຽວກັບປະເທດຊາດ, ຊາວ ຫວຽດນາມ ກໍຄືການພັດທະນາຂອງຫວຽດນາມໃນຫລາຍຂົງເຂດ.
ໃນວັນດຽວກັນ, ທ່ານປະທານປະເທດ ເຈືອງເຕີນຊາງ ໄດ້ໃຫ້ການຕ້ອນຮັບປະທານສະມາຄົມມິດຕະພາບ ລາວ ຫວຽດນາມ, ປະທານ ແນວລາວສ້າງຊາດ ແລະ ການນຳແຂວງ ຫລວງພະບາງ, ກໍ່ຄືໄປຢ້ຽມຢາມນັກປະຕິວັດຜູ້ອະວຸໂສຈຳນວນຫນຶ່ງ. ທ່ານປະທານປະເທດ ເຈືອງເຕີນຊາງ ກໍ່ໄດ້ເຂົ້າຮ່ວມພິທີເປີດສະຫລອງໂຄງການຈຳນວນຫນຶ່ງຢູ່ນະຄອນຫລວງ ວຽງຈັນ. ຕອນຄ່ຳວັນດຽວກັນ, ທ່ານປະທານປະເທດ ເຈືອງເຕີນຊາງ ໄດ້ເຂົ້າຮ່ວມງານລ້ຽງໂດຍທ່ານເລຂາທິການໃຫຍ່, ປະທານປະເທດລາວ ຈຸມມະລີ ໄຊຍະສອນ ຈັດຕັ້ງ ເພື່ອຮອງຮັບຄະນະຜູ້ແທນຂັ້ນສູງຫວຽດນາມ.