ພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດ
ຊາດເປັນເອກະພາບ ຢູ່ແຂວງ ລອງອານ
(ພາບ: qdnd.vn)
|
(vovworld) - ຕອນເຊົ້າວັນທີ 29/4, ແຂວງລອງອານໄດ້ຈັດພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ. ກ່າວຄວາມເຫັນທີ່ພິທີສະເຫຼີມສະຫຼອງ, ທ່ານປະທານປະເທດ ເຈືອງເຕິ໋ນຊາງເນັ້ນໜັກວ່າ, 40 ປີໄດ້ຜ່ານພົ້ນໄປ, ປະຈຸບັນໂລກ ແລະ ພາກພື້ນໄດ້ມີການປ່ຽນແປງຢ່າງໃຫຍ່ຫຼວງ, ສະພາບການຜັນແປໄປຢ່າງສັບສົນ, ພິເສດແມ່ນການຂັດແຍ້ງອະທິປະໄຕເກາະທະເລຢູ່ທະເລຕາເວັນອອກຢ່າງຂ້ຽວຂາດ, ບັນດາອິດທິກຳລັງທີ່ເປັນປໍລະປັກພວມຍູ້ແຮງການຫັນປ່ຽນໂດຍສັນຕິ, ກໍ່ຄວາມຈາລະຈົນ, ໂຄ່ນລົ້ມ, ກໍ່ຄວາມຂາດສະຖຽນລະພາບດ້ານການເມືອງ, ສັງຄົມ. ຕາມທ່ານປະທານປະເທດ, ເພື່ອກໍ່ສ້າງ ແລະ ປົກປັກຮັກສາປະເທດຫວຽດນາມສັງຄົມນິຍົມ, ຮຽກຮ້ອງໃຫ້ທົ່ວພັກ, ທົ່ວກອງທັບ ແລະ ທົ່ວປວງຊົນຕ້ອງມີຄວາມມານະພະຍາຍາມຢ່າງສູງສຸດ ມີນຳ້ໃຈບຸກໂຈມຕີຂອງມະຫາໄຊລະດູບານໃໝ່ 1975 ເພື່ອປະຕິບັດໜ້າທີ່ຂອງປະເທດຊາດໃນໄລຍະໃໝ່ຢ່າງມີໄຊ.
“ພະນັກງານ, ສະມາຊິກພັກແຕ່ລະຄົນ, ຕ້ອງປະຕິບັດຕາມແບບຢ່າງຂອງປະຊາຊົນ, ສະຫາຍ, ນັກຮົບທີ່ໄດ້ເສຍສະຫຼະຊີວິດເພື່ອເອກະລາດ, ເສລີພາບຂອງປະເທດຊາດ, ຖືຜົນປະໂຫຍດຂອງພັກ, ຂອງປະເທດຊາດສູງກວ່າຜົນປະໂຫຍດສ່ວນຕົວ. ຊາວຫວຽດນາມທັງຢູ່ພາຍໃນ ແລະ ຕ່າງປະເທດຕ້ອງພ້ອມກັນສາມັກຄີ, ຮ່ວມແຮງຮ່ວມໃຈ ກໍ່ສ້າງປະເທດຫວຽດນາມໃຫ້ຮັ່ງມີ, ເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ, ຮຽງບ່າຮຽງໄຫຼ່ພ້ອມກັບເພື່ອນມິດສາກົນ ແລະ ປົກປັກຮັກສາເອກະລາດ, ອະທິປະໄຕ, ເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດໄວ້“.