ທ່ານປະທານປະເທດ ຫວຽດນາມ ເຈີ່ນດ້າຍກວາງ
ຕ້ອນຮັບທ່ານ Fumio Kishida
(ພາບ: TTXVN)
(vovworld) - ທີ່ການຕ້ອນຮັບທ່ານ Fumio Kishida ລັດຖະມົນຕີວ່າການກະຊວງການຕ່າງປະເທດ ຍີ່ປຸ່ນ ໃນຕອນເຊົ້າວັນທີ 06/05, ຢູ່ສຳນັກງານປະທານປະເທດ, ທ່ານປະທານປະເທດ ຫວຽດນາມ ເຈີ່ນດ້າຍກວາງ ເນັ້ນໜັກວ່າ: ຫວຽດນາມ ແລະ ຍີ່ປຸ່ນ ມີຜົນປະໂຫຍດຍຸດທະສາດຄ້າຍຄືກັນ ຫລາຍຢ່າງ ແລະ ບັນດາຄວາມເອົາໃຈໃສ່ລວມນັບທັງໃນການຮ່ວມມື 2 ຝ່າຍ ແລະ ຫລາຍຝ່າຍ. ການພັດທະນາສາຍພົວພັນລະຫວ່າງ 2 ປະເທດເໝາະສົມກັບຜົນປະໂຫຍດ ແລະ ຄວາມມຸ່ງມາດປາດຖະໜາຂອງປະຊາຊົນ 2 ປະເທດຊາດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ. ທ່ານປະທານປະເທດ ຢືນຢັນວ່າ: ແນວທາງການຕ່າງປະເທດທີ່ສະເໝີຕົ້ນສະເໝີປາຍຂອງ ຫວຽດນາມ ແມ່ນສືບຕໍ່ຖື ຍີ່ປຸ່ນ ເປັນຄູ່ຮ່ວມມືສຳຄັນແຖວໜ້າ ແລະ ຍາວນານຂອງ ຫວຽດນາມ. ທ່ານປະທານປະເທດ ເຈີ່ນດ້າຍກວາງ ສະເໜີ ຍີ່ປຸ່ນ ສືບຕໍ່ໜູນຊ່ວຍ ຫວຽດນາມ ຍົກສູງຄວາມສາມາດໃຫ້ກຳລັງປຕິບັດກົດໝາຍບົນທະເລ, ຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ໜູນຊ່ວຍທຶນ ODA, ກະສິກຳ ແລະ ການຮັບມືກັບການປ່ຽນແປງຂອງດິນຟ້າອາກາດ…ທ່ານປະທານປະເທດ ສະເໜີ 2 ຝ່າຍຮ່ວມມືຢ່າງແໜ້ນແຟ້ນກ່ວາອີກ ໃນບັນດາເວທີປາໄສສາກົນ ແລະ ພາກພື້ນກ່ຽວກັບບັນດາບັນຫາ ຊຶ່ງຕ່າງຝ່າຍຕ່າງມີຄວາມສົນໃຈ, ສະເໜີ ຍີ່ປຸ່ນ ສະໜັບສະໜູນ ຫວຽດນາມ ກາຍເປັນ ກຳມະການບໍ່ປະຈຳສະພາໝັ້ນຄົງສະຫະປະຊາຊາດອາຍຸການ 2020 – 2021.
ສ່ວນທ່ານລັດຖະມົນຕີວ່າການກະຊວງການຕ່າງປະເທດ ຍີ່ປຸ່ນ Fumio Kishida ຢືນຢັນຫຼັກໝັ້ນຂອງຍີ່ປຸ່ນ ຍາມໃດກໍ່ຖືເປັນສຳຄັນການພົວພັນຮ່ວມມືກັບ ຫວຽດນາມ, ໃນນັ້ນມີບັນດາບັນຫາພາກພື້ນ ແລະ ສາກົນທີ່ຕ່າງຝ່າຍຕ່າງມີຄວາມສົນໃຈ. ທ່ານ Fumio Kishida ເນັ້ນໜັກວ່າ: ຍີ່ປຸ່ນ ສະໜັບສະໜູນຢ່າງແຂງແຮງເລື່ອງແກ້ໄຂບັນດາການຂັດແຍ້ງກັນດ້ວຍມາດຕະການໂດຍສັນຕິວິທີ ບົນພື້ນຖານກົດໝາຍສາກົນ, ພິເສດແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ຖະແຫຼງການກ່ຽວກັບການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ແລະ ສ້າງປະມວນຂໍ້ກຳນົດການປະພຶດຢູ່ທະເລຕາເວັນອອກໂດຍໄວ (COC)