ທ່ານປະທານາທິບໍດີ ອາເມລິກາ Brack Obama ແລະ
ທ່ານປະທານປະເທດ ເຈີນດ້າຍກວາງ ທີ່ການປະຊຸມຂ່າວ
|
(vovworld)- ຕອນເຊົ້າວັນທີ 23/5, ພາຍຫລັງພິທີຕ້ອນຮັບທ່ານປະທານາທິບໍດີ ອາເມລິກາ Brack Obama ທີ່ຖືກຈັດຂຶ້ນຢ່າງສົມກຽດ ຢູ່ ຮ່າໂນ້ຍ, ທ່ານປະທານປະເທດ ເຈີນດ້າຍກວາງ ແລະ ປະທານາທິບໍດີ Brack Obama ໄດ້ເປັນປະທານການປະຊຸມຂ່າວ ໂດຍມີການເຂົ້າຮ່ວມຂອງນັກຂ່າວພາຍໃນປະເທດ ແລະ ສາກົນນັບຮ້ອຍໆຄົນ.
ກ່າວຄຳເຫັນທີ່ການປະຊຸມຂ່າວ, ທ່ານປະທານປະເທດ ເຈີນດ້າຍກວາງ ໃຫ້ຮູ້ວ່າ: ສອງຝ່າຍໄດ້ແລກປ່ຽນການປະຕິບັດຖະແຫລງການຮ່ວມກ່ຽວກັບການພົວພັນຄູ່ຮ່ວມມືຮອບດ້ານຫວຽດນາມ ແລະ ອາເມລິກາ ເມື່ອເດືອນ 7/2013 ແລະ ຖະແຫລງການກ່ຽວກັບວິໄສທັດລວມ ຫວຽດນາມ ແລະ ອາເມລິກາ ເມື່ອເດືອນ 7/2015 ຂອງການນຳຂັ້ນສູງສອງປະເທດ. ໃນການຢ້ຽມຢາມຫວຽດນາມ ຢ່າງເປັນທາງການຄັ້ງນີ້ຂອງທ່ານປະທານາທິບໍດີ ອາເມລິກາ Brack Obama, ຫວຽດນາມ ແລະ ອາເມລິກາ ໄດ້ອອກຖະແຫລງການຮ່ວມເຫັນດີເພີ່ມທະວີການພົວພັນຄູ່ຮ່ວມມືຮອບດ້ານຕາມທິດແທດຈິງ, ເລິກເຊິ່ງ ແລະ ມີປະສິດທິຜົນກວ່າ. ສອງຝ່າຍເຫັນດີ ຈະໃຫ້ບຸລິມະສິດການແກ້ໄຂຜົນຮ້າຍຢ້ອນຫລັງຈາກສົງຄາມຫລາຍກວ່າ ແລະ ໝັ້ນໝາຍຈະສືບຕໍ່ຮ່ວມມືຢ່າງຕັ້ງຫນ້າໃນບັນຫານີ້. ກ່ຽວກັບບັນຫາພາກພື້ນ ແລະ ໂລກ, ທ່ານປະທານປະເທດ ເຈີນດ້າຍກວາງ ໄດ້ແຈ້ງໃຫ້ຊາບວ່າ: ສອງຝ່າຍເຫັນດີສືບຕໍ່ເພີ່ມທະວີການປະສານສົມທົບທີ່ບັນດາເວທີປາໄສພາກພື້ນ ແລະ ສາກົນ, ຝ່າຍ ອາເມລິກາ ຫນູນຊ່ວຍຫວຽດນາມ ຈັດຕັ້ງກອງປະຊຸມສຸດຍອດ APEC 2017 ສຳເລັດຜົນ, ເຂົ້າຮ່ວມກຳລັງຮັກສາສັນຕິພາບ ສປຊ. ສອງຝ່າຍ ກໍແລກປ່ຽນກ່ຽວກັບສະພາບການທະເລຕາເວັນອອກໃນໄລຍະມໍ່ໆມານີ້, ຢືນຢັນ ສືບຕໍ່ຮ່ວມມືແກ້ໄຂບັນຫາການປ່ຽນແປງຂອງດິນຟ້າອາກາດ, ນຳໃຊ້ແຫລ່ງນ້ຳແມ່ນ້ຳຂອງແບບຍືນຍົງ. ທ່ານປະທານປະເທດ ເຈີນດ້າຍກວາງ, ໃຫ້ຮູ້ວ່າ:
“ສອງຝ່າຍແບ່ງປັນໃນທຸກຂົງເຂດ ນັບທັງສອງຝ່າຍ ແລະ ຫລາຍຝ່າຍ, ຄວາມເອົາໃຈໃສ່ລວມ ແລະ ຜົນປະໂຫຍດຂອງທັງສອງປະເທດ, ພິເສດ ການຮັກສາສັນຕິພາບ, ການຮ່ວມມືພັດທະນາໃນພາກພື້ນ. ບັນດາບາດກ້າວຄືບຫນ້າຊື່ງສອງປະເທດບັນລຸໄດ້ ແມ່ນເລີ່ມມາຈາກຄວາມຈິງ, ສອງຝ່າຍຈະປະຕິບັດຄຳໝັ້ນສັນຍາ, ເຄົາລົບເອກະລາດ, ອະທິປະໄຕ, ລະບອບການເມືອງ ແລະ ຜົນປະໂຫຍດອັນຊອບທຳຂອງກັນ. ການຢ້ຽມຢາມ ຫວຽດນາມ ຄັ້ງນີ້ຂອງທ່ານປະທານາທິບໍດີ Brack Obama ຈະສ້າງກຳລັງຫນູນໃຫມ່ໃຫ້ແກ່ການພັດທະນາການພົວພັນຫວຽດນາມ - ອາເມລິກາ ໃນໄລຍະຈະມາເຖິງ, ປະກອບສ່ວນຢ່າງຕັ້ງຫນ້າເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມືພັດທະນາຢູ່ພາກພື້ນ ອາຊີ ປາຊີຟີກ ແລະ ໃນໂລກ.
ທ່ານປະທານນາທິບໍດີ Barack Obama ໃຫ້ຮູ້ວ່າ, ບຸລິມະສິດສູງສຸດໃນປະຈຸບັນຂອງອາເມລິກາ ແມ່ນສວມບົດບາດໃຫຍ່ຫຼວງ ແລະ ຍາວນານກວ່າຢູ່ພາກພື້ນອາຊີ - ປາຊີຟິກ, ໃນນັ້ນມີການພົວພັນຄູ່ຮ່ວມມືຮອບດ້ານກັບຫວຽດນາມ. ໃນການຢ້ຽມຢາມຄັ້ງນີ້ 2 ຝ່າຍໄດ້ເປັນເອກະພາບນຳກັນຫຼາຍມາດຕະການເພີ່ມທະວີໃນທຸກຂົງເຂດ, ພິເສດແມ່ນສັນຍາຄູ່ຮ່ວມມືຂ້າມປາຊີຟິກ (TPP) ເພື່ອແນໃສ່ໜູນຊ່ວຍຫວຽດນາມ ເຊື່ອມໂຍງກັບທົ່ວໂລກໃຫ້ດີກວ່າ, ນຳມາເຊິ່ງຜົນປະໂຫຍດໃຫ້ທັງ 2 ປະເທດ. ທ່ານປະທານນາທິບໍດີ Barack Obama ຢັ້ງຢືນວ່າ, ອາເມລິກາ ໄດ້ຍົກເລິກຄຳສັ່ງຂວ້ຳບາດດ້ານອາວຸດສຳລັບຫວຽດນາມ.
“ອາເມລິກາ ໄດ້ຍົກເລິກຄຳສັ່ງຂວ້ຳບາດດ້ານອາວຸດສຳລັບຫວຽດນາມ ເຊິ່ງຄົງຕົວເປັນເວລາ 50 ປີ. ສິ່ງນີ້ໄດ້ຮັບປະກັນໃຫ້ຫວຽດນາມ ສາມາດສຳພັດກັບບັນດາເຄື່ອງອຸປະກອນທີ່ຈຳເປັນເພື່ອປ້ອງກັນຕົນເອງ. ພ້ອມທັງປະລະບັນດາຜົນຮ້າຍຍ້ອນຫຼັງຈາກສົງຄາວເຢັນ, ນັ້ນກໍແມ່ນການເພີ່ມທະວີຄຳໝັ້ນສັນຍາຂອງອາເມລິກາ ເພື່ອຫັນການພົບພັນເປັນປົກກະຕິ ລວມທັງການພົວພັນດ້ານປ້ອງກັນຊາດກັບຫວຽດນາມ ແລະ ພາກພື້ນ”.
ເຕື້ອງເຖິງບັນຫາສິດທິມະນຸດ, ທ່ານປະທານນາທິບໍດີ Barack Obama ຖືວ່າ, 2 ຝ່າຍຍັງມີຄວາມເຫັນແຕກຕ່າງກັນໃນບາງບັນຫາ, ແຕ່ກໍບັນລຸໄດ້ຄວາມກ້າວໜ້າຫຼາຍຢ່າງ.
ພາຍຫຼັງການເຈລະຈາ, ການນຳ 2 ທ່ານໄດ້ເປັນສັກຂີພິຍານພິທີລົງນາມໃນບັນດາເອກະສານດ້ານເສດຖະກິດທີ່ມີມູນຄ່າສູງລະຫວ່າງວິສາຫະກິດ 2 ປະເທດ.