(vovworld)- ຕອນຄຳ່ວັນທີ 26/7 ຕາມເວລານິວຢອກ, ທ່ານປະທານປະເທດຫວຽດນາມ ເຈືອງເຕີນຊາງ ແລະ ຄະນະຜູ້ແທນຂັ້ນສູງຫວຽດນາມ ໄດ້ເດີນທາງອອກຈາກ ນິວຢອກ ກັບຄືນເມືອປະເທດສິ້ນສຸດການຢ້ຽມຢາມ ອາເມລິກາ ຢ່າງເປັນທາງການ ຕາມຄຳເຊີນຂອງທ່ານປະທານາທິບໍດີ ອາເມລິກາ Barack Obama.
ທ່ານປະທານປະເທດເຈືອງເຕີນຊາງ ພົບປະກັບ
ທ່ານເລຂາທິການໃຫຍ່ ສປຊ Bankimoon
|
ໃນຂອບເຂດການຢ້ຽມຢາມ, ທ່ານປະທານປະເທດເຈືອງເຕີນຊາງ ໄດ້ພົບປະກັບທ່ານເລຂາທິການໃຫຍ່ ສປຊ Bankimoon. ນະທີ່ນີ້ ທ່ານ Bankimoon ໄດ້ຕີລາຄາສູງບັນດາຜົນງານຂອງຫວຽດນາມໃນການພັດທະນາເສດຖະກິດສັງຄົມ, ປະກອບສ່ວນຕັ້ງຫນ້າເຂົ້າໃນສະຖຽນລະພາບ ແລະ ການພັດທະນາຂອງພາກພື້ນ ແລະ ໂລກ. ທ່ານປະທານປະເທດເຈືອງເຕີນຊາງ ຢືນຢັນ: ຫວຽດນາມ ຖືເປັນສຳຄັນບົດບາດນັບມື້ນັບໃຫຍ່ຫລວງຂອງ ສປຊ ແລະ ມີບົດບາດທີ່ຕັ້ງສຳຄັນໃນນະໂຍບາຍການຕ່າງປະເທດຂອງຫວຽດນາມ.
ກ່ອນຫນ້ານັ້ນ,ທ່ານປະທານປະເທດເຈືອງເຕີນຊາງ ໄດ້ພົບປະກັບບັນດານັກຄົ້ນຄ້ວາເສດຖະກິດອາເມລິກາ, ຄູອາຈານ, ນັກຮົບເກົ່າສອງປະເທດ, ເພື່ອນມິດອາເມລິກາ ແລະ ວົງຄະນາຍາດຊາວຫວຽດນາມ ອາໄສຢູ່ ອາເມລິກາ. ທີ່ການພົບປະນັ້ນ, ທ່ານປະທານປະເທດເຈືອງເຕີນຊາງ ໄດ້ແບ່ງປັນຄວາມເອົາໃຈໃສ່, ຊົມເຊີຍບັນດາຄວາມມານະພະຍາຍາມ ແລະ ໝາກຜົນການເຄື່ອນໄຫວຂອງປະຊາຄົມການສຶກສາອາເມລິກາ, ນັກຮົບເກົ່າສອງປະເທດ,ເພື່ອນມິດອາເມລິກາ ແລະ ວົງຄະນາຍາດຊາວຫວຽດນາມ ອາໄສຢູ່ ອາເມລິກາ ພ້ອມທັງສະແດງຄວາມປາດຖະຫນາຢາກໃຫ້ສອງຝ່າຍສືບຕໍ່ເພີ່ມທະວີການຮ່ວມມືຫລາຍດ້ານ ແລະ ເລິກເຊິ່ງ, ປະກອບສ່ວນຢ່າງຕັ້ງຫນ້າເຂົ້າໃນວິວັດທະນາການຮ່ວມມືຮອບດ້ານລະຫວ່າງ ຫວຽດນາມ ແລະ ອາເມລິກາ ກໍຄືນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ສອງປະເທດ ແລະ ພາກພື້ນ.
ກ່ອນຫນ້ານັ້ນ ຕອນຄຳ່ວັນທີ 25/7, ທ່ານປະທານປະເທດເຈືອງເຕີນຊາງ ໄດ້ຕ້ອນຮັບຄອບຄົວອະດີດປະທານາທິບໍດີ Bill Clinton. ທ່ານປະທານປະເທດເຈືອງເຕີນຊາງ ຕີລາຄາສູງ ບັນດາການປະກອບສ່ວນຂອງອະດີດປະທານາທິບໍດີ Bill Clinton ແລະ ອະດີດລັດຖະມົນຕີການຕ່າງປະເທດ ອາເມລິກາ ທ່ານນາງ Hilari Clinton ທີ່ມີຕໍ່ການພັດທະນາສາຍພົວພັນລະຫວ່າງ ຫວຽດນາມ ແລະ ອາເມລິກາ.