ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕ້ອນຮັບຄະນະຜູ້ແທນຂັ້ນສູງສະພາແຫ່ງຊາດ ສປປ ລາວ
(ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕ້ອນຮັບ
ທ່ານ ສົມພັນ ແພງຄຳມີ, ກຳມະການສູນກາງພັກ, ຮອງປະທານສະພາແຫ່ງຊາດ ລາວ)
(vovworld) - ຕອນບ່າຍວັນທີ 11/3, ທີ່ສຳນັກງານຫ້ອງວ່າການສະພາແຫ່ງຊາດ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕ້ອນຮັບຄະນະຜູ້ແທນຂັ້ນສູງສະພາແຫ່ງຊາດ ສປປ ລາວ ໂດຍທ່ານ ສົມພັນ ແພງຄຳມີ, ກຳມະການສູນກາງພັກ, ຮອງປະທານສະພາແຫ່ງຊາດ ລາວ, ເປັນຫົວໜ້າຄະນະ, ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ຢືນຢັນວ່າ ຫວຽດນາມ ຍາມໃດກໍ່ຖືເປັນສຳຄັນ ແລະ ໃຫ້ບຸລິມະສິດສູງສຸດໃຫ້ແກ່ການປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບ ສປປ ລາວ. ສະພາແຫ່ງຊາດ ຫວຽດນາມ ຈະຍູ້ແຮງວຽກງານຕິດຕາມກວດກາ, ຊຸກຍູ້ລັດຖະບານໃນການຊີ້ນຳບັນດາກະຊວງ, ຂະແໜງການທ້ອງຖິ່ນຕ່າງໆເພີ່ມທະວີການຮ່ວມມືທາງດ້ານເສດຖະກິດ, ການສຶກສາ - ບຳລຸງສ້າງ, ການປ້ອງກັນຊາດ - ປ້ອງກັນຄວາມສະຫງົບ ກັບ ສປປ ລາວ ເພື່ອສ້າງການປ່ຽນແປງຢ່າງຈະແຈ້ງໃນການຮ່ວມມືລະຫວ່າງສອງປະເທດ, ນຳການພົວພັນລະຫວ່າງສອງປະເທດກ້າວເຂົ້າສູ່ລວງເລີກຕາມທິດແທດຈິງ ແລະ ມີປະສິດທິຜົນ. ທ່ານປະທານສະພາແຫ່ງຊາດ ຫງວຽນຊິງຮຸ່ງ ສະເໜີໃຫ້ອົງການນິຕິບັນຍັດສອງປະເທດສືບຕໍ່ເສີມຂະຫຍາຍບັນດາໝາກຜົນທີ່ບັນລຸໄດ້, ໜູນຊ່ວຍ ແລະ ສະໜັບສະໜູນເຊິ່ງກັນ ແລະ ກັນ ໃນບັນດາເວທີປາໄສລັດຖະສະພາໂລກ, ກໍ່ຄືເພີ່ມພູນຄຸນສ້າງນ້ຳໃຈສາມັກຄີ, ມິດຕະພາບລະຫວ່າງສອງຊາດ.
ສ່ວນທ່ານສົມພັນ ແພງຄຳມີ ປາດຖະໜາ ຫວຽດນາມຈະໜູນຊ່ວຍບົດຮຽນໃນການຈັດຕັ້ງ, ການເຄື່ອນໄຫວຂອງສະພາປະຊາຊົນ; ໂຄງປະກອບການຈັດຕັ້ງ ແລະ ບຸກຄະລາກອນຂອງສະພາປະຊາຊົນ, ກໍ່ຄືລະບົບອົງການຈັດຕັ້ງຂອງຫ້ອງການສະພາປະຊາຊົນແຂວງ; ນະຄອນ ແລະ ຄະນະສະມາຊິກສະພາແຫ່ງຊາດ.