(vovworld) – ຕອນຄໍ່າວັນທີ 19/3, ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ໄປຮອດນະຄອນຫຼວງ ໂຣມ(Roma), ເລີ່ມຕົ້ນການຢ້ຽມຢາມ ສ.ອີຕາລີ ຢ່າງເປັນທາງການຕາມຄຳເຊີນຂອງທ່ານນາງປະທານສະພາຕຳ່ ສ.ອີຕາລີ Laura Boldrini. ພິທີຕ້ອນຮັບທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ໄດ້ດຳເນີນໄປຢ່າງສົມກຽດຢູ່ສະໜາມບິນດ້ວຍການຕ້ອນຮັບທີ່ອົບອຸ່ນຂອງຮອງຫົວໜ້າກຳມາທິການການຕ່າງປະເທດສະພາຕຳ່ ສ.ອີຕາລີ, ທ່ານເອກອັກຄະລັດຖະທູດ ຫວຽດນາມ ປະຈຳ ອີຕາລີ ພ້ອມກັບຜູ້ຕາງໜ້າປະຊາຄົມຊາວ ຫວຽດນາມ ອາໄສຢູ່ ອີຕາລີ.
ການຢ້ຽມຢາມ ອີຕາລີ ຢ່າງເປັນທາງການຂອງທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ຄະນະຜູ້ແທນຂັ້ນສູງສະພາແຫ່ງຊາດ ຫວຽດນາມ ຄັ້ງນີ້ແນໃສ່ປັບປຸງສາຍພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ເຊີ່ງຫາກໍ່ໄດ້ຮັບການສ້າງຕັ້ງເມື່ອປີ 2013, ກໍ່ຄືຮັດແໜ້ນສາຍພົວພັນລະຫວ່າງສະພາແຫ່ງຊາດສອງປະເທດ. ຜ່ານການຢ້ຽມຢາມຄັ້ງນີ້, ສອງປະເທດຫວັງວ່າຈະເປີດບາດກ້າວພັດທະນາໃໝ່ໃນການພົວພັນ, ພິເສດແມ່ນສາຍພົວພັນດ້ານເສດຖະກິດ, ການຄ້າ ແລະ ການລົງທຶນ.
ຕອນຄຳ່ວັນທີ 20/3, ທ່ານປະທານສະພາແຫ່ງຊາດ ຫງວຽນຊິງຮຸ່ງ ພົບປະເຈລະຈາກັບທ່ານປະທານສະພາສູງ ສ.ອີຕາລີ Pietro Grasso ແລະ ພົບປະບັນດາພະນັກງານສະຖານທູດ ຫວຽດນາມ ປະຈຳ ອີຕາລີ, ຜູ້ຕາງໜ້າປະຊາຄົມຊາວ ຫວຽດນາມ ອາໄສຢູ່ ອີຕາລີ.