ທ່ານປະທານສະພາແຫ່ງຊາດຫວຽດນາມຕ້ອນຮັບຮອງປະທານສະພາຕ່ຳອັງກິດ
ທ່ານນາງປະທານສະພາແຫ່ງຊາດ ຫງວຽນທິກີມເງິນ
ຕ້ອນຮັບທ່ານນາງ Eleanor Laing ຮອງປະທານສະພາຕ່ຳ ອັງກິດ
(vovworld) - ຕອນບ່າຍວັນທີ 03/10, ທ່ານນາງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ໄດ້ໃຫ້ການຕ້ອນຮັບທ່ານນາງ Eleanor Laing ຮອງປະທານສະພາຕ່ຳ ອັງກິດ. ທີ່ການຕ້ອນຮັບທ່ານນາງປະທານສະພາແຫ່ງຊາດ ຫງວຽນທິກີມເງິນ ສະເໜີທ່ານນາງຮອງປະທານສະພາຕ່ຳ ອັງກິດ ເອົາໃຈໃສ່, ຊຸກຍູ້ການພົວພັນຮ່ວມມືລະຫວ່າງລັດຖະສະພາ 2 ປະເທດ; ແລກປ່ຽນຄະນະຜູ້ແທນຂັ້ນສູງ ເພື່ອແບ່ງປັນບົດຮຽນໃນວຽກງານນິຕິບັນຍັດ. ດ້ວຍບົດຮຽນຂອງຕົນ, ຫວັງວ່າ ອັງກິດ ຈະໜູນຊ່ວຍ ຫວຽດນາມ ໃນວິວັດທະນາການປ່ຽນໃໝ່ລະບົບກົດໝາຍ ເພື່ອໃຫ້ເໝາະສົມກັບລັດຖະທຳມະນູນປີ 2013. 2 ປະເທດສືບຕໍ່ສະໜັບສະໜູນ, ສົມທົບກັນຢ່າງແໜ້ນແຟ້ນຢູ່ບັນດາເວທີປາໄສສາກົນ ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ. ທ່ານນາງປະທານສະພາແຫ່ງຊາດ ສະເໜີທ່ານນາງຮອງປະທານສະພາຕ່ຳ ອັງກິດ ຊຸກຍູ້ ເພື່ອໃຫ້ 2 ປະເທດສືບຕໍ່ພັດທະນາການພົວພັນຮ່ວມມືລະຫວ່າງວິສາຫະກິດ 2 ປະເທດກ່ວາອີກ, ເພີ່ມທະວີການເຄື່ອນໄຫວຮ່ວມມືລົງທຶນ, ຊຸກຍູ້ວິສາຫະກິດ ອັງກິດ ເພີ່ມທະວີການມີໜ້າຢູ່ ຫວຽດນາມ ໃນບັນດາຂົງເຂດ ອັງກິດ ມີທ່າແຮງ.
ກ່າວຄຳເຫັນທີ່ການຕ້ອນຮັບ, ທ່ານນາງຮອງປະທານສະພາຕ່ຳ ອັງກິດ Eleanor Laing ປາດຖະໜາວ່າ: ໃນໄລຍະຈະມາເຖິງ 2 ປະເທດຈະຊຸກຍູ້ບັນດາການຮ່ວມມືທີ່ກ່ຽວຂ້ອງເຖິງການສຶກສາ, ເພາະວ່າ ນີ້ແມ່ນຂົວຕໍ່ ເພື່ອຊຸກຍູ້ວັດທະນະທຳລະຫວ່າງ 2 ປະເທດ. ກ່ຽວກັບບັນຫາທະເລຕາເວັນອອກ, ລາຊະອານາຈັກ ອັງກິດ ໄດ້ສະແດງທັດສະນະຢ່າງຈະແຈ້ງແມ່ນ ພ້ອມແລ້ວທີ່ຈະສະໜັບສະໜູນຄຳຕັດສິນຂອງສານອະນຸຍາໂຕຕຸລາການ, ບັນດາຝ່າຍຄວນປະຕິບັດຕາມກົດໝາຍສາກົນ.