ທ່ານຮອງນາຍົກລັດຖະ ມົນຕີ ຮ່ວາງຈູງຫາຍ ຢ້ຽມຢາມໂຮນລັງ
ທ່ານຮອງນາຍົກລັດຖະມົນຕີ ຮ່ວາງຈູງຫາຍ ເຮັດວຽກຢູ່ໂຮນລັງ
(ພາບ:vietnam.vnanet.vn)
(vovworld) – ໂດຍຮັບຄຳເຊີນຂອງລັດຖະບານແຫ່ງລາຊະອານາຈັກໂຮນລັງ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ໄດ້ໄປຢ້ຽມຢາມ ແລະ ເຮັດວຽກຢູ່ໂຮນລັງ ແລະ ເປັນປະທານຮ່ວມກອງປະຊຸມຄັ້ງທີ 4 ຄະນະກຳມະການລະຫວ່າງລັດຖະບານຫວຽດນາມ - ໂຮນລັງ ກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ຄຸ້ມຄອງນ້ຳ, ແຕ່ວັນທີ 22 – 24/09. ຕອນເຊົ້າວັນທີ 22/09, ທ່ານຮອງນາຍົກລັດຖະມົນຕີຮ່ວາງຈູງຫາຍ ໄດ້ມີການພົບປະເຈລະຈາກັບທ່ານນາຍົກລັດຖະມົນຕີໂຮນລັງ Mark Rutte. ທ່ານນາຍົກລັດຖະມົນຕີ Mark Rutte ຕີລາຄາສູງບົດບາດ ແລະ ອິດທິພົນຊື່ສຽງຂອງຫວຽດນາມ ຢູ່ພາກພື້ນ ແລະ ເວທີສາກົນ, ໂດຍສະເພາະແມ່ນໃນອາຊຽນ ແລະ ໃນການເພີ່ມທະວີການພົວພັນລະຫວ່າງອາຊຽນ - EU ເວົ້າລວມ ແລະ ຫວຽດນາມ - EU ເວົ້າສະເພາະ. ທ່ານນາຍົກລັດຖະມົນຕີ Mark Rutte ຢືນຢັນວ່າ, ລັດຖະບານ ແລະ ປະຊາຄົມວິສາຫະກິດໂຮນລັງ ປາດຖະໜາຢາກສືບຕໍ່ເພີ່ມທະວີການພົວພັນຮ່ວມມືຫຼາຍດ້ານກັບຫວຽດນາມ, ສະໜັບສະໜູນຫວຽດນາມ ເພີ່ມທະວີການພົວພັນຮອບດ້ານກັບ EU.
ສ່ວນທ່ານລັດຖະມົນຕີ ຮ່ວາງຈູງຫາຍ ຢືນຢັນວ່າ ຍາມໃດຫວຽດນາມກໍ່ຖືເປັນສຳຄັນ ແລະ ປາດຖະໜາຢາກເພີ່ມທະວີການພົວພັນກັບໂຮນລັງ, ໜຶ່ງໃນບັນດາຄູ່ຮ່ວມມືເອີລົບ ສຳຄັນອັນດັບໜຶ່ງຂອງຫວຽດນາມ. 2 ຝ່າຍເຫັນດີຈັດຕັ້ງບັນດາການເຄື່ອນໄຫວພົບປະແລກປ່ຽນຢູ່ແຕ່ລະປະເທດເປັນປະຈຳ, ເພື່ອປະກອບສ່ວນເພີ່ມທະວີຄວາມເຂົ້າໃຈເຊິ່ງກັນ ແລະ ກັນລະຫວ່າງປະຊາຊົນ 2 ປະເທດ.
ແລະກໍ່ໃນວັນທີ 22/09, ທ່ານຮອງນາຍົກລັດຖະມົນຕີຮ່ວາງຈູງຫາຍ ພ້ອມກັບທ່ານນາງ Melanie Schultz, ລັດຖະມົນຕີກະຊວງພື້ນຖານໂຄງລ່າງ ແລະ ສິ່ງແວດລ້ອມໂຮນລັງ ໄດ້ເປັນປະທານກອງປະຊຸມຄັ້ງທີ 4 ຄະນະກຳມະການລະຫວ່າງລັດຖະບານຫວຽດນາມ - ໂຮນລັງ ກ່ຽວກັບການຮັບມີືກັບການປ່ຽນແປງຂອງດິນຟ້າອາກາດ ແລະ ຄຸ້ມຄອງນ້ຳ ຢູ່ນະຄອນ La Hay. ສິ້ນສຸດກອງປະຊຸມ, ທ່ານຮອງນາຍົກລັດຖະມົນຕີ ຮ່ວາງຈູງຫາຍ ແລະ ທ່ານນາງລັດຖະມົນຕີ Melanie Schultz ໄດ້ລົງນາມໃນບົດບັນທຶກກອງປະຊຸມຄັ້ງທີ 4 ຄະນະກຳມະການລະຫວ່າງລັດຖະບານກ່ຽວກັບການຮັບມືກັບການປ່ຽນແປງຂອງດິນຟ້າອາກາດ ແລະ ຄຸ້ມຄອງນ້ຳ , ເປັນເອກະພາບກອງປະຊຸມຄັ້ງທີ 5 ຈະຈັດຂຶ້ນຢູ່ຮ່າໂນ້ຍ ໃນປີ 2015.
ໃນລາຍການຢ້ຽມຢາມ, ທ່ານຮອງນາຍົກລັດຖະມົນຕີຮ່ວາງຈູງຫາຍ ຈະພົບປະກັບທ່ານເຈົ້າຄອງນະຄອນ Amsterdam Van der Laan, ເຂົ້າຮ່ວມພິທີໄຂລາຍການ “ວັນຫວຽດນາມ ຢູ່ໂຮນລັງ 2014” ແລະ ເວທີປາໄສຮ່ວມມືເສດຖະກິດຫວຽດນາມ - ໂຮນລັງ.