( vovworld ) - ໂດຍໄດ້ຮັບຄຳເຊື້ອເຊີນຂອງລັດຖະບານຍີ່ປຸ່ນ, ວັນທີ 1/7, ຄະນະຜູ້ແທນຂັ້ນສູງລັດຖະບານຫວຽດນາມ ໂດຍທ່ານຮອງນາຍົກລັດຖະມົນຕີ Nguyen Xuan Phuc ນຳໜ້າໄດ້ເດີນທາງໄປໂຕກຽວ, ເລີ່ມຕົ້ນການຢ້ຽມຢາມ ແລະ ເຮັດວຽກຢູ່ຍີ່ປຸ່ນ. ທີ່ການພົບປະເຈລະຈາກັບທ່ານນາຍົກລັດຖະມົນຕີຍີ່ປຸ່ນ Yoshihiko Noda ເມື່ອຕອນບ່າຍວັນທີ 1/7, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ຕີລາຄາສູງເລື່ອງລັດຖະບານຍີ່ປຸ່ນ ສະຫງວນທຶນອຸປະຖຳການພັດທະນາທາງການ ( ODA ) ໃຫ້ແກ່ຫວຽດນາມ ໃນສົກປີການເງິນ 2011 ຢູ່ໃນລະດັບສູງສຸດນັບແຕ່ກ່ອນມາຮອດປະຈຸບັນ. ທ່ານຮອງນາຍົກລັດຖະມົນຕີ ໃຫ້ຄຳໝັ້ນສັນຍາວ່າ ຫວຽດນາມ ຈະນຳໃຊ້ແຫ່ງທຶນໜູນຊ່ວຍຂອງຍີ່ປຸນ ຢ່າງມີປະສິດທິຜົນ. ທ່ານນາຍົກລັດຖະມົນຕີຍີ່ປຸ່ນ Yoshihiko Noda ແລະ ທ່ານຮອງນາຍົກລັດຖະມົນຕີ Nguyen Xuan Phuc ໄດ້ເຫັນດີສືບຕໍ່ສົມທົບກັນຢ່າງແໜ້ນແຟ້ນເພື່ອຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງສອງປະເທດຢ່າງມີປະສິດທິຜົນ ແລະ ສົມທົບກັນຈັດຕັ້ງປີແຫ່ງຄວາມມິດຕະພາບຫວຽດນາມ - ຍີ່ປຸ່ນ 2013 ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນສ້າງຕັ້ງສາຍພົວພັນທາງການທູດເປັນຢ່າງດີ. ທ່ານນາຍົກລັດຖະມົນຕີ Noda ໄດ້ຢືນຢັນວ່າ ຈະສືບຕໍ່ຊ່ວຍເຫຼືອຫວຽດນາມ ໂດຍຜ່ານການສະໜອງທຶນ ODA. ກ່ຽວຂ້ອງເຖິງບັນຫາທະເລຕາເວັນອອກ, ທ່ານນາຍົກລັດຖະມົນຕີ Yoshihiko Noda ໄດ້ສະແດງການສະໜັບສະໜູນຕໍ່ຫຼັກໝັ້ນຂອງຫວຽດນາມ ກ່ຽວກັບການຮັບປະກັນຄວາມສັນຕິພາບ, ສະຖຽນລະພາບ ແລະ ເສລີພາບ, ຄວາມປອດໄພໃນການເດີນທະເລຢູ່ທະເລຕາເວັນອອກ, ແກ້ໄຂການພິພາດກັນດ້ວຍສັນຕິວິທີ ບົນພື້ນຖານກົດໝາຍສາກົນ, ພິເສດແມ່ນສົນທິສັນຍາກ່ຽວກັບກົດໝາຍທະເລເມື່ອປີ 1982 ຂອງສະຫະປະຊາຊາດ.
ແລະກໍໃນວັນດຽວກັນ, ທ່ານຮອງນາຍົກລັດຖະມົນຕີ Nguyen Xuan Phuc ໄດ້ໄປຢ້ຽມຢາມສະຖານທູດຫວຽດນາມ ປະຈຳຍີ່ປຸ່ນ ແລະ ຜູ້ຕາງໜ້າວົງຄະນະຍາດຊາວຫວຽດນາມ ອາໄສຢູ່ຍີ່ປຸ່ນ.
ວັນທີ 2/7, ທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc ໄດ້ໄປຢ້ຽມຢາມສຳນັກງານຂອງອົງການຮ່ວມມືສາກົນຍີ່ປຸ່ນ (JICA) ແລະ ເຂົ້າຮ່ວມການພົບປະເຈລະຈາຂັ້ນສູງຫວຽດນາມ-ຍີ່ປຸ່ນ ກ່ຽວກັບການປະຕິຮູບກົດໝາຍ ແລະ ຂະແໜງຕຸລາການ. ທີ່ການຕ້ອນຮັບທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc, ທ່ານ Hideaki Domichi ຮອງປະທານຜູ້ປະຈຳ JICA ຖືວ່າ: ການຮ່ວມມືລະຫວ່າງສອງປະເທດໃນຂົງເຂດກົດໝາຍ ແລະ ຕຸລາການມີບົດບາດສຳຄັນ, ສະນັ້ນ, ຝ່າຍຍີ່ປຸ່ນ ໄດ້ຊັບຊ້ອນບັນດາຜູ້ຊ່ຽວຊານເກັ່ງໃນຂົງເຂດນີ້ ເພື່ອໃຫ້ເຂົາເຈົ້າສາມາດແລກປ່ຽນບົດຮຽນກັບຝ່າຍຫວຽດນາມ ໄດ້. ທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc ສະເໜີໃຫ້ລັດຖະບານຍີ່ປຸ່ນ ຈົ່ງສືບຕໍ່ຮັກສາ ແລະ ເພີ່ມທຶນ ODA ໃຫ້ແກ່ຫວຽດນາມ. ກ່າວຄຳເຫັນທີ່ການພົບປະເຈລະຈາຂັ້ນສູງຫວຽດນາມ-ຍີ່ປຸ່ນ ກ່ຽວກັບການປະຕິຮູບກົດໝາຍ ແລະ ຂະແໜງຕຸລາການ, ທ່ານຮອງນາຍົກລັດຖະມົນຕີຫວຽດນາມ Nguyen Xuan Phuc ຖືວ່າ, ການພົບປະເຈລະຈາຄັ້ງນີ້ ແມ່ນການເຄືອ່ນໄຫວມີລັກສະນະວິຊາສະເພາະຄັ້ງທຳອິດ ໃນຂອບເຂດການຢ້ຽມຢາມຍີ່ປຸ່ນ ຢ່າງເປັນທາງການຂອງຄະນະຜູ້ແທນລັດຖະບານຂັ້ນສູງຫວຽດນາມ. ຫວຽດນາມ ປາດຖະໜາຢາກຮຳຮຽນເອົາບົດຮຽນຂອງຍີ່ປຸ່ນ ໃນວິວັດການສ້າງລະບົບກົດໝາຍໃຫ້ສົມບູນແບບ.