ເອກອັກຄະລັດຖະທູດ ລາວ ແລະ ຮອງນາຍົກລັດຖະມົນຕີ ຫວຽດນາມ
|
(Vovworld) - ຕອນບ່າຍວັນທີ 07/03 ຢູ່ສຳນັກງານກະຊວງການຕ່າງປະເທດ, ທ່ານ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟາມບິ່ງມີງ ຕ້ອນຮັບເອກອັກຄະລັດທະທູດ ສປປ ລາວ ທ່ານ ທອງສະຫວັນ ພົມວິຫານ, ເຂົ້າຢ້ຽມຄຳນັບ ເນື່ອງໃນໂອກາດເລີ່ມປະຕິບັດໜ້າທີ່ການທູດ ຢູ່ຫວຽດນາມ. ໃນການຕ້ອນຮັບ, ທ່ານ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟາມບິ່ງມີງ ອວຍພອນ ສປປ ລາວ ຮັບຜິດຊອບສຳເລັດບົດບາດການເປັນປະທານອາຊຽນໃນປີ 2016 ແລະ ຢັ້ງຢືນວ່າຫວຽດນາມຈະສະໜັບສະໜູນ ແລະ ຊ່ວຍເຫຼືອຢ່າງສຸດຄວາມສາມາດ ເພື່ອໃຫ້ລາວສຳເລັດໜ້າທີ່ສຳຄັນດັ່ງກ່າວ. ທ່ານ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟາມບິ່ງມີງ ຢັ້ງຢືນຫວຽດນາມ ຍາມໃດກໍ່ຖືເປັນສຳຄັນພິເສດ ແລະ ໃຫ້ບູລິມະສິດສູງສຸດໃນການປັບປຸງ ແລະ ເພີ່ມທະວີສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ຢ່າງບໍ່ຢຸດຢັ້ງ ແລະ ເຊື່ອໝັ້ນວ່າໃນການປະຕິບັດໜ້າທີ່ຂອງຕົນ, ເອກອັກຄະລັດຖະທູດ ທ່ານ ທອງສະຫວັນ ພົມວິຫານ ຈະມີການປະກອບສ່ວນຕັ້ງໜ້າຫຼາຍຢ່າງ, ປະກອບສ່ວນເພີ່ມທະວີນ້ຳໃຈມິດຕະພາບ ແລະ ສາຍພົວພັນຮ່ວມມື ລະຫວ່າງ ສອງປະເທດກວ່າເກົ່າ.
ໃນຕອນບ່າຍຂອງວັນດຽວກັນ, ທ່ານ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ຟາມບິ່ງມີງ ກໍ່ໄດ້ຕ້ອນຮັບ ທ່ານເອກອັກຄະລັດຖະທູດ ສິງກະໂປ ປະຈຳຫວຽດນາມ Tech Heam, ເຂົ້າຢ້ຽມອຳລາ ໃນໂອກາດສີ້ນສຸດການປະຕິບັດໜ້າທີ່ການທູດ. ທ່ານ ຮອງນາຍົກລັດຖະມົນຕີ ຕີລາຄາສູງການຮ່ວມມືຢ່າງແໜ້ນແຟ້ນ, ມີປະສິດທິຜົນ ລະຫວ່າງ ສອງປະເທດຢູ່ເວທີສາກົນ ແລະ ພາກພື້ນ; ໂດຍສະເພາະແມ່ນໃນວິວັດການຊຸກຍູ້ການເຈລະຈາ, ເຊັນສັນຍາ ແລະ ຮັບຮອງເອົາສັນຍາຄູ່ຮ່ວມມືຂ້າມປາຊີຟິກ(TPP), ເພີ່ມທະວີບົດບາດ ແລະ ຄວາມຮັບຜິດຊອບໜ້າທີ່ຂອງອາຊຽນ, ສ້າງອາຊຽນສາມັກຄີ ແລະ ໝັນຄົງເຂັ້ມແຂງ. ທ່ານເອກອັກຄະລັດຖະທູດ Tech Heam ຢັ້ງຢືນວ່າ ເຖິງວ່າຈະຢູ່ຖານະຕຳແໜ່ງວຽກງານໃດກໍ່ຕາມ, ທ່ານກໍ່ຈະເຮັດຈົນສຸດຄວາມສາມາດຂອງຕົນ ສືບຕໍ່ປະກອບສ່ວນເພີ່ມທະວີ, ຊຸກຍູ້ສາຍພົວພັນຄູ່ຮ່ວມຍຸດທະສາດ ຫວຽດນາມ-ສິງກະໂປ ໃຫ້ນັບມື້ນັບແທດຈິງ ແລະ ມີປະສິດທິຜົນກວ່າເກົ່າ.