ທ່ານຮອງນາຍົກລັດຖະມົນຕີ,ລັດຖະມົນຕີການຕ່າງປະເທດຫວຽດນາມຟ້າມບີງມີງເຈລະຈາກັບລັດຖະມົນຕີການຕ່າງປະເທດເບລາຣຸດ
ທ່ານຮອງນາຍົກລັດຖະມົນຕີຟ້າມບີງມີງ ແລະ ທ່ານ Vladimir Makei, ລັດຖະມົນຕີການຕ່າງປະເທດ ເບລາຣຸດ
ພາບ:chinhphu.vn
|
(vovworld)-ໂດຍຮັບຄຳເຊີນຂອງທ່ານຮອງນາຍົກລັດຖະມົນຕີ,ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ, ທ່ານ Vladimir Makei, ລັດຖະມົນຕີການຕ່າງປະເທດ ເບລາຣຸດ ມາຢ້ຽມຢາມຫວຽດນາມ ແຕ່ວັນທີ 23-25/3/2014. ຕອນເຊົ້າວັນທີ 24/3, ທ່ານ ຮອງນາຍົກລັດຖະມົນຕີ,ທັງເປັນລັດຖະມົນຕີການຕ່າງປະເທດຫວຽດນາມ ຟ້າມບີງມີງ ໄດ້ເຈລະຈາກັບລັດຖະມົນຕີການຕ່າງປະເທດ ເບລາຣຸດ Vladimir Makei. ສອງຝ່າຍແຈ້ງໃຫ້ກັນຊາບກ່ຽວກັບສະພາບການເສດຖະກິດສັງຄົມຂອງແຕ່ລະປະເທດ. ສອງຝ່າຍມີຄວາມພຶງພໍໃຈໂດຍເຫັນວ່າ ການພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດໄດ້ພັດທະນາອັນຈົບງາມ, ເປັນປະຈຳ ແລະ ສະຫນັບສະຫນູນເຊິ່ງກັນ ແລະກັນໃນເວທີປາໄສສາກົນ, ເຫັນດີຊຸກຍູ້ກນຮ່ວມມືເສດຖະກິດ-ການຄ້າໃຫ້ສົມກັບຄວາມສາມາດບົ່ມຊ້ອນ ແລະ ສອດຄ່ອງກັບຄວາມມຸ່ງມາດປາດຖະຫນາຂອງປະຊາຊົນສອງປະເທດ. ສອງຝ່າຍເຫັນດີເພີ່ມທະວີການຮ່ວມມືໃນບັນດາເວທີປາໄສຫລາຍຝ່າຍ, ເປັນຕົ້ນຢູ່ ສປຊ. ພາຍຫລັງການເຈລະຈາ, ສອງຝ່າຍໄດ້ລົງນາມໃນຂໍ້ຕົກລົງກ່ຽວກັບການຮ່ວມມືລະຫວ່າງສອງກະຊວງການຕ່າງປະເທດ ແລະ ໂຄງການຮ່ວມມືລະຫວ່າງສອງກະຊວງໃນໄລຍະ 2014-2015.
ຕອນບ່າຍວັນດຽວກັນ, ທີ່ການຕອ້ນຮັບທ່ານລັດຖະມົນຕີການຕ່າງປະເທດ ເບລາຣຸດ Vladimir Makei, ທ່ານປະທານປະເທດເຈືອງເຕີນຊາງ ເນັ້ນຫນັກວ່າ:ຍາມໃດຫວຽດນາມກໍຈົດຈຳການຊ່ວຍເຫລືອ ແລະ ການສະຫນັບສະຫນູນອຳລຳ້ຄ່າຂອງ ເບລາຣຸດ ກ່ອນນີ້ກໍຄືປະຈຸບັນ. ທ່ານປະທານປະເທດຢືນຢັນ ຈະເລັ່ງລັດບັນດາກະຊວງ, ຂະແຫນງການ, ຊຸກຍູ້ການເພີ່ມທະວີການຮ່ວມມືກັບ ເບລາຣຸດ ພ້ອມທັງສະເຫນີ ເບລາຣຸດ ຍູ້ໄວວິວັດການເຈລະຈາ ແລະ ກ້າວໄປເຖິງການລົງນາມໃນສັນຍາການຄ້າເສລີ ລະຫວ່າງ ພັນທະມິດພາສີ ລັດເຊຍ-ເບລາຣຸດ-ລັດເຊຍ ກັບຫວຽດນາມ. ລັດຖະມົນຕີການຕ່າງປະເທດ ເບລາຣຸດ Vladimir Makei ເນັ້ນຫນັກວ່າ:ເບລາຣຸດ ຍາມໃດກໍພ້ອມແລ້ວເປີດກວ້າງ ແລະ ປັບປຸງການພົວພັນສອງຝ່າຍໃນທຸກຂົງເຂດ.