ທ່ານຮອງນາຍົກລັດຖະມົນຕີຫວູດຶກດາມຢ້ຽມຢາມໄທຢ່າງເປັນທາງການ
ທ່ານຮອງນາຍົກລັດຖະມົນຕີ ຫວຽດນາມ ຫວູດຶກດາມ
ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ
(vovworld) - ໃນລະຫວ່າງວັນທີ 10-11/08, ທ່ານຮອງນາຍົກລັດຖະມົນຕີ ຫວຽດນາມ ຫວູດຶກດາມ ຢ້ຽມຢາມລາຊະອານາຈັກ ໄທ ຢ່າງເປັນທາງການ ແລະ ເຂົ້າຮ່ວມລາຍການວັນວັດທະນະທຳ ຫວຽດນາມ ຢູ່ ໄທ ຕາມຄຳເຊີນຂອງທ່ານຮອງນາຍົກລັດຖະມົນຕີ ໄທ ທະນະສັກ ປະຕິມາປຣະກອນ. ໃນຂອບເຂດການຢ້ຽມຢາມ, ທ່ານຮອງນາຍົກລັດຖະມົນຕີ ຫວູດຶກດາມ ໄດ້ເຂົ້າຢ້ຽມຂ່ຳນັບທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ ແລະ ເຮັດວຽກກັບທ່ານຮອງນາຍົກລັດຖະມົນຕີ ທະນະສັກ ປະຕິມາປຣະກອນ.
ທີ່ການພົບປະກັບທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ, ທ່ານຮອງນາຍົກລັດຖະມົນຕີ ຫວູດຶກດາມ ເນັ້ນໜັກວ່າ: ນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ຍາມໃດກໍ່ຖືເປັນສຳຄັນການພົວພັນຄູ່ຮ່ວມມືຍຸດທະສາດກັບລາຊະອານາຈັກ ໄທ ແລະ ສະແດງຄວາມຂອບອົກຂອບໃຈລັດຖະບານ ໄທ ທີ່ໄດ້ສ້າງເງື່ອນໄຂສະດວກໃຫ້ແກ່ປະຊາຄົມຊາວ ຫວຽດນາມ ພວມດຳລົງຊີວິດ ແລະ ເຮັດວຽກຢູ່ ໄທ. ສ່ວນທ່ານນາຍົກລັດຖະມົນຕີ ໄທ ປຣາຢຸດ ຈັນໂອຈາ ຢືນຢັນວ່າ: ຍາມໃດກໍ່ຖືເປັນສຳຄັນການຮ່ວມມືກັບ ຫວຽດນາມ ແລະ ປາດຖະໜາວ່າ ຈະສືບຕໍ່ເສີມຂະຫຍາຍບັນດາກົນໄກຮ່ວມມື ເພື່ອຊຸກຍູ້ການພົວພັນ 2 ປະເທດ ພັດທະນາຍິ່ງກ່ວາອີກ.
ທີ່ການເຮັດວຽກລະຫວ່າງທ່ານຮອງນາຍົກລັດຖະມົນຕີ ຫວູດຶກດາມ ແລະ ທ່ານຮອງນາຍົກລັດຖະມົນຕີ ທະນະສັກ ປະຕິມາປຣະກອນ, 2 ຝ່າຍເຫັນດີເປັນເອກະພາບຕັ້ງໜ້າຜັນຂະຫຍາຍບັນດາມາດຕະການເພື່ອແນໃສ່ເພີ່ມທະວີບັນດາຂົງເຂດຮ່ວມມືລະອຽດໃນການພົວພັນ 2 ຝ່າຍຍິ່ງກ່ວາອີກ. ສູ້ຊົນນຳວົງເງິນການຄ້າ 2 ສົ້ນບັນລຸໄດ້ 20 ຕື້ USD ໃນປີ 2020; ສ້າງເງື່ອນໄຂໃຫ້ວິສາຫະກິດ 2 ປະເທດເສີມຂະຫຍາຍປະສິດທິຜົນຂອງການຮ່ວມມືອະນຸພາກພື້ນແມ່ນ້ຳຂອງ ແລະ ແລວເສດຖະກິດຕາເວັນອອກ - ຕາເວັນຕົກ.