( vovworld ) – ວັນທີ 4/5, ທ່ານເລຂາທິການໃຫຍ່ Nguyen Phu Trong ພ້ອມກັບສະມາຊິກສະພາແຫ່ງຊາດໜ່ວຍເລືອກຕັ້ງເລກ 1, ນະຄອນຫຼວງຮ່າໂນ້ຍ, ໄດ້ພົບປະກັບຜູ້ມີສິດເລືອກຕັ້ງເມືອງ Ba Dinh ແລະ ເມືອງ Hoan Kiem. ບັນຫາທີ່ຜູ້ມີສິດເລືອກຕັ້ງສົນໃຈເປັນພິເສດແມ່ນການຄຸ້ມຄອງຄວາມເປັນລະບຽບຮຽບຮ້ອຍໃນຕົວເມືອງ, ຮັບປະກັນຄວາມປອດໄພທາງຄົມມະນາຄົມ ແລະ ຕ້ານສະພາບການລົດຕິດໃນການສັນຈອນໄປມາ; ວຽກງານປ້ອງກັນ ແລະ ຕ້ານການສໍ້ລາດບັງຫຼວງ; ປ່ຽນໃໝ່ຮູບແບບການຕິດຕາມກວດກາຂອງສະພາແຫ່ງຊາດ… ຜູ້ມີສິດເລືອກຕັ້ງເມືອງ Ba Dinh ແລະ ເມືອງ Hoan Kiem ຕີລາຄາສູງຕໍ່ມະຕິກອງປະຊຸມຄະນະບໍລິຫານງານສູນກາງພັກຄັ້ງທີ 4 ຊຸດທີ 11 ກ່ຽວກັບບັນດາບັນຫາທີ່ຮີບດ່ວນໃນການກໍ່ສ້າງພັກ. ຄຳຄິດຄຳເຫັນຂອງຜູ້ມີສິດເລືອກຕັ້ງຫຼາຍທ່ານໄດ້ສະເໜີວ່າ ຕ້ອງສືບຕໍ່ມີນະໂຍບາຍຮັບປະກັນຊີວິດສັງຄົມ, ຮັດແຄບຊ່ອງຫວ່າງຄວາມແຕກໂຕນດ້ານເສດຖະກິດ, ຊ່ວຍເຫຼືອປະຊາຊົນຜູ້ທຸກຍາກໃນຂະນະທີ່ລາຄາສິນຄ້າເພີ່ມຂຶ້ນສູງ. ທ່ານເລຂາທິການໃຫຍ່ Nguyen Phu Trong ເນັ້ນໜັກວ່າ ບັນດານະໂຍບາຍກ່ຽວກັບການຈຳກັດຊ່ອງຫວ່າງຜູ້ຮັ່ງມີ ແລະ ຄົນທຸກຍາກຄວນໄດ້ຮັບຄວາມເອົາໃຈໃສ່ເປັນພິເສດ.
“ ຖ້າຫາກປະຕິບັດນະໂຍບາຍທາງດ້ານສັງຄົມບໍ່ໄດ້ດີ ແມ່ນພວກເຮົາເດີນບໍ່ຖືກຕາມທິດທາງຂອງລັດທິສັງຄົນນິຍົມ. ຖ້າບໍ່ສາມາດຮັບປະກັນໃຫ້ແກ່ບັນຫານີ້ແມ່ນບໍ່ເຮັດຫຼ້ອນໜ້າທີ່ຮັບຜິດຊອບຕໍ່ປະຊາຊົນ. ການເຕີບໂຕເສດຖະກິດຕ້ອງໄປຄຽງຄູ່ກັບຄວາມກ້າວໜ້າ ແລະ ຍຸດຕິທຳສັງຄົມໃນແຕ່ລະນະໂຍບາຍ, ໃນແຕ່ລະບາດກ້າວພັດທະນາ, ຫາກບໍ່ແມ່ນຕ້ອງລໍຖ້າໃຫ້ເສດຖະກິດພັດທະນາແລ້ວ ພວກເຮົາຈຶ່ງເຮັດຕາມຫຼັງ. ໃນໄລຍະທີ່ຈະມາເຖິງສູນກາງໄດ້ປຶກສາຫາລືກ່ຽວກັບບັນຫານີ້ ແລະ ອາດຈະມີມະຕິດ້ວຍຫົວເລື່ອງສະເພາະກ່ຽວກັບນະໂຍບາຍສັງຄົມ. ຖ້າຫາກມີມະຕິນີ້ແມ່ນທີ່ວ່າເປັນຄັ້ງທຳອິດທີ່ມະຕິສູນກາງໄດ້ປຶກສາຫາລືກ່ຽວກັບຫົວຂໍ້ໃນວຽກງານນະໂຍບາຍສັງຄົມ, ຮັບປະກັນຊີວິດສັງຄົມ, ຈຳກັດຊ່ອງຫວ່າງຄວາມແຕກໂຕນ ລະຫວ່າງຄົນຮັ່ງມີ ແລະ ຜູ້ທຸກຍາກ ”.