ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ
ແລະ ທ່ານ ຢາງເຈຍຊື້ ກຳມະການໃນຄະນະລັດຖະບານຈີນ
|
(vovworld) - ທີ່ການຕ້ອນຮັບທ່ານ ຢາງເຈຍຊື້ ກຳມະການໃນຄະນະລັດຖະບານຈີນເມື່ອຕອນບ່າຍວັນທີ 18/6, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ຊົມເຊີຍທ່ານ ຢາງເຈຍຊື້ ກຳມະການໃນຄະນະລັດຖະບານຈີນມາຫວຽດນາມດຳເນີນການພົບປະລະຫວ່າງ 2 ປະທານຄະນະກຳມະການຊີ້ນຳການຮ່ວມມື 2 ຝ່າຍຫວຽດນາມ - ຈີນ; ຢັ້ງຢືນນະໂຍບາຍທີ່ສະເໝີຕົ້ນສະເໝີປາຍຂອງພັກ, ລັດ ແລະ ປະຊາຊົນຫວຽດນາມ ຍາມໃດກໍຖືເປັນສຳຄັນການພົວພັນມິດຕະພາບ, ການຮ່ວມມືກັບຈີນ, ຫວັງຮັກສາ, ປັບປຸງ ແລະ ເຮັດໃຫ້ການພົວພັນຫວຽດນາມ-ຈີນພັດທະນາຢ່າງສົດໄສ, ເປັນປັກກະຕິເພື່ອຜົນປະໂຫຍດພື້ນຖານ ແລະ ຍາວນານຂອງປະຊາຊົນ 2 ປະເທດ; ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ຕີລາຄາສູງກ່ຽວກັບບັນດາບາດກ້າວພັດທະນາຢ່າງຕັ້ງໜ້າໃນການພົວພັນຫວຽດນາມ-ຈີນໃນຊຸມປີມໍ່ໆມານີ້.
ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ເນັ້ນໜັກກ່ຽວກັບລັກສະນະທີ່ຮ້າຍແຮງ ແລະ ຜົນກະທົບຫຍໍ້ທໍ້ທີ່ສຸດທີ່ມີຕໍ່ປະຊາຊົນຫວຽດນາມ, ການພົວພັນຫວຽດນາມ-ຈີນ ແລະ ສະພາບການພາກພື້ນຂອງເລື່ອງຈີນຕັ້ງຮ້ານເຈາະນ້ຳມັນໄຮຢາງ 981 ເຂົ້າເຄື່ອນໄຫວໃນເຂດນ່ານທະເລຂອງຫວຽດນາມນັບແຕ່ຕົ້ນເດືອນ 5 ເປັນຕົ້ນມາ; ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ຢືນຢັນຫຼັກໝັ້ນກ່ຽວກັບອະທິປະໄຕຂອງຫວຽດນາມທີ່ມີຕໍ່ 2 ໝູ່ເກາະຮ່ວາງຊາ ແລະ ເຈືອງຊາໃນທະເລຕາເວັນອອກ ແມ່ນບໍ່ປ່ຽນແປງ ແລະ ບໍ່ອາດປ່ຽນແປງ; ທ່ານສະເໜີຈົ່ງຮີບຮ້ອນແລກປ່ຽນເພື່ອມີບັນດາວິທີການແກ້ໄຂ ເຮັດໃຫ້ສະພາບການເປັນປົກກະຕິໂດຍໄວ, ສ້າງປະຖົມປັດໄຈໃຫ້ແກ່ບັນດາວິທີການແກ້ໄຂໂດຍພື້ນຖານ ແລະ ຍາວນານ ເພື່ອແກ້ໄຂບັນດາບັນຫາບົນທະເລ, ຊຶ່ງເລີ່ມມາຈາກຜົນປະໂຫຍດອັນໃຫຍ່ຫຼວງຂອງ 2 ປະເທດ, ບົນພື້ນຖານບັນດາສັນຍາລະຫວ່າງການນຳຂັ້ນສູງຂອງ 2 ປະເທດໄດ້ລົງນາມ ແລະ ກົດໝາຍສາກົນ, ເປັນຕົ້ນແມ່ນສົນທິສັນຍາ ສ.ປ.ຊ ກ່ຽວກັບກົດໝາຍທະເລປີ 1982.
ສ່ວນທ່ານ ຢາງເຈຍຊື້ ກຳມະການໃນຄະນະລັດຖະບານຈີນໄດ້ຢືນຢັນວ່າ ພັກ, ລັດຖະບານຈີນຖືເປັນສຳຄັນທີ່ສຸດ ແລະ ຍາມໃດກໍຫວັງຢາກພັດທະນາ ການພົວພັນອັນດີງາມ, ເປັນປົກກະຕິຍາວນານກັບຫວຽດນາມ; ຫວັງໃຫ້ 2 ຝ່າຍສືບຕໍ່ປຶກສາຫາລືເພື່ອຫຼຸດຜ່ອນຄວາມເຄັ່ງຕຶງ, ແກ້ໄຂບັນຫາບົນທະເລ.
(ຫວຽດນາມ - ຈີນ ດຳເນີນກອງປະຊຸມຄະນະກຳມະຫານຮ່ວມມື 2 ຝ່າຍ)
ກ່ອນໜ້ານັ້ນ ໃນວັນດຽວກັນ, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິງ ພ້ອມກັບທ່ານກຳມະການໃນຄະນະລັດຖະບານຈີນ ຢາງເຈຍຊື້ ດຳເນີນການພົບປະລະຫວ່າງ 2 ປະທານຄະນະກຳມະການຊີ້ນຳການຮ່ວມມື 2 ຝ່າຍຫວຽດນາມ - ຈີນ.
ທີ່ການພົບປະ, ທ່ານຮອງນາຍົກລັດຖະມົນຕີ ຟ້າມບິ່ງມິງ ຢືນຢັນວ່າ, ຍາມໃດພັກ, ລັດ, ລັດຖະບານ ແລະ ປະຊາຊົນຫວຽດນາມ ກໍ່ຖືການຮັກສາ ແລະ ເພີ່ມທະວີການພົວພັນຖານບ້ານໃກ້ເຮືອນຄຽງມິດຕະພາບ ແລະ ຮ່ວມມືຮອບດ້ານກັບຈີນ ເປັນສຳຄັນ. ໃນຊຸມປີຜ່ານມາ, ດ້ວຍຄວາມມານະພະຍາຍາມຂອງທັງ 2 ຝ່າຍ, ການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ຈີນ ໄດ້ມີບັນດາບາດກ້າວພັດທະນາຢ່າງເລິກເຊິ່ງ, ກວ້າງຂວາງ. ແຕ່ວ່າ, ໃນສະພາບການພົວພັນລະຫວ່າງ 2 ປະເທດພວມດີງາມນັ້ນ, ເລື່ອງຈີນຕັ້ງຮ້ານເຈາະນ້ຳມັນໄຮ່ຢາງ 981 ໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ໄດ້ລະເມີດກົດໝາຍສາກົນ, ສົນທິສັນຍາສະຫະປະຊາຊາດກ່ຽວກັບກົດໝາຍທະເລປີ 1982, ນາບຂູ່ຄວາມສະຫງົບ, ປອດໄພໃນການເດີນທະເລ ແລະ ສັນຕິພາບ, ສະຖຽນລະພາບຢູ່ໃນພາກພື້ນ, ສົ່ງຜົນທະທ້ອນທີ່ບໍ່ດີເຖິງການພົວພັນລະຫວ່າງປະຊາຊົນຫວຽດນາມ ແລະ ສົ່ງຜົນສະທ້ອນທີ່ຫຍໍ້ທໍ້ເຖິງການພົວພັນຮ່ວມມືລະຫວ່າງ 2 ປະເທດ. ທ່ານຮອງນາຍົກລັດຖະມົນຕີ ໄດ້ຢືນຢັນຢ່າງແຮງກ່ຽວກັບອະທິປະໄຕຂອງຫວຽດນາມ ທີ່ມີຕໍ່ໝູ່ເກາະຮ່ວາງຊາ, ສິດອະທິປະໄຕ, ສິດອຳນາດສານຂອງຫວຽດນາມ ທີ່ມີຕໍ່ເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ ທີ່ໄດ້ຮັບການກຳນົດຕາມສົນທິສັນຍາສະຫະປະຊາຊາດກ່ຽວກັບກົດໝາຍທະເລປີ 1982 ເຊິ່ງທັງ 2 ປະເທດລ້ວນແຕ່ແມ່ນສະມາຊິກ. ທ່ານຮອງນາຍົກລັດຖະມົນຕີຟ້າມບິ່ງມິງ ຮຽກຮ້ອງໃຫ້ຈີນ ຖອນຮ້ານເຈາະນ້ຳມັນ ແລະ ກຳປັ່ນທຸກລຳອອກຈາກເຂດນ່ານທະເລຂອງຫວຽດນາມ, ຄວາມຄຸມສະພາບການບໍ່ປະໃຫ້ເກີດການປະທະກັນ, ເຈລະຈາແກ້ໄຂສະພາບເຄັ່ງຕຶງໃນປະຈຸບັນ ກໍ່ຄືແກ້ໄຂຄວາມບໍ່ລົງລອນກັນລະຫວ່າງ 2 ປະເທດ ບົນພື້ນຖານກົດໝາຍສາກົນ, ສົນທິສັນຍາສະຫະປະຊາຊາດກ່ຽວກັບກົດໝາຍທະເລປີ 1982.
ທ່ານກຳມະການໃນຄະນະລັດຖະບານຈີນ ຢາງເຈຍຊື້ ຢືນຢັນວ່າ, ພັກ, ລັດຖະບານ ແລະ ປະຊາຊົນຈີນ ຖືເປັນສຳຄັນການພົວພັນມິດຕະພາບກັບຫວຽດນາມ, ຫັນດີຕ້ອງຮັບປະກັນສະພາບຄວາມໝັ້ນຄົງບົນທະເລ, ລະງັບໃຈບໍ່ປະໃຫ້ເກີດການປະທະກັນ, ບໍ່ເຮັດໃຫ້ການພົວພັນລະຫວ່າງ 2 ປະເທດຊົ່ວຮ້າຍລົງ, ພ້ອມກັນມານະພະຍາຍາມຊຸກຍູ້ການຮ່ວມມືທຸກດ້ານລະຫວ່າງ 2 ປະເທດ ເພື່ອໃຫ້ມີບັນດາບາດກ້າວພັດທະນາຢ່າງເລິກເຊິ່ງ, ກວ້າງຂວາງ ແລະ ແທດຈິງກວ່າອີກ, ພ້ອມທັງຢ້ຳຄືນຫຼັກໝັ້ນຂອງຈີນກ່ຽວກັບທະເລຕາເວັນອອກ.
2 ຝ່າຍຢືນຢັນຈະສືບຕໍ່ຮັກສາບັນດາກົນໄກແລກປ່ຽນ, ຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖິ່ນຂອງ 2 ປະເທດ, ຜັນຂະຫຍາຍໂຄງການເຄື່ອນໄຫວຜັນຂະຫຍາຍບັນດາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຫວຽດນາມ - ຈີນ ຢ່າງມີປະສິດທິຜົນ ແລະ ຈັດຕັ້ງກອງປະຊຸມຄັ້ງທີ 7 ຄະນະຊີ້ນຳການຮ່ວມມື 2 ຝ່າຍ.