(vovworld) - ວັນທີ 20/12, ຢູ່ສຳນັກງານສູນກາງພັກ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງລັດຖະບານລາວ ໂດຍທ່ານຮອງນາຍົກລັດຖະມົນຕີ, ປະທານອານຸກຳມະການຮ່ວມມືລາວ - ຫວຽດນາມ ສົມສະຫວາດ ເລັ່ງສະຫວັດ ເປັນຫົວໜ້າຄະນະ, ທີ່ມາຢ້ຽມຢາມ ແລະ ເຂົ້າຮ່ວມກອງປະຊຸມຄະນະກຳມະການລະຫວ່າງລັດຖະບານຫວຽດນາມ - ລາວຄັ້ງທີ 35. ທ່ານເລຂາທິການໃຫຍ່ ຫງວຽນຟຸ໋ຈ້ອງ ຫວັງວ່າ ໃນໄລຍະຈະມາເຖິງ ອານຸກຳມະການສອງປະເທດ ຈະເພີ່ມທະວີການຊີ້ນຳບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດຫວຽດນາມ ແລະ ລາວ ຍູ້ໄວຄວາມຄືບໜ້າບັນດາໂຄງການຮ່ວມມືລົງທຶນຢູ່ລາວ; ເພີ່ມທະວີການສົມທົບກັນກວດກາ, ຊຸກຍູ້ການຜັນຂະຫຍາຍບັນດາຂໍ້ຕົກລົງທີ່ໄດ້ຮັບການລົງນາມຢ່າງມີປະສິດທິຜົນ ພິເສດແມ່ນບັນດາຂໍ້ຕົກລົງທີ່ກອງປະຊຸມຄັ້ງທີ 35 ນີ້. ພ້ອມກັນນັ້ນ, ສືບຕໍ່ກວດກາຄືນ, ປັບປຸງໃຫ້ສຳເລັດກົນໄກ, ນະໂຍບາຍຕ່າງໆກ່ຽວກັບການລົງທຶນ, ການຄ້າ ເພື່ອແນໃສ່ຍູ້ໄວຄວາມຄືບໜ້າ, ຄຸນນະພາບ ແລະ ປະສິດທິຜົນຂອງບັນດາໂຄງການລົງທຶນ; ເພີ່ມວົງເງິນການຄ້າສອງສົ້ນຢ່າງໄວ; ເພີ່ມທະວີການແລກປ່ຽນຂໍ້ມູນຂ່າວ, ສົມທົບກັນຢ່າງແໜ້ນແຟ້ນໃນບັນດາບັນຫາສາກົນ ແລະ ພາກພື້ນ, ບັນດາການເຄື່ອນໄຫວທີ່ເວທີປາໄສຫຼາຍຝ່າຍ ໂດຍສະເພາະແມ່ນໃນຂອບເຂດການຮ່ວມມືອາຊຽນ ແລະ ບັນດາກົນໄກຮ່ວມມືອານຸພາກພື້ນ.
ໃນລະຫວ່າງວັນທີ 26 – 28/12, ທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ສປປ ລາວ ຈູມມາລີ ໄຊຍະສອນ ແລະ ພັນລະຍາ ຈະມາຢ້ຽມຢາມຫວຽດນາມ ຢ່າງເປັນທາງການ, ຕາມຄຳເຊີນຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸ໋ຈ້ອງ ແລະ ທ່ານປະທານປະເທດ ເຈືອງເຕີນຊາງ.