(vovworld) -ຕອນບ່າຍວັນທີ 24/1, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ມາຮອດຮ່າໂນ້ຍ, ສິ້ນສຸດການຢ້ຽມຢາມ ສະຫະພັນລາຊະອານາຈັກອັງກິດ ແລະ ໄອແລນເໜືອ ຕາມຄຳເຊີນຂອງ ທ່ານນາຍົກລັດຖະມົນຕີອັງກິດ David Cameron . ກ່ອນທີ່ເດີນທາງອອກຈາກອັງກິດ, ຕອນບ່າຍວັນທີ 23/1, ຢູ່ວັງ Clarence, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ມີການພົບປະກັບອົງມົງກຸດລາຊະກຸມມານອັງກິດ Charles . ທີ່ການພົບປະ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ ໄດ້ຕີລາຄາສູງນ້ຳໃຈຂອງລາດຊະວົງອັງກິດທີ່ສະຫງວຽນໃຫ້ແກ່ຫວຽດນາມກໍຄືບົດບາດຂອງລາດຊະວົງອັງກິດໃນການຊຸກຍູ້ການພົວພັນລະຫວ່າງ 2 ປະເທດ. ສ່ວນ ອົງມົງກຸດລາຊະກຸມມານ Charles ໄດ້ສະແດງຄວາມຫວັງຢາກເພີ່ມທະວີການຮ່ວມມືກັບຫວຽດນາມໃນການຜະລິດກະສີກຳ, ຂຸດຄົ້ນສິນໃນນ້ຳ, ພັດທະນາປ່າໄມ້, ພ້ອມທັງເພີ່ມທະວີໃນຂົງເຂດຮັກສາສິ່ງແວດລ້ອມ, ປົກປັກຮັກສາສັດປ່າ. ໃນຂອບເຂດການຢ້ຽມຢາມລາຊະອານາຈັກ ອັງກິດຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ, ວັນທີ 23/1, ທ່ານຮອງນາຍົກລັດຖະມົນຕີຫວຽດນາມ ຫງວຽນຊວນຟຸກ ແລະ ຄະນະຜູ້ແທນຂັ້ນສູງຫວຽດນາມໄດ້ມີການໂອ້ລົມສົນທະນາກັບບັນດາ ສ.ສ.ຊ, ແຂກຖືກເຊີນຂອງອັງກິດກ່ຽວກັບສະພາບການຢູ່ຫວຽດນາມ ແລະ ໝາກຜົນກິດຈະການປ່ຽນແປງໃໝ່ຢູ່ຫວຽດນາມ.
ເນື່ອງໃນໂອກາດການຢ້ຽມຢາມຂອງທ່ານ ເລຂາທິການໃຫຍ່ ຫງວຽນຟູ໋ຈ້ອງ , 2 ຝ່າຍໄດ້ອອກຖະແຫຼງການຮ່ວມ. ຖະແຫຼງການຮ່ວມຢັ້ງຢືນວ່າ 2 ຝ່າຍເຫັນດີເປັນເອກະພາບເພີ່ມທະວີການແລກປ່ຽນບັນດາການຢ້ຽມຢາມຂັ້ນສູງ ຄືວິທີປະຕິບັດບັນດາຄາດໝາຍຂອງແຜນການເຄື່ອນໄຫວຄູ່ຮ່ວມມືຍຸດທະສາດປີ 2013. 2 ຝ່າຍສົ່ງເສີມການເພີ່ມທະວີແລກປ່ຽນລະຫວ່າງພັກກອມມູນິດ ຫວຽດນາມ ແລະ ບັນດາພັກການເມືອງຂອງ ອັງກິດ ກໍ່ຄືລະຫວ່າງບັນດາອົງການຂອງພັກກອມມູນິດ ຫວຽດນາມ ແລະ ບັນດາອົງການລັດຖະບານ, ບັນດາອົງການບັນດິດ ແລະ ນະໂຍບາຍຍຸດທະສາດຂອງ ອັງກິດ. ພິເສດ, 2 ຝ່າຍໄດ້ຊົມເຊີຍບົດບາດນຳພາຂອງພັກກອມມູນິດຫວຽດນາມ ໃນການປ້ອງກັນ, ຕ້ານ ການສໍ້ລາດບັງຫຼວງ, ຂົງເຂດເຊິ່ງ ອັງກິດ ແມ່ນຄູ່ຮ່ວມມືອຸປະຖຳອັນດັບໜຶ່ງຢູ່ ຫວຽດນາມ, ແລະ ໃຫ້ຄຳໝັ້ນສັນຍາຈະຮ່ວມມືຢ່າງແໜ້ນແຟ້ນເພື່ອປະຕິບັດແຜນນະໂຍບາຍນີ້. 2 ຝ່າຍ ເນັ້ນໜັກວ່າຈະສະໜັບສະໜູນເລື່ອງໃຫ້ສັດຕະຍາບັນສັນຍາຮ່ວມມື ແລະ ຄູ່ຮ່ວມມືຮອບດ້ານ ຫວຽດນາມ - EU (PCA) ໂດຍໄວ. 2 ຝ່າຍສືບຕໍ່ສະໜັບສະໜູນບັນດາຄວາມມານະພະຍາຍາມເພື່ອແນໃສ່ສ້າງພາກພື້ນອາຊີ ຕາເວັນອອກສ່ຽງໃຕ້ ສັນຕິພາບ, ສະຖຽນລະພາບ, ຮ່ວມມື ແລະ ມິດຕະພາບ, ເນັ້ນໜັກຄວາມຈຳເປັນຕ້ອງຮັບປະກັນຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນທະເລຢູ່ ທະເລຕາເວັນອອກ, ແກ້ໄຂການພິພາດກັນດ້ວຍສັນຕິວິທີ, ບົນພື້ນຖານກົດໝາຍສາກົນ, ເຊິ່ງລວມມີບັນດາເນື້ອໃນທີ່ໄດ້ລະບູໄວ້ໃນສົນທິສັນຍາຂອງສະຫະປະຊາຊາດ ກ່ຽວກັບກົດໝາຍວ່າດ້ວຍທະເລປີ 1982. 2 ຝ່າຍ ຢັ້ງຢືນຄືນໃໝ່ຄວາມສຳຄັນຂອງຖະແຫ່ງການກ່ຽວກັບການປະພຶດລະຫວ່າງຝ່າຍຕ່າງໆ (ຫຼື DOC) ເຊິ່ງໄດ້ລົງນາມເມື່ອປີ 2002 ແລະ ຊົມເຊີຍບັນດາບາດກ້າວເພື່ອແນໃສ່ສ້າງສຳເລັດລະບຽບການກ່ຽວກັບການປະພຶດລະຫວ່າງຝ່າຍຕ່າງໆ (ຫຼື COC) ໂດຍໄວ, ສ້າງກອບກົດໝາຍເພື່ອຄຸ້ມຄອງ ແລະ ດັດສົມການປະພຶດຂອງຝ່າຍຕ່າງໆຢູ່ທະເລຕາເວັນອອກ, ເຊິ່ງລວມມີການແກ້ໄຂການພິພາດກັນ ແລະ ສະກັດກັ້ນການປະທະກັນ. 2 ຝ່າຍໃຫ້ຄຳໝັ້ນສັນຍາສູ້ຊົນບັນລຸຄາດໝາຍຍົກວົງເງິນການຄ້າ 2 ສົ້ນໃຫ້ຂຶ້ນເຖິງ 4 ຕື້ USD ແລະ ການລົງທຶນຂອງ ອັງກິດ ເຂົ້າຫວຽດນາມ ຂຶ້ນເຖິງ 3 ຕື້ USD ໃນປີ 2013 ແລະ ເປັນເອກະພາບເສີມຂະຫຍາຍສາຍພົວພັນຄູ່ຮ່ວມມືຢ່າງແຂງແຮງໃນປະຈຸບັນ, ສຸມໃສ່ເຂົ້າໃນບາງຂົງເຂດຫຼັກແຫຼ່ງຄື: ໜູນຊ່ວຍ ຫວຽດນາມ ປະຕິບັດສຳເລັດບັນດາຄາດໝາຍພັດທະນາສະຫັດສະວັດ (ຫຼື MDGs), ແກ້ໄຂ ແລະ ສະກັດກັ້ນການກະທົບບໍ່ດີຈາກການປ່ຽນແປງຂອງດິນຟ້າອາກາດ. 2 ຝ່າຍມີຄວາມພາກພູມໃຈຮັບຮູ້ການເພີ່ມພົວພັນດ້ານປ້ອງກັນຊາດເພີ່ມລະຫວ່າງ 2 ປະເທດ, ເຊິ່ງສະແດງອອກຜ່ານແນວຄິດເປີດຫ້ອງການທູດການທະຫານ ຫວຽດນາມ ປະຈຳ ລອນດອນ ແລະ ການຢ້ຽມຢາມຫວຽດນາມ ຄັ້ງທຳອິດຂອງຮອງລັດຖະມົນຕີກະຊວງປ້ອງກັນປະເທດລາຊະອານາຈັກ ອັງກິດ.
ກ່ອນໜ້ານັ້ນ, ໃນຂອບເຂດການຢ້ຽມຢາມລາຊະອານາຈັກ ອັງກິດ ຢ່າງເປັນທາງການໃນວັນທີ 23/1, ທ່ານເລຂາທິການໃຫຍ່ ຫງວຽນຟູ໋ຈ້ອງ ໄດ້ວາງພວງມາລາອາໄລຫາ ປະທານ ໂຮ່ຈີມິນ ຢູ່ບອ່ນທີ່ເພີ່ນເຄີຍເຮັດວຽກໃນວິວັດການຊອກຫາເສັ້ນທາງກູ້ຊາດ. ແລະ ກໍ່ໃນວັນດຽວກັນ, ທ່ານລັດຖະມົນຕີການຕ່າງປະເທດຫວຽດນາມ ຟ້າມບິນມິນ ມີການເຮັດວຽກກັບລັດຖະມົນຕີການຕ່າງປະເທດ ອັງກິດ Hugo Swire. ລັດຖະມົນຕີກະຊວງແຜນການ - ລົງທຶນ ບຸ່ຍກວາງວິງ ແລະ ລັດຖະມົນຕີກະຊວງພັດທະນາສາກົນ Alan Duncan ໄດ້ເຊັນບົດບັນທຶກຊ່ວຍຈຳທຳອິດກ່ຽວກັບການຕົກລົງຮ່ວມມືຄູ່ຮ່ວມມືລະຫວ່າງພາກລັດ - ພາກເອກະຊົນ (ຫຼື PPP) ລະຫວ່າງ 2 ປະເທດ.