ທ່ານເລຂາທິການໃຫຍ່ຫງວຽນຟຸ໋ຈ້ອງພົບປະເຈລະຈາກັບທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້
(ທ່ານເລຂາທິການໃຫຍ່ຫງວຽນຟຸ໋ຈ້ອງພົບປະເຈລະຈາກັບ
ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້)
(vovworld) - ວັນທີ 24/11, ທ່ານເລຂາທິການໃຫຍ່ ຫງວຽນຟຸ໋ຈ້ອງ ໄດ້ມີການພົບປະກັນທ່ານນາງກຳມະການກົມການເມືອງ, ປະທານສະພາແຫ່ງຊາດລາວ ປານີ ຢາທໍ່ຕູ້ ຢູ່ນະຄອນຫຼວງວຽງຈັນ. ຢູ່ທີ່ນີ້, ທ່ານເລຂາທິການໃຫຍ່ ຫງວຽນຟຸ໋ຈ້ອງ ຢືນຢັນວ່າ, ຍາມໃດຫວຽດນາມ ກໍຖືເປັນສຳຄັນການພົວພັນຮ່ວມມືຮອບດ້ານ, ຄວາມສາມັກຄີແບບພິເສດກັບລາວ ແລະ ສະໜັບສະໜູນວິວັດແຫ່ງການປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດຂອງປະຊາຊົນ ລາວ ອ້າຍນ້ອງຢ່າງແຮງ. ທ່ານເລຂາທິການໃຫຍ່ ຫງວຽນຟຸ໋ຈ້ອງ ກໍສະເໜີໃຫ້ສະພາແຫ່ງຊາດ ກໍຄືບັນດາກຳມາທິການສະພາແຫ່ງຊາດ 2 ປະເທດ ເພີ່ມທະວີການຮ່ວມມືກ່ວາອີກ, ແລກປ່ຽນຂໍ້ມູນຂ່າວ, ບົດຮຽນ, ວິຊາສະເພາະໃນຂົງເຂດສ້າງກົດໝາຍ, ຕິດຕາມກວດກາ ແລະ ຕັດສິນບັນດາບັນຫາໃຫຍ່ຂອງປະເທດຊາດກວ່າອີກ; ເພີ່ມທະວີໃນການສົມທົບກັນໃນການຕິດຕາມກວດກາ, ເລັ່ງລັດລັດຖະບານ ແລະ ບັນດາກະຊວງ, ຂະແໜງການ, ທ້ອງຖິ່ນ, ວິສາຫະກິດ ປະຕິບັດບັນດາໂຄງການຮ່ວມມືທີ່ໄດ້ລົງນາມໃຫ້ເປັນຢ່າງດີ.
ສ່ວນທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ໄດ້ອວຍພອນໝາກຜົນຂອງກອງປະຊຸມສະໄໝສະມັນເທື່ອທີ 2, ສະພາແຫ່ງຊາດ ຊຸດທີ 14 ຂອງຫວຽດນາມ, ສະແດງຄວາມຂອບໃຈຕໍ່ພັກ, ລັດ, ສະພາແຫ່ງຊາດຫວຽດນາມ ຍາມໃດກໍເອົາໃຈໃສ່ຊ່ວຍເຫຼືອສະພາແຫ່ງຊາດລາວ, ປະກອບສ່ວນເພີ່ມທະວີການຮ່ວມມືລະຫວ່າງ 2 ອົງການສ້າງກົດໝາຍຂອງ 2 ປະເທດ.
ການນຳ 2 ທ່ານໄດ້ເຫັນດີນຳກັນໂດຍຖືວ່າ, ສະພາແຫ່ງຊາດ 2 ປະເທດຕ້ອງສືບຕໍ່ເພີ່ມທະວີການຮ່ວມມື, ຊ່ວຍເຫຼືອ, ຄົ້ນຄວ້າພິຈາລະນາ, ຮ່ຳຮຽນເອົາບົດຮຽນເຊິ່ງກັນ ແລະ ກັນ ເພື່ອພ້ອມກັນຍົກສູງປະສິດທິຜົນແຫ່ງການເຄື່ອນໄຫວຂອງສະພາແຫ່ງຊາດ; ເພີ່ມທະວີການແລກປ່ຽນ, ແລກປ່ຽນຂໍ້ມູນຂ່າວສານ ແລະ ສົມທົບກັນຢ່າງແໜ້ນແຟ້ນໃນບັນດາການເຄື່ອນໄຫວພົວພັນຕ່າງປະເທດ, ໂດຍສະເພາະແມ່ນຢູ່ເວທີປາໄສສາກົນໃຫຍ່.