(vovworld)- ຕອນທ່ຽງວັນທີ 4/10, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູຈ້ອງ ໄດ້ກັບຄືນເມືອຮອດນະຄອນຫລວງ ຮ່າໂນ້ຍ ສິ້ນສຸດການຢ້ຽມຢາມທາງລັດຖະກິດເຖິງ ສເກົາຫລີ ຢ່າງຈົບງາມ. ໃນການຢ້ຽມຢາມ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ເຈລະຈາກັບທ່ານນາງປະທານາທິບໍດີ ສເກົາຫລີ Park Geun Hye, ພົບປະແລກປ່ຽນຄຳເຫັນກັບປະທານສະພາແຫ່ງຊາດ, ນາຍົກລັດຖະມົນຕີ ສເກົາຫລີ ແລະ ພົບປະກັບການນຳບາງກຸ່ມບໍລິສັດເສດຖະກິດ, ສະມາຄົມມິດຕະພາບ ສເກົາຫລີ -ຫວຽດນາມ, ຢ້ຽມຢາມນະຄອນ Busan ແລະ ຮາກຖານເສດຖະກິດວັດທະນະທຳຈຳນວນຫນຶ່ງຂອງ ສເກົາຫລີ.
ສິ້ນສຸດການຢ້ຽມຢາມ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ສົ່ງໂທລະເລກຂອບອົກຂອບໃຈມາຍັງທ່ານນາງປະທານາທິບໍດີ Park Geun Hye. ທ່ານເລຂາທິການໃຫຍ່ ຫງວຽນຟູຈ້ອງ ເຊື່ອໝັ້ນວ່າ ໝາກຜົນອັນຕັ້ງຫນ້າຂອງການຢ້ຽມຢາມຄັ້ງນີ້ ຈະປະກອບສ່ວນສຳຄັນເພີ່ມະທວີນ້ຳໃຈມິດຕະພາບ, ຍູ້ແຮງການພົວພັນຮ່ວມມືຍຸດທະສາດລະຫວ່າງສອງປະເທດຢ່າງຮອບດ້ານ ແລະ ເລິກເຊິ່ງກວ່າ.
ກ່ອນຫນ້ານັ້ນ ເມື່ອຕອບຄຳຖາມຂອງນັກຂ່າວກຽວກັບໝາກຜົນການຢ້ຽມຢາມ ສເກົາຫລີ ຂອງທ່ານເລຂາທິການໃຫຍ່ ຫງວຽນຟູຈ້ອງ, ທ່ານ ຮ່ວາງບີງກວນ, ກຳມະການສູນກາງພັກ, ຫົວຫນ້າຄະນະພົວພັນຕ່າງປະເທດ ເວົ້າວ່າ: ການພົວພັນລະຫວ່າງ ຫວຽດນາມ ແລະ ສເກົາຫລີ ມີແງ່ຫວັງອັນດີງາມ. ສອງປະເທດໄດ້ເຫັນດີເປັນເອກະສັນກ່ຽວກັບຖະແຫລງການຮ່ວມ 7 ຂໍ້. ສອງຝ່າຍສູ້ຊົນນຳວົງເງິນການຄ້າສອງຝ່າຍໃຫ້ຂຶ້ນເຖິງ 70 ຕື້ USD ໃນປີ 2020.