ທ່ານເລຂາທິການໃຫຍ່ ຫງວຽນຟູຈ້ອງ ແລະ ປະທານາທິບໍດີ
ອາເມລິກາ B.Obama
|
(vovworld)- ຕອນເຊົ້າວັນທີ 7/7 ຕາມເວລາອາເມລິກາ, ຢູ່ທຳນຽບຂາວທີ່ນະຄອນຫລວງ ວໍຊິງຕັນ, ສະຫະລັດອາເມລິກາ, ໄດ້ດຳເນີນການເຈລະຈາລະຫວ່າງທ່ານເລຂາທິການໃຫຍ່ ຫງວຽນຟູຈ້ອງ ແລະ ປະທານາທິບໍດີ ອາເມລິກາ B.Obama. ທ່ານ ປະທານາທິບໍດີ ອາເມລິກາ B.Obama ໄດ້ຊົມເຊີຍທ່ານເລຂາທິການໃຫຍ່ຫງວຽນຟູຈ້ອງ ແລະ ຄະນະຜູ້ແທນຂັ້ນສູງຫວຽດນາມ ມາຢ້ຽມຢາມ ອາເມລິກາ ຢ່າງເປັນທາງການ. ປະທານາທິບໍດີ ອາເມລິກາ B.Obama ເນັ້ນຫນັກວ່າ: ອາເມລິກາ ຖືເປັນສຳຄັນການພົວພັນກັບຫວຽດນາມ ແລະ ບົດບາດຂອງຫວຽດນາມ ຢູ່ພາກພື້ນ ອາຊີ ປາຊີຟີກ, ສະແດງຄວາມປາດຖະຫນາຢາກເພີ່ມທະວີການພົວພັນລະຫວ່າງ ອາເມລິກາ ແລະ ຫວຽດນາມ ໃນໄລຍະຈະມາເຖິງ ເພື່ອຜົນປະໂຫຍດຂອງສອງປະເທດ ແລະ ຂອງພາກພື້ນ. ທ່ານເລຂາທິການໃຫຍ່ ຫງວຽນຟູຈ້ອງ ຢືນຢັນ: ຫວຽດນາມ ຖືເປັນສຳຄັນການພັດທະນາກັບ ອາເມລິກາ ແມ່ນແຜນນະໂຍບາຍສະເໝີຕົ້ນສະເຫມີປາຍ ແລະ ຍາວນານຂອງຫວຽດນາມ. ສອງຝ່າຍແລກປ່ຽນ ແລະ ເຫັນດີກ່ຽວກັບບັນດາການກຳນົດທິດໃຫຍ່ ເພື່ອພັດທະນາການພົວພັນສອງຝ່າຍ. ການນຳສອງທ່ານ ກໍແລກປ່ຽນກ່ຽວກັບບັນຫາສິດທິມະນຸດ ແລະ ສະແດງຄວາມປາດຖະຫນາຢາກສືບຕໍ່ການເຈລະຈາ ແລະ ເພີ່ມທະວີການຮ່ວມມືໃນຂົງເຂດນີ້ ດ້ວຍຈິດໃຈເປີດເຜີຍ ແລະ ສ້າງສັນ. ສອງຝ່າຍແລກປ່ຽນບາງບັນຫາພາກພື້ນ ແລະ ສາກົນຊື່ງຕ່າງຝ່າຍຕ່າງມີຄວາມສົນໃຈ. ການນຳສອງທ່ານເຫັນດີ ຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພ ແລະ ຄວາມເສລີໃນການເດີນທະເລ ແລະ ການບິນຢູ່ທະເລຕາເວັນອອກ ຊື່ງແມ່ນຜົນປະໂຫຍດ ແລະ ຄວາມຮັບຜິດຊອບລວມຂອງປະຊາຄົມພາກພື້ນ ແລະ ສາກົນ, ສະຫນັບສະຫນູນຫລັກການແກ້ໄຂການຂັດແຍ້ງໂດຍສັນຕິວິທີ ບົນພື້ນຖານເຄົາລົບກົດໝາຍສາກົນ.
ກ່ຽວກັບການພົວພັນລະຫວ່່າງ ອາເມລິກາ ແລະ ອາຊຽນ, ທ່ານເລຂາທິການໃຫຍ່ ຫງວຽນຟູຈ້ອງ ໃຫ້ຮູ້ວ່າ: ຫວຽດນາມ ສະຫນັບສະຫນູນເລື່ອງຍົກລະດັບການພົວພັນລະຫວ່າງ ອາເມລິກາ ແລະ ອາຊຽນ ຂຶ້ນສູ່ລະດັບຄູ່ຮ່ວມມືຍຸດທະສາດ ແລະ ຈະສົມທົບກັບອາເມລິກາ ແລະ ບັນດາປະເທດກ່ຽວຂ້ອງອື່ນ ເພື່ອເສີມຂະຫຍາຍບົດບາດໃຈກາງຂອງ ອາຊຽນ, ຮັບປະກັນປະສິດທິຜົນຂອງບັນດາເວທີປາໄສພາກພື້ນ ອາຊຽນ, ກອງປະຊຸມລັດຖະມົນຕີກະຊວງປ້ອງກັນປະເທດ ອາຊຽນ ເປີດກວ້າງ ADMM+, ເວທີປາໄສການຮ່ວມມືເສດຖະກິດ ອາຊີ ປາຊີຟີກ APEC ແລະ ກອງປະຊຸມສຸດຍອດ ອາຊີຕາເວັນອອກ EAS ໃນການຮັກສາສັນຕິພາບ, ຄວາມໝັ້ນຄົງ ກໍຄືໃນການເຈລະຈາກ່ຽວກັບເສດຖະກິດ, ການເມືອງຢູ່ພາກພື້ນ. ທ່ານເລຂາທິການໃຫຍ່ ຫງວຽນຟູຈ້ອງ ເຊື້ອເຊີນທ່ານປະທານາທິບໍດີ ອາເມລິກາ B. Obama ມາຢ້ຽມຢາມຫວຽດນາມ ໂດຍໄວ. ທ່ານປະທານາທິບໍດີ ອາເມລິກາ B. Obama ສະແດງຄວາມຂອບອົກຂອບໃຈ ແລະ ຮັບຄຳເຊີນ.
ພາຍຫລັງການເຈລະຈາ, ທ່ານເລຂາທິການໃຫຍ່ ຫງວຽນຟູຈ້ອງ ແລະ ປະທານາທິບໍດີ ອາເມລິກາ B. Obama ໄດ້ພົບປະກັບນັກຂ່າວ. ທ່ານປະທານາທິບໍດີ ອາເມລິກາ B. Obama ຖືວ່າ: ໃນສັດຕະວັດທີ 20, ເຖິງວ່າ ສອງປະເທດ ມີປະຫວັດສາດ ໂສກເສົ້າຫງ່ວມເຫງົາ, ປັດຊະຍາການເມືອງ, ລະບົບການເມືອງສອງປະເທດຍັງມີຄວາມແຕກຕ່າງກັນກໍຕາມ ແຕ່ການຊີ້ນຳນຳພາຂອງອາມເລິກາ ແລະ ຫວຽດນາມ, ການຮ່ວມມືໂດຍອີງໃສ່ພື້ນຖານເພື່ອຜົນປະໂຫຍດ ແລະ ຄວາມຜາສຸກຂອງປະຊາຊົນ ໄດ້ນຳມາເຊິ່ງບັນດາຜົນງານອັນດີງາມໃນຫລາຍຂົງເຂດ, ເປັນຕົ້ນແມ່ນໃນໄລຍະມໍ່ໆມານີ້. ທ່ານປະທານາທິບໍດີ ອາເມລິກາ B. Obama ໃຫ້ຮູ້ວ່າ:
“ຂ້າພະເຈົ້າ ແລະ ທ່ານເລຂາທິການໃຫຍ່ ຫງວຽນຟູຈ້ອງ ໄດ້ພ້ອມກັນປືກສາຫາລືກ່ຽວກັບສັນຍາ TPP ຊື່ງແມ່ນສັນຍາສຳຄັນສາມາດຊ່ວຍຍົກສູງບັນດາມາດຕະຖານ, ຄືມາດຕະຖານກ່ຽວກັບແຮງງານ, ສິ່ງແວດລ້ອມ ສາມາດນຳມາເຊິ່ງຄວາມວັດທະນາຖາວອນກໍຄືວຽກເຮັດງານທຳໃຫ້ທັງປະຊາຊົນ ອາເມລິກາ ແລະ ຫວຽດນາມ. ພວກຂ້າພະເຈົ້າກໍໄດ້ປຶກສາຫາລືກ່ຽວກັບການສະຫນອງບັນດາຄວາມຕ້ອງການທີ່ຈຳເປັນເພື່ອແກ້ໄຂການຂັດແຍ້ງຢູ່ທະເລຕາເວັນອອກຜ່ານມາດຕະການແກ້ໄຂໂດຍສັນຕິ ແລະ ຕ້ອງເຄົາລົບກົດໝາຍສາກົນ. ພວກຂ້າພະເຈົ້າກໍໄດ້ປຶກສາຫາລືກ່ຽວກັບການພົວພັນແລກປ່ຽນລະຫວ່າງປະຊາຊົນ.
ສ່ວນທ່ານເລຂາທິການໃຫຍ່ ຫງວຽນຟູຈ້ອງ ຊີ້ແຈ້ງວ່າ: ຫວຽດນາມ ແລະ ອາເມລິກາ ໄດ້ກາຍເປັນເພື່ອນ, ຄູ່ຮ່ວມມືຮອບດ້ານ ແລະ ໃນອະນາຄົດ, ການພົວພັນນັ້ນຈະສືບຕໍ່ພັດທະນາຢ່າງຈົບງາມກ່ວາ.
“ເມື່ອຫວນຄືນ ຢ່າງຮອບດ້ານກ່ຽວກັບການພົວພັນລະຫວ່າງສອງປະເທດໃນໄລຍະຜ່ານມາ, ເປັນຕົ້ນໃນ 20 ປີຜ່ານມາ, ພວກຂ້າພະເຈົ້າ ໄດ້ແລກປ່ຽນຢ່າງເລິກເຊິ່ງ ກວ້າງຂວາງ ແລະ ຮອບດ້ານ, ມຸ່ງໄປເຖິງ ສອງປະເທດຕ້ອງສືບຕໍ່ພັດທະນາການພົວພັນອັນດີງາມກວ່າອີກ, ມີຄຸນນະພາບກວ່າ, ຮອບດ້ານກວ່າ.”
ພາຍຫລັງການເຈລະຈາ, ທ່ານເລຂາທິການໃຫຍ່ ຫງວຽນຟູຈ້ອງ ແລະ ທ່ານປະທານາທິບໍດີ ອາເມລິກາ B. Obama ໄດ້ຮັບຮອງເອົາຖະແຫລງການກ່ຽວກັບວິໄສທັດຮ່ວມ ຫວຽດນາມ - ອາເມລິກາ.