ທ່ານເອກອັກຄະລັດຖະທູດ ຟ້າມແຊງເຈົາ
(vovworld) - ວັນທີ 27/4, ໃນຂອບເຂດກອງປະຊຸມສະພາບໍລິຫານ UNESCO ຄັ້ງທີ 201 ເຊິ່ງດຳເນີນຢູ່ ປາຣີ. ທ່ານເອກອັກຄະລັດຖະທູດ ຟ້າມແຊງເຈົາ, ຜູ້ຊ່ວຍລັດຖະມົນຕີການຕ່າງປະເທດ ໄດ້ລາຍງານຕໍ່ສະພາບໍລິຫານຂອງ UNESCO ແລະ ບັນດາເອກອັກຄະລັດຖະທູດບັນດາປະເທດສະມາຊິກ, ໂຄງການດຳເນີນງານ, ດ້ວຍຖານະເປັນຜູ້ອອກສະໝັກເລືອກຕັ້ງເປັນຜູ້ອຳນວຍການ UNESCO.
ໃນໂຄງການດຳເນີນງານ, ທ່ານເອກອັກຄະລັດຖະທູດ ຟ້າມແຊງເຈົາ ໄດ້ຍົກອອກ 3 ສານໃຫຍ່ກ່ຽວກັບວິໄສທັດ UNESCO ດ້ວຍບັນດາຫົວເລື່ອງປ່ຽນໃໝ່ເພື່ອໃຫ້ການເຄື່ອນໄຫວຂອງອົງການນີ້ນັບມື້ນັບມີປະສິດທິຜົນ. ຕໍ່ຈາກນັ້ນ, ທ່ານເອກອັກຄະລັດຖະທູດ ຟ້າມແຊງເຈົາ ໄດ້ຕອບບັນດາຄຳຖາມຂອງບັນດາສະມາຊິກ ສະພາບໍລິຫານ ເພື່ອແນໃສ່ເຮັດແຈ້ງທັດສະນະຂອງທ່ານກ່ຽວກັບການແກ້ໄຂບັນດາການທ້າທາຍທີ່ພວມວາງອອກໃຫ້ UNESCO.
“ທີໜຶ່ງ, UNESCO ຕ້ອງສືບຕໍ່ພາລະໜ້າທີ່ສັນຕິພາບ, ເພາະວ່ານັ້ນແມ່ນພາລະໜ້າທີ່ອັນສູງສົ່ງ, ສັກກະລະບູຊາ, ເຊິ່ງກົດບັດຂອງ UNESCO ໄດ້ກຳນົດແລ້ວ. ທີສອງແມ່ນ UNESCO ຕ້ອງສືບຕໍ່ວິວັດການປະຕິຮູບ. UNESCO ໄດ້ປະຕິຮູບ, ພວມປະຕິຮູບ ແລະ ຄວນສືບຕໍ່ປະຕິຮູບ ເພື່ອກາຍເປັນອົງການທີ່ມີປະສິດທິຜົນກວ່າ, ຂະຫຍັນຂັນເຄື່ອນກວ່າ, ສາມາດຮ່ວມມືດີກວ່າ ແລະ ກຳນົດທີ່ຕັ້ງຂອງຕົນຄືນໃໝ່ໃນລະບົບຂອງສະຫະປະຊາຊາດ. ທີສາມແມ່ນ UNESCO ຄວນເຮັດວຽກງານໂຄສະນາໃຫ້ດີກວ່າ ເພື່ອໃຫ້ໂລກເຂົ້າໃຈແຈ້ງ, UNESCO ບໍ່ພຽງແຕ່ເຮັດກ່ຽວກັບດ້ານວັດທະນະທຳ, ການສຶກສາເທົ່ານັ້ນ, ຫາກ UNESCO ຍັງມີຄວາມແຮງໃນຂົງເຂດວິທະຍາສາດທຳມະຊາດ, ວິທະຍາສາດສັງຄົມອີກດ້ວຍ, ແລະພວມຕັດສິນໃຈສ້າງສັງຄົມແຫ່ງຂໍ້ມູນຂ່າວສານ, ຢູ່ທີ່ນັ້ນທຸກຄົນມີສິດສຳຜັດກັບຂໍ້ມູນຂ່າວ“.
ການລາຍງານດ້ວຍພາສາອັງກິດຂອງທ່ານເອກອັກຄະລັດຖະທູດ ຟ້າມແຊງເຈົາ ໄດ້ຮັບການຕີລາຄາສູງຈາກເພື່ອນມິດສາກົນວ່າມີຄວາມຈະແຈ້ງ, logic, ດ້ວຍບັນດາຂໍ້ສະເໜີທີ່ມີລັກສະນະເປັນໄປສູງ. ພາຍຫຼັງການປາຖະກະຖາ, ເພື່ອນມິດສາກົນຫຼາຍຄົນໄດ້ມາອວຍພອນທ່ານ. ນີ້ເປັນຄັ້ງທຳອິດທີ່ ຫວຽດນາມ ສະເໜີຜູ້ອອກສະໝັກເລືອກຕັ້ງທ່ານໜຶ່ງເຂົ້າອົງການຈັດຕັ້ງສາກົນທີ່ສຳຄັນ.