ທາບທາມດ້ານການເມືອງລະຫວ່າງກະຊວງການ ຕ່າງປະເທດຫວຽດນາມ ແລະ ກະຊວງການຕ່າງປະເທດ ສ.ສະໂລເວເນຍ ແລະ ສ. ກຣົວຊີ
(ທາບທາມດ້ານການເມືອງລະຫວ່າງ ກະຊວງການຕ່າງປະເທດຫວຽດນາມ
ແລະ ກະຊວງການຕ່າງປະເທດ ສ.ສະໂລເວເນຍ ແລະ ສ. ກຣົວຊີ)
(vovworld)- ເນື່ອງໃນໂອກາດສະເຫຼີມສະຫຼອງ 20 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ ກັບ ສ.ສະໂລເວເນຍ ແລະ ສ. ກຣົວຊີ, ແຕ່ວັນທີ 7-9/7/2014, ທ່ານຮອງລັດຖະມົນຕີການຕ່າງປະເທດຫວຽດນາມ ບຸຍແທງເຊີນ ໄດ້ໄປຢ້ຽມຢາມ ແລະ ດຳເນີນການທາບທາມດ້ານການເມືອງກັບກະຊວງການຕ່າງປະເທດຂອງ 2 ປະເທດດັ່ງກ່າວ.
ທີ່ການທາບທາມດ້ານການເມືອງ ແລະ ການພົບປະຄັ້ງຕ່າງໆ, ຄະນະຜູ້ແທນຫວຽດນາມ ແລະ 2 ປະເທດໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ-ສັງຄົມຂອງແຕ່ລະປະເທດ, ແລກປ່ຽນບັນດາມາດຕະການເພີ່ມທະວີການພົວພັນ 2 ຝ່າຍ ແລະ ບາງບັນຫາທີ່ພາກພື້ນ ແລະ ສາກົນທີ່ມີຄວາມສົນໃຈ. 2ປະເທດ ສ.ສະໂລເວເນຍ ແລະ ສ. ກຣົວຊີໄດ້ຕີລາຄາສູງບັນດາຜົນງານຊຶ່ງຫວຽດນາມຍາດມາໄດ້ໃນກິດຈະການພັດທະນາເສດຖະກິດ-ສັງຄົມ ແລະ ເຊື່ອມໂຍງເຂົ້າກັບສາກົນກໍຄືບົດບາດນັບມື້ນັບເພີ່ມຂຶ້ນຂອງຫວຽດນາມໃນອາຊີຕາເວັນອອກສ່ຽງໃຕ້. ສ.ສະໂລເວເນຍ ແລະ ສ. ກຣວາດເຕຍ ສະໜັບສະໜູນເລື່ອງ EU ໃຫ້ສັດຕະຍາບັນສັນຍາຄູ່ຮ່ວມມື ແລະ ການຮ່ວມມືຮອບດ້ານຫວຽດນາມ- EU ໂດຍໄວ ແລະ ສຳເລັດການເຈລະຈາສັນຍາການຄ້າເສລີຫວຽດນາມ- EU ໂດຍໄວ ຄືໃນທ້າຍປີນີ້.
ຫວຽດນາມ ແລະ ສ.ສະໂລເວເນຍ , ສ. ກຣົວຊີ ຕີລາຄາສູງແງ່ຫວັງຮ່ວມມື 2 ຝ່າຍໃນບັນດາຂົງເຂດຄື ການຄ້າ-ການລົງທຶນ, ກະສີກຳ, ຕໍ່ກຳປັ່ນ, ຂົນສົ່ງ-ທ່າກຳປັ່ນທະເລ, ສາທາລະນະສຸກ, ການປ້ອງກັນຊາດ, ການສຶກສາ, ທ່ອງທ່ຽວ, ການເກັບກູ້ລະເບີດຍັງບໍ່ທັນແຕກ, ການຮ່ວມມື 3 ຝ່າຍໃນຂອບເຂດສະຫະປະຊາຊາດ ແລະ EU; ເປັນເອກະສັນກັນສ້າງເງື່ອນໄຂໃຫ້ແກ່ບັນດາວິສາຫະກິດ 2 ຝ່າຍໄດ້ພົບປະກັນ, ຊອກຮູ້ຕະຫຼາດ ແລະ ກາລະໂອກາດຮ່ວມມືດຳເນີນທຸລະກິດ….
ກ່ຽວກັບບັນຫາທະເລຕາເວັນອອກ, ສ.ສະໂລເວເນຍ ແລະ ສ. ກຣົວຊີ ຕ່າງກໍສະແດງຄວາມວິຕົກກັງວົນຕໍ່ການຜັນແປທີ່ເຄັ່ງຕຶງໃນມໍ່ໆມານີ້ ຂະນະທີີ່ຈີນຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ; ຕີລາຄາສູງການລະງັບໃຈຂອງຫວຽດນາມ; ສະໜັບສະໜູນທັດສະນະລວມຂອງບັນດາປະເທດ EU ກ່ຽວກັບການແກ້ໄຂການຂັດແຍ້ງດ້ວຍມາດຕະການໂດຍສັນຕິວິທີ, ບົນພື້ນຖານເຄົາລົບກົດໝາຍສາກົນ ເປັນຕົ້ນແມ່ນສົນທິສັນຍາ ສ.ປ.ຊ ກ່ຽວກັບກົດໝາຍທະເລປີ 1982.