ວິທະຍຸກະຈາຍສຽງປົດປ່ອຍ
(vovworld)-ຕອນເຊົ້າວັນທີ 11/2, ນະຄອນ ໂຮ່ຈີມິນ ໄດ້ຈັດພິທີສະເຫຼີມສະຫຼອງ 50 ປີ ແຫ່ງວັນສ້າງຕັ້ງວິທະຍຸກະຈາຍສຽງປົດປ່ອຍ (1/2/1962-1/2/2012), ໝາຍເຖິງວິທະຍຸກະຈາຍສຽງປະຊາຊົນນະຄອນ ໂຮ່ຈີມິນ ໃນປະຈຸບັນ. ກ່າວຄວາມເຫັນນະພິທີ, ທ່ານ ເລແທງຫາຍ, ເລຂາຄະນະພັກນະຄອນ ໂຮ່ຈີມິນ, ເນັ້ນໜັກວ່າ ວິທະຍຸກະຈາຍສຽງປະຊາຊົນນະຄອນ ໂຮ່ຈີມິນ ໄດ້ກາຍເປັນກະບອກສຽງທີ່ສຳຄັນຂອງອົງຄະນະພັກ, ອຳນາດການປົກຄອງ ແລະ ປະຊາຊົນນະຄອນ, ເຊິ່ງໄດ້ມີການປະກອບສ່ວນສຳຄັນໃນກິດຈະການຕໍ່ສູ້, ສ້າງສາ ແລະປົກປັກຮັກສານະຄອນທີ່ໃສ່ຊື່ ປະທານໂຮ່ຈີມິນ. ທາງວິທະຍຸຄວນສຸມໃສ່ເຂົ້າໃນການປັບປຸງ ແລະ ຍົກສູງຄຸນນະພາບດ້ານວິຊາການຢ່າງບໍ່ຢຸດຢັ້ງ ເພື່ອຕອບສະໜອງໜ້າທີ່ຂອງສະພາບການໃໝ່.
ທາງວິທະຍຸກະຈາຍສຽງປະຊາຊົນນະຄອນ ໂຮ່ຈີມິນ ຄວນສູ້ຊົນກວ່າອີກ ເພື່ອສົມກັບມູນເຊື້ອອັນສະຫງ່າລາສີ, ຄວາມສຸດຈິດສຸດໃຈ, ການເສຍສະຫຼະຂອງພະນັກງານລຸ້ນຕ່າງໆ ກໍ່ຄືຄວາມປາຖະໜາຂອງປະຊາຊົນນະຄອນ. ໃນໄລຍະຈະມາເຖິງ, ທາງວິທະຍຸກະຈາຍສຽງປະຊາຊົນນະຄອນ ໂຮ່ຈີມິນ ຄວນປັບປຸງ, ຍົກສູງຄຸນນະພາບດ້ານວິຊາການຢ່າງບໍ່ຢຸດຢັ້ງ, ສ່ອງແສງຂໍ້ມູນຂ່າວຢ່າງທັນການ ແລະ ເດັດດຽວຕໍ່ສູ້ຕ້ານຄວາມຫຍໍ້ທໍ້, ປຸກລະດົມຈິດໃຈແຂ່ງຂັນຮັກຊາດຂອງພະນັກງານສະມາຊິກພັກ ແລະ ປະຊາຊົນ.