(vovworld) - ຕອນຄໍ່າວັນທີ 04/02, ຄະນະພັກ, ຄະນະກຳມະການປະຊາຊົນນະຄອນໂຮ່ຈິມິນ ໄດ້ຈັດງານພົບປະສັງສັນກັບຊາວຫວຽດນາມ ອາໄສຢູ່ຕ່າງປະເທດປະມານ 800 ຄົນ ເນື່ອງໃນໂອກາດບຸນປີໃໝ່ ປີມະເສງ 2013. ໂດຍຕາງໜ້າການນຳນະຄອນໂຮ່ຈິມິນ, ທ່ານປະທານຄະນະກຳມະການປະຊາຊົນນະຄອນໂຮ່ຈິມິນ ເລຮ່ວາງກວນ ໄດ້ຮັບຮູ້ບັນດາການປະກອບສ່ວນຂອງຊາວຫວຽດນາມ ອາໄສຢູ່ຕ່າງປະເທດ ໃນພາລະກິດສ້າງສາ ແລະ ພັດທະນາປະເທດຊາດເວົ້າລວມ ແລະ ນະຄອນໂຮ່ຈິມິນເວົ້າສະເພາະ, ພ້ອມທັງປາດຖະໜາວ່າ ພໍ່ແມ່ປະຊາຊົນຈະສືບຕໍ່ໄດ້ມີການອຸທິດສ່ວນ, ປະກອບສ່ວນຫຼາຍກວ່າອີກໃຫ້ແກ່ປະເທດຊາດໃນທຸກຂົງເຂດ, ກາຍເປັນຂົວເຊື່ອມຕໍ່ມິດຕະພາບລະຫວ່າງຫວຽດນາມ, ນະຄອນໂຮ່ຈິນມິນ ກັບເພື່ອນມິດສະກົນ. ປະຈຸບັນ, ໃນບໍລິເວນນະຄອນມີຜູ້ຊ່ຽວຊານ, ນັກປັນຍາຊົນ 400 ຄົນເຊິ່ງແມ່ນຊາວຫວຽດນາມ ອາໄສຢູ່ຕ່າງປະເທດພວມດຳລົງຊີວິດ ແລະ ເຮັດວຽກ, ມີຊາວຫວຽດນາມ ອາໄສຢູ່ຕ່າງປະເທດກວ່າ 200 ຄົນໄດ້ມີການຮ່ວມງານເປັນປະຈຳກັບບັນດາສະຖາບັນ, ມະຫາວິທະຍາໄລ, ບໍລິສັດ, ໂຮງໝໍ ຂອງນະຄອນ. ນອກຈາກນັ້ນ, ໃນບໍລິເວນນະຄອນໂຮ່ຈິມິນ ຍັງມີວິສາຫະກິດ 2.500 ແຫ່ງທີ່ມີເງິນລົງທຶນຂອງຊາວຫວຽດນາມ ອາໄສຢູ່ຕ່າງປະເທດ ດ້ວຍຍອດມູນຄ່າກວ່າ 50.000 ຕື້ດົງ.