ນະຄອນ ໂຮ່ຈີມິນ ຕີລາຄາສູງຄຸນນະພາບການສຶກສາຂອງ ການາດາ ແລະ ປາດຖະໜາຢາກຊຸກຍູ້ການຮ່ວມມືກັບ ລັດ Ontario, ປະເທດ ການາດາ ໃນຂົງເຂດການສຶກສາສາມັນ ແລະ ບຳລຸງສ້າງວິຊາຊີບ, ເພື່ອຍົກສູງລະດັບຄວາມຮູ້ຂອງແຫຼ່ງຊັບພະຍາກອນມະນຸດ ແລະ ຄຸນນະພາບສີມືຂອງຜູ້ອອກແຮງງານ. ກ່າວຄຳເຫັນໃນການຕ້ອນຮັບທ່ານນາງ Kathleen Wynne, ຜູ້ວ່າການລັດ Ontario, ໃນຕອນບ່າຍວັນທີ 4 ທັນວາ, ຢູ່ນະຄອນ ໂຮ່ຈີມິນ, ທ່ານ ຫງວຽນແທ່ງຟອງ, ປະທານຄະນະກຳມະການປະຊາຊົນນະຄອນ ໂຮ່ຈີມິນ, ເນັ້ນໜັກວ່າ: ນະຄອນ ໃຫ້ຄຳໝັ້ນສັນຍາຈະສ້າງເງື່ອນໄຂສະດວກທີ່ສຸດໃຫ້ບັນດານັກລົງທຶນລັດ Ontario ທີ່ມາຊອກຮູ້, ສົ່ງເສີມການລົງທຶນ ຢູ່ນະຄອນ ເພື່ອນຳມາເຊິ່ງຜົນສຳເລັດໃຫ້ແກ່ບັນດານັກລົງທຶນ ການາດາ ແລະ ປະກອບສ່ວນຢ່າງຕັ້ງໜ້າເຂົ້າໃນການພັດທະນາຂອງນະຄອນ.

        ສ່ວນທ່ານນາງ Kathleen Wynne ຢັ້ງຢືນວ່າ ລັດ Ontario ພ້ອມແລ້ວໃຫ້ການຮ່ວມມື, ແລກປ່ຽນບົດຮຽນໃນການເຄື່ອນໄຫວບຳລຸງສ້າງຖັນແຖວຄູອາຈານ, ຍົກສູງຄຸນນະພາບການສຶກສາສາມັນ. ໄປຄຽງຄູ່ກັນນັ້ນ, ລັດ Ontario ໄດ້ໝູນໃຊ້ຮູບແບບການຮ່ວມມືພາກລັດ - ເອກະຊົນ (PPP) ປະສົມຜົນສຳເລັດໃນການແກ້ໄຂບັນຫາກໍ່ສ້າງພື້ນຖານໂຄງລ່າງຕົວເມືອງ ແລະ ພ້ອມແລ້ວແບ່ງປັນບົດຮຽນໃນການປະຕິບັດຮູບແບບນີ້ ຢູ່ນະຄອນ ໂຮ່ຈີມິນ.