(vovworld) - ວັນທີ 27/3, ຢູ່ນະຄອນຫຼວງ Seoul, ແຫ່ງ ສ ເກົາຫຼີ, ກອງປະຊຸມສຸດຍອດຄວາມປອດໄພດ້ານນິວເຄຼຍຄັ້ງທີ 2 ໄດ້ຈັດວາລະປະຊຸມຄັ້ງຕ່າງໆໃນໂຄງການດຳເນີນງານຢ່າງເປັນທາງການ. ກອງປະຊຸມມີການເຂົ້າຮ່ວມຂອງປະມຸກລັດ 53 ທ່ານ, ທີ່ນຳໜ້າລັດຖະບານ 53 ປະເທດ ແລະ 4 ອົງການສາກົນ ແມ່ນ ສະຫະປະຊາຊາດ, ສະຫະພາບເອີລົບ, ອົງການພະລັງງານປະລະມານູສາກົນ ແລະ ອົງການຕຳຫຼວດສາກົນ. ກ່າວຄຳເຫັນທີ່ກອງປະຊຸມ, ທ່ານນາຍົກລັດຖະມົນຕີຫວຽດນາມ Nguyen Tan Dung ເນັ້ນໜັກວ່າ: ການຫຼຸດຜ່ອນອາວຸດ ແລະ ບໍ່ແຜ່ຂະຫຍາຍອາວຸດນິວເຄຼຍແມ່ນປັດໃຈສຳຄັນທີ່ສຸດເພື່ອຫຼຸດຜ່ອນໄພຕໍ່ຄວາມສະຫງົບປອດໄພນິວເຄຼຍ ໃນຂະນະທີ່ແຕ່ລະປະເທດກໍມີສິດອັນຊອບທຳໃນການນຳໃຊ້ພະລັງງານ ແລະ ເຕັກໂນໂລຢີນິວເຄຼຍເພື່ອສັນຕິພາບ.
ທ່ານນາຍົກລັດຖະມົນຕີ Nguyen Tan Dung ຢືນຢັນວ່າ: ຫວຽດນາມໄດ້ ແລະ ພວມຕັ້ງໜ້າກໍ່ສ້າງກອບກົດໝາຍ, ໂຄງລ່າງຮັບປະກັນຄວາມປອດໄພ ແລະ ເຂົ້າຮ່ວມບັນດາສົນທິສັນຍາສາກົນ, ບັນດາຂໍ້ລິ້ເລີ່ມທີ່ກ່ຽວຂ້ອງເພື່ອຜັນຂະຫຍາຍປະຕິບັດບັນດາຄຳໝັ້ນສັນຍາຂອງຕົນຢ່າງມີປະສິດທິຜົນ, ພິເສດແມ່ນພາຍຫຼັງກອງປະຊຸມສຸດຍອດຄວາມປອດໄພນິວເຄຼຍຄັ້ງທີ 1. ຫວຽດນາມພວມຕັ້ງໜ້າເຂົ້າຮ່ວມການເຄື່ອນໄຫວຕ່າງໆຂອງຂໍ້ລິເລີ່ມທ່ົວໂລກຕ້ານກໍ່ການຮ້າຍດ້ວຍນິວເຄຼຍ ແລະ ພວມຕັ້ງໜ້າພິຈາລະນາ ເພື່ອອະນຸມັດຜ່ານອະນຸສັນຍາສະບັບປັບປຸງ. ຫວຽດນາມກໍພວມພ້ອມກັບບັນດາສະມາຊິກ ອາຊຽນ ອື່ນສືບຕໍ່ຊຸກຍູ້ການສ້າງພາກພື້ນອາຊີຕາເວັນອອກສ່ຽງໃຕ້ສັນຕິພາບ, ສະຖຽນລະພາບ ແລະ ປອດອາວຸດນິວເຄຼຍ, ໃນນັ້ນມີການສົ່ງເສີມບັນດາປະເທດມີອາວຸດນິວເຄຼຍເຂົ້າຮ່ວມອະນຸສັນຍາຂອງອາຊີຕາເວັນອອກສ່ຽງໃຕ້ປອດອາວຸດນິວເຄຼຍໂດຍໄວ. ອີກເທື່ອໜຶ່ງ, ທ່ານນາຍົກລັດຖະມົນຕີຢືນຢັນຄວາມຕັດສິນໃຈຂອງຫວຽດນາມພັດທະນາໂຄງການໄຟຟ້ານິວເຄຼຍ ເພື່ອຕອບສະໜອງຄວາມຕ້ອງການຄວາມໝັ້ນຄົງດ້ານພະລັງງານແຫ່ງຊາດ.
ສິ້ນສຸດກອງປະຊຸມສຸດຍອດຄວາມປອດໄພດ້ານນິວເຄຼຍຄັ້ງທີ 2, ທ່ານນາຍົກລັດຖະມົນຕີ Nguyen Tan Dung ພ້ອມກັບການນຳບັນດາປະເທດເຫັນດີເປັນເອກະສັນກັນຮັບຮອງເອົາຖະແຫຼງການຮ່ວມຂອງກອງປະຊຸມ, ຢືນຢັນຄວາມຕັດສິນໃຈຍູ້ແຮງມາດຕະການຕ່າງໆເພື່ອຮັບປະກັນຄວາມສະຫງົບປອດໄພ ໃນ 11 ບັນຫາໃຫຍ່.
ນາຍົກລັດຖະມົນຕີ ຫວຽດນາມ ແລະ New Zealand
(ພາບ: thutuongnguyentandung.net)
ຢູ່ນອກກອງປະຊຸມສຸດຍອດຄວາມປອດໄພດ້ານນິວເຄຼຍຄັ້ງທີ 2 ຊຶ່ງຈັດຂຶ້ນຢູ່ນະຄອນຫຼວງ Seoul ສ ເກົາຫຼີ, ໃນວັນທີ 27/3, ທ່ານນາຍົກລັດຖະມົນຕີ Nguyen Tan Dung ໄດ້ມີການພົບປະກັບນາຍົກລັດຖະມົນຕີ New Zealand Jonh Key, ຮອງນາຍົກລັດຖະມົນຕີລາຊະອານາຈັກອັງກິດ Nick Clegg ແລະ ນາຍົກລັດຖະມົນຕີ ປາກິດສະຖານ Yousaf Raza Gillani.
ທ່ານນາຍົກລັດຖະມົນຕີ Nguyen Tan Dung ແລະ ທ່ານ ນາຍົກລັດຖະມົນຕີ New Zealand Jonh Key ໄດ້ເຫັນດີເປັນເອກະສັນກັນຍູ້ແຮງການຜັນຂະຫຍາຍສັນຍາການຄ້າເສລີອາຊຽນ - ອົດສະຕາລີ - New Zealand, ເພີ່ມທະວີການສົ່ງເສີມການຄ້າ, ການລົງທຶນ, ສ້າງເງື່ອນໄຂເພື່ອໃຫ້ວິສາຫະກິດ 2 ປະເທດຊອກຫາກາລະໂອກາດດຳເນີນທຸລະກິດ, ເພີ່ມທະວີການລົງທຶນໃນຂົງເຂດສຶກສາ, ແຮງງານ... ນາຍົກລັດຖະມົນຕີທັງ 2 ທ່ານ ໄດ້ເຫັນດີເປັນເອກະສັນກັນເພີ່ມທະວີໃນບັນດາຂົງເຂດມີທ່າແຮງຂອງ 2 ປະເທດ ແລະ ໃນບັນດາເວທີປາໄສສາກົນຕ່າງໆ.
ໃນການພົບປະກັບທ່ານນາຍົກລັດຖະມົນຕີ ປາກິດສະຖານ Yousaf Raza Gillani. ນາຍົກລັດຖະມົນຕີທັງ 2 ທ່ານກໍເຫັນດີເປັນເອກະສັນກັນ ເພີ່ມທະວີບັນດາການຢ້ຽມຢາມ, ພົບປະຂັ້ນສູງ ແລະ ລະຫວ່າງບັນດາກະຊວງ, ຂະແໜງການ, ທ້ອງຖິ່ນ ແລະ ວິສາຫະກິດ 2 ປະເທດໃນໄລຍະຈະມາເຖິງ, ພ້ອມທັງຕັ້ງໜ້າໃນການຜັນຂະຫຍາຍບັນດາຂໍ້ຕົກລົງທີ່ກອງປະຊຸມຂອງຄະນະກຳມະການປະສົມຫວຽດນາມ - ປາກິດສະຖານ ຄັ້ງທີ 2 (2010) ແລະ ກອງປະຊຸມອະນຸກຳມະການການຄ້າຫວຽດນາມ - ປາກິດສະຖານຄັ້ງທີ 1 ຢູ່ຮ່າໂນ້ຍ (2011).
ໃນການພົບປະກັບທ່ານຮອງນາຍົກລັດຖະມົນຕີລາຊະອານາຈັກອັງກິດ Nick Clegg, ທ່ານນາຍົກລັດຖະມົນຕີ Nguyen Tan Dung ແລະ ທ່ານຮອງນາຍົກລັດຖະມົນຕີລາຊະອານາຈັກອັງກິດ Nick Clegg ເຫັນດີເປັນເອກະສັນກັນໃນໄລຍະທີ່ຈະມາເຖິງ, 2 ຝ່າຍຄວນສ້າງທຸກເງື່ອນໄຂເອື້ອຍອຳນວຍຄວາມສະດວກໃຫ້ແກ່ບັນດາວິສາຫະກິດ ແລະ ນັກລົງທຶນຂອງກັນເຄື່ອນໄຫວ, ດຳເນີນທຸລະກິດຢ່າງມີປະສິດທິຜົນ, ຊຸກຍູ້ການຮ່ວມມືໃນຂົງເຂດນີ້ຢ່າງແຮງ, ສູ້ຊົນປະຕິບັດຄາດໝາຍນຳວົງເງິນການຄ້າ 2 ສົ້ນບັນລຸ 4 ຕື້ USD ໃນປີ 2013.