ທ່ານເລຂາທິການໃຫ່ຍພັກກອມມູນິດຫວຽດນາມ Nguyen Phu Trong ໃຫ້ການຕ້ອນຮັບທ່ານນາງນາຍົກລັດຖະມົນຕີແຫ່ງສາທາລະນະລັດ ບັງກະລາເທດ Sheikh Hasina (ພາບ: internet)
|
Vovworld- ໂດຍສືບຕໍ່ການຢ້ຽມຢາມສັນຖະວະໄມຕີຫວຽດນາມຢ່າງເປັນທາງການ, ຕອນເຊົ້າວັນທີ 3/11, ທ່ານນາງນາຍົກລັດຖະມົນຕີສາທາລະນະລັດ ບັງກະລາເທດ Sheikh Hasina ໄດ້ໄປວາງພວງມາລາຢູ່ອະນຸສາວະລີບັນດານັກວິລະຊົນທີ່ໄດ້ ເສຍສະຫຼະຊີວິດເພື່ອຊາດ, ວາງພວງມາລາຢູ່ສຸສານປະທານ ໂຮ່ຈິມິນ. ທ່ານນາງນາຍົກລັດຖະມົນຕີ ບັງກະລາເທດ Sheikh Hasina ຍັງເຂົ້າຮ່ວມເວທີປາໄສ ວິສາຫະກິດຫວຽດນາມ - ບັງກະລາເທດ. ຕອນບ່າຍຂອງວັນດຽວກັນ, ທ່ານນາງນາຍົກລັດຖະມົນຕີ ບັງກະລາເທດ Sheikh Hasina ໄດ້ເດີນອອກຈາກຮ່າໂນ້ຍ, ສິ້ນສຸດການຢ້ຽມຢາມຫວຽດນາມຢ່າງດີງາມ.
ກ່ອນໜ້ານັ້ນ, ໃນຕອນບ່າຍວັນທີ 2/11, ທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trong ແລະ ທ່ານປະທານປະເທດຫວຽດນາມ Truong Tan Sang ໄດ້ ພົບປະກັບທ່ານນາງນາຍົກ ລັດຖະມົນຕີບັງກະລາເທດ Sheikh Hasina. ນະທີ່ນີ້, ທ່ານນາງນາຍົກ ລັດຖະມົນຕີ ບັງກະລາເທດ Sheikh Hasina ໄດ້ຢືນຢັນຄວາມຕັດສິນໃຈຂອງລັດຖະບານບັງກະລາເທດໃນການຊຸກຍູ້ການພົວພັນຮ່ວມມືດ້ານເສດຖະກິດ, ການຄ້າ, ກະສິກຳ, ວັດທະນະທຳ, ການປ້ອງກັນຊາດກັບຫວຽດນາມ, ຫວັງເພີ່ມທະວີການພົວພັນລະຫວ່າງພັກສະຫະພັນປະຊາຊົນບັງກະລາເທດ ກັບພັກກອມມູນິດຫວຽດນາມ, ຍູ້ແຮງການພົວພັນແລກປ່ຽນລະຫວ່າງ ສະພາແຫ່ງຊາດ, ວິສາຫະກິດ ແລະ ປະຊາຊົນ 2 ປະເທດ, ເພີ່ມທະວີການສົມທົບກັນລະຫວ່າງ 2 ປະເທດໃນບັນດາເວທີປາໄສພາກພື້ນ ແລະ ສາກົນ. ສ່ວນທ່ານເລຂາທິການໃຫ່ຍຄະນະບໍລິຫານງານສູນກາງພັກກອມມູນິດຫວຽດນາມ Nguyen Phu Trongຢືນຢັນວ່າ : ພັກ ແລະ ລັດຖະບານຫວຽດນາມຍາມໃດກໍຖືເປັນສຳຄັນການພົວພັນກັບບັງກະລາເທດ, ພ້ອມທັງເປັນເອກະສັນກັນກ່ຽວກັບການເປີດກ້ວາງ, ເພີ່ມທະວີການພົວພັນຮ່ວມມື, ແລກປ່ຽນລະຫວ່າງ 2 ປະເທດໃນບັນດາຂົງເຂດໃນໄລຍະທີ່ຈະມາເຖິງ. ສ່ວນ ທ່ານປະທານປະເທດຫວຽດນາມ Truong Tan Sang ກໍຢືນຢັນວ່າ ຫວຽດນາມພ້ອມແລ້ວຈະແບ່ງປັນ ແລະ ແລກປ່ຽນບົດຮຽນໃນການສ້າງສາປະເທດຊາດກັບບັງກະລາເທດ.