ທ່ານ Lee Hyuk, ເອກອັກຄະລັດຖະທູດ ສ. ເກົາຫຼີ ແລະ ທ່ານນາຍົກລັດຖະມົນຕີ ຫງວຽນຊວນຟຸກ

ຕອນບ່າຍວັນທີ 11 ເມສາ, ທີ່ສຳນັກງານລັດຖະບານ, ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ຕ້ອນຮັບທ່ານ Lee Hyuk, ເອກອັກຄະລັດຖະທູດ ສ. ເກົາຫຼີ ເຂົ້າຢ້ຽມອຳລາ ເນື່ອງໃນໂອກາດສິ້ນສຸດອາຍຸການທາງການທູດຢູ່ ຫວຽດນາມ. ຕີລາຄາສູງໃນອາຍຸການປະຕິບັດງານຂອງທ່ານເອກອັກຄະລັດຖະທູດ Lee Hyuk ຢູ່ ຫວຽດນາມ ດ້ວຍຫຼາຍຜົນງານແຫ່ງການຮ່ວມມືລະຫວ່າງ 2 ປະເທດ ທັງດ້ານການເມືອງ, ການທູດ, ເສດຖະກິດ, ການຄ້າ ແລະ ການລົງທຶນ, ທ່ານນາຍົກລັດຖະມົນຕີ ຫງວຽນຊວນຟຸກ ຫວັງວ່າ ທ່ານ Lee Hyuk ຈະສືບຕໍ່ມີບັນດາການປະກອບສ່ວນເຂົ້າໃນການພົວພັນ ຫວຽດນາມ -  ສ. ເກົາຫຼີ ແລະ ການພົວພັນ ອາຊຽນ - ສ. ເກົາຫຼີ.

        ແລະ ເນັ້ນໜັກວ່າ, ຫວຽດນາມ ພ້ອມແລ້ວທີ່ຈະສ້າງເງື່ອນໄຂໃຫ້ບັນດາວິສາຫະກິດ ສ. ເກົາຫຼີ ລົງທຶນເຂົ້າ ຫວຽດນາມ ກ່ວາອີກ, ທ່ານນາຍົກລັດຖະມົນຕີ ສະເໜີເພີ່ມທະວີການພົບປະແລກປ່ຽນວັດທະນະທຳ ແລະ ການສິດສອນພາສາ ເກົາຫຼີ ຢູ່ ຫວຽດນາມ ແລະ ພາສາ ຫວຽດ ຢູ່ ສ. ເກົາຫຼີ; ສ້າງເງື່ອນໄຂສະດວກໃຫ້ແກ່ການຫັນລະບຽບການອອກວີຊາ ໃຫ້ພົນລະເມືອງ ຫວຽດນາມ ເປັນງ່າຍດາຍ ກໍ່ຄືປົກປັກຮັກສາສິດຜົນປະໂຫຍດອັນຊອບທຳຂອງພົນລະເມືອງ ຫວຽດນາມ ຢູ່ ສ. ເກົາຫຼີ. ທ່ານນາຍົກລັດຖະມົນຕີ ຫງວຽນຊວນຟຸກ ຢັ້ງຢືນວ່າ, ຫວຽດນາມ ຊົມເຊີຍ ແລະ ສະໜັບສະໜູນບັນດາມາດຕະການກ່ຽວຂ້ອງເຖິງສະພາບການໃນແຫຼມ ເກົາຫຼີ ເພື່ອແນໃສ່ຊຸກຍູ້ການເຈລະຈາ, ຮັກສາສັນຕິພາບ, ສະຖຽນລະພາບຢູ່ພາກພື້ນ ແລະ ຢູ່ໃນໂລກ.