(vovworld) – ຕອນເຊົ້າວັນທີ 04/06, ຢູ່ແຂວງກວາງນິງ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ມີການເຮັດວຽກກັບບໍລິສັດໃຫຍ່ອຸດສາຫະກຳຕໍ່ກຳປັ່ນ ກ່ຽວກັບໂຄງການຕໍ່ກຳປັ່ນໃໝ່ໃຫ້ກຳລັງກວດກາການປະມົງປະຕິບັດໜ້າທີ່ບົນທະເລ. ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ໄປກວດກາໂຄງການຕໍ່ກຳປັ່ນກວດກາການປະມົງໃໝ່ 2 ລຳ ມີໝາຍເລກ KN 2011 ໂດຍບໍລິສັດຕໍ່ກຳປັ່ນຫ້າລອງ ຈຳກັດຜູ້ດຽວ ຮັບຜິດຊອບການຕໍ່ກຳປັ່ນໃໝ່ ຕາມສັນຍາຕົກລົງຂອງກອງບັນຊາການເຫຼົ່າທັບເຮືອ. ນີແມ່ນກຳປັ່ນລາດຕາເວັນໄກ່ຝັ່ງໃນເວລາຫຼາຍມື້, ສົມທົບກັບການຊອກຫາ ແລະ ກູ້ໄພກູ້ຊີບບົນທະເລຂອງຫວຽດນາມ. ໂຄງການຕໍ່ກຳປັ່ນກວດກາການປະມົງໃໝ່ 2 ລຳ ໂດຍກຸ່ມບໍລິສັດ Damen ຂອງໂຮນລັງ ເປັນນັກອອກແບບ ດ້ວຍເຄື່ອງອຸປະກອນທີ່ສັນສະໄໝ. ປະຈຸບັນ, ກຳປັ່ນກວດກາການປະມົງ KN – 2011 ໝາກເລກ 01 ພວມໃຊ້ທົດລອງ ແລະ ພ້ອມແລ້ວທີ່ຈະມອບໃຫ້ກຳລັງກວດກາການປະມົງ; ຕາມແຜນການ ໃນທ້າຍເດືອນ 6 ນີ້, ກຳປັ່ນກວດກາການປະມົງ KN – 2011 ໝາກເລກ 02 ຈະໄດ້ໃຊ້ທົດລອງ ແລະ ຄາດວ່າຈະມອບໃຫ້ກຳລັງກວດກາການປະມົງໃນກາງເດືອນ 7 ຈະມາເຖິງ.
ທ່ານນາຍົກລັດຖະມົນຕີ ຫງວຽນເຕີນຢຸງ ຢືນຢັນວ່າ, ພັກ ແລະ ລັດ ໄດ້ມີມະຕິກ່ຽວກັບຍຸດທະສາດທະເລຫວຽດນາມ, ໃນນັ້ນຮຽກຮ້ອງພັດທະນາຂະແໜງຕໍ່ກຳປັ່ນຢ່າງໝັ້ນຄົງ ເພື່ອຕອບສະໜອງຄວາມຕ້ອງການໃນປະຈຸບັນ. ທ່ານນາຍົກລັດຖະມົນຕີ ຖືວ່າ ເພື່ອສືບຕໍ່ເສີມຂະຫຍາຍຂະແໜງຕໍ່ກຳປັ່ນ, ທັງຕອບສະໜອງຄວາມຕ້ອງການຂົນສົ່ງທາງທະເລ, ທັງຕອບສະໜອງໃຫ້້ການການປ້ອງກັນຊາດ, ປ້ອງກັນຄວາມສະຫງົບ, ບໍລິສັດໃຫຍ່ອຸດສາຫະກຳຕໍ່ກຳປັ່ນ ຄວນສືບຕໍ່ສ້າງໂຄງປະກອບຄືນໃໝ່, ຈັດວາງແຜນການຜະລິດໃຫ້ເໝາະສົມ, ສຸມໃສ່ຍູ້ແຮງຄວາມຄືບໜ້າໃນການຕໍ່ກຳປັ່ນໃໝ່. ທ່ານນາຍົກລັດຖະມົນຕີ ຫງວຽນເຕີນຢຸງ ກໍ່ໃຫ້ຄຳເຫັນກ່ຽວກັບຮ່າງໂຄງການຕໍ່ກຳປັ່ນຫຸ້ມເຫຼັກໃຫ້ແກ່ຊາວປະມົງ.