ກອງປະຊຸມສະຫລຸບໂຄງການຜັນຂະຫຍາຍທົດລອງມາດຕະການໜູນຊ່ວຍຍົກສູງເງື່ອນໄຂຄວາມປອດໄພເຮືອນຢູ່ໃຫ້ແກ່ຄອບຄົວທຸກຍາກ
(ພາບ: ສຳນັກຂ່າວສານ ຫວຽດນາມ)
(vovworld) - ທີ່ກອງປະຊຸມສະຫລຸບໂຄງການຜັນຂະຫຍາຍທົດລອງມາດຕະການໜູນຊ່ວຍຍົກສູງເງື່ອນໄຂຄວາມປອດໄພເຮືອນຢູ່ໃຫ້ແກ່ຄອບຄົວທຸກຍາກ, ຮັບມືກັບໄພນ້ຳຖ້ວມຢູ່ເຂດຕອນເໜືອພາກກາງ ແລະ ເຂດແຄມທະເລພາກກາງ ໂດຍກະຊວງກໍ່ສ້າງຈັດຕັ້ງຂຶ້ນໃນຕອນເຊົ້າວັນທີ 8/4, ຢູ່ແຂວງຟູ໋ອຽນ, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ຍ້ອງຍໍຊົມເຊີຍຄວາມມານະພະຍາຍາມຂອງກະຊວງກໍ່ສ້າງ ແລະ ກະຊວງ, ຂະແໜງການຕ່າງໆທີ່ກ່ຽວຂ້ອງ, ອຳນາດການປົກຄອງຂັ້ນຕ່າງໆຊຶ່ງໄດ້ປະຕິບັດສຳເລັດໂຄງການທົດລອງໜູນຊ່ວຍກໍ່ສ້າງເຮືອນຢູ່ໃຫ້ແກ່ຄອບຄົວທຸກຍາກເພື່ອປ້ອງກັນ, ຕ້ານໄພນ້ຳຖ້ວມໃນໄລຍະສັ້ນ. ທ່ານນາຍົກລັດຖະມົນຕີ ຫງວຽນເຕີນຢູງ ຊີ້ແຈງວ່າ:
“ການປະຕິບັດທົດລອງໄດ້ບັນລຸຜົນສຳເລັດ ດັ່ງນັ້ນປະຈຸບັນພວກເຮົາຕົກລົງທະວີຄຸນ, ຜັນຂະຫຍາຍປະຕິບັດໃນ 14 ແຂວງພາກກາງ ດ້ວຍຈຸດໝາຍປະຕິບັດສຳເລັດການໜູນຊ່ວຍກໍ່ສ້າງເຮືອນຢູ່ໃຫ້ແກ່ບັນດາຄອບຄົວທຸກຍາກເພື່ອຫຼິກລ້ຽງນ້ຳຖ້ວມໃນ 14 ແຂວງພາກກາງ, ດ້ວຍຈຳນວນປະມານ 60.000 ຄອບຄົວ. ສູ້ຊົນປະຕິບັດສຳເລັດຈຸດໝາຍນີ້ໃນປີ 2015.”
ປະຕິບັດຂໍ້ຕົກລົງເມື່ອວັນທີ 14/6/2012 ຂອງນາຍົກລັດຖະມົນຕີ, ບັນດາທ້ອງຖິ່ນໃນເຂດຜັນຂະຫຍາຍປະຕິບັດທົດລອງການກໍ່ສ້າງເຮືອນຢູ່ເພື່ອປ້ອງກັນ, ຕ້ານນ້ຳຖ້ວມ, ນ້ຳແກ່ງ ໃຫ້ແກ່ຄອບຄົວທຸກຍາກ 700 ຄອບຄົວຢູ່ 14 ຕາແສງຖືກຜົນສະທ້ອນຢ່າງໜັກໜ່ວງຍ້ອນນ້ຳຖ້ວຍ, ນ້ຳແກ່ງຢູ່ 7 ແຂວງຄື: ແທງຮ໋ວາ, ເງ້ອານ, ຮ່າຕິ້ງ, ກວາງບິນ, ກວາງນາມ, ຟູ໋ອຽນ. ມາຮອດປະຈຸບັນ, ມີ 697/700 ຄອບຄົວໄດ້ກໍ່ສ້າງເຮືອນຢູ່ເພື່ອ ປ້ອງກັນ, ຕ້ານນ້ຳຖ້ວມ, ນ້ຳແກ່ງ ສຳເລັດບັນລຸ 99,6%.
ແລະກໍ່ໃນແຜນການເຮັດວຽກຢູ່ບັນດາແຂວງແຄມທະເລຕອນໃຕ້ພາກກາງ, ຕອນບ່າຍວັນທີ 8/4, ທ່ານນາຍົກລັດຖະມົນຕີ ຫງວຽນເຕີນຢູງ ໄດ້ມີການເຮັດວຽກກັບການນຳແຂວງແຄ໋ງຮ່ວາ ກ່ຽວກັບໜ້າທີ່ພັດທະນາເສດຖະກິດ, ສັງຄົມກໍ່ຄືການກຳນົດທິດໃຫຍ່ສ້າງກຳລັງໜູນເພື່ອໃຫ້ແຂວງແຄ໋ງຮ່ວາພັດທະນາໄວ ແລະ ໝັ້ນຄົງ. ທ່ານນາຍົກລັດຖະມົນຕີ ຮຽກຮ້ອງໃຫ້ການນຳແຂວງ ແຄ໋ງຮ່ວາ ສືບຕໍ່ຂະຫຍັນຂັນເຂື່ອນ, ມີຫົວຄິດປະດິດສ້າງ, ຄົ້ນຄ້ວາກົນໄກ, ນະໂຍບາຍທີ່ສະດວກ ເພື່ອດຶງດູດບັນດານັກລົງທຶນເຂົ້າມາລົງທຶນໃນການພັດທະນາການທ່ອງທ່ຽວ, ບໍລິການທາງທະເລ, ພິເສດແມ່ນການສ້ອມແປງກຳປັ່ນທະເລ, ການລົງທຶນພັດທະນາອຸດສາຫະກຳເຕັກໂນໂລຢີສູງ...