(vovworld) - ຕອນບ່າຍວັນທີ 16 ກັນຍາ, ຢູ່ຮ່າໂນ້ຍ, ທີ່ການຕ້ອນຮັບທ່ານລັດຖະມົນຕີກະຊວງປ້ອງກັນປະເທດຍີ່ປຸ່ນ Itsunori Onodera ທີ່ພວມຢ້ຽມຢາມ ແລະ ເຮັດວຽກຢູ່ຫວຽດນາມ, ທ່ານນາຍົກລັດຖະມົນຕີ ຫງວຽນເຕີນຢຸງ ເນັ້ນໜັກເຖິງບັນດາຜົນງານທີ່ບັນລຸໄດ້ໃນການພົວພັນຄູ່ຮ່ວມມືຍຸດທະສາດລະຫວ່າງຍີ່ປຸ່ນ - ຫວຽດນາມ ໃນໄລຍະຜ່ານມາ ໄດ້ນຳມາເຊິ່ງຜົນປະໂຫຍດແທດຈິງໃຫ້ແກ່ການພັດທະນາລວມຂອງທັງ 2 ປະເທດ. ທ່ານນາຍົກລັດຖະມົນຕີ ຢືນຢັນວ່າ ນະໂຍບບາຍສະເໝີຕົ້ນສະເໝີປາຍຂອງຫວຽດນາມ ແມ່ນ ຖືການພົວພັນຄູ່ຮ່ວມມືຍຸດທະສາດກັບຍີ່ປຸ່ນ ເປັນສຳຄັນ, ເພື່ອສັນຕິພາບ, ຄວາມຈະເລີນຮຸ່ງເຮືອງຢູ່ພາກພື້ນອາຊີ; ປາດຖະໜາວ່າ 2 ຝ່າຍສືບຕໍ່ຮ່ວມມືຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະ ກັນບົນເວທີປາໄສສາກົນ ແລະ ພາກພື້ນ, ໂດຍສະເພາະແມ່ນຢູ່ສະຫະປະຊາຊາດ. ທ່ານນາຍົກລັດຖະມົນຕີ ຫງວຽນເຕີນຢຸງ ປາດຖະໜາວ່າ ກະຊວງປ້ອງກັນປະເທດ 2 ປະເທດ ຈະຍູ້ແຮງບັນດາການເຄື່ອນໄຫວຮ່ວມມືກວ່າອີກ, ຈັດການໂອ້ລົມສົນທະນາ, ແລກປ່ຽນຄະນະຜູ້ແທນ, ຢ້ຽມຢາມເຊິ່ງກັນ ແລະ ກັນເປັນປະຈຳ ເພື່ອແນໃສ່ເພີ່ມທະວີນ້ຳໃຈສາມັກຄີ, ຄວາມເຂົ້າອົກເຂົ້າໃຈເຊິ່ງກັນ ແລະ ກັນລະຫວ່າງກອງທັບ 2 ປະເທດ.