(vovworld)- ຕອນຄ່ຳວັນທີ 16/10 ຕາມເວລາຫວຽດນາມ, ກອງປະຊຸມຂັ້ນສູງອາຊີ-ເອີລົບຄັ້ງທີ 10 (ອາແຊມ 10) ໄດ້ຖືກໄຂຂຶ້ນຢູ່ມີລານປະເທດອີຕາລີຢ່າງເປັນທາງການ. ຄະນະຜູ້ແທນຂັ້ນສູງຫວຽດນາມໂດຍທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ນຳໜ້າໄດ້ເຂົ້າຮ່ວມກອງປະຊຸມ. ຢູ່ນອກກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ໄດ້ມີການພົບປະ 2 ຝ່າຍກັບປະມຸກລັດ ແລະ ຜູ້ນຳລັດຖະບານປະເທດຕາ່ງໆໃນໂລກ.
ທີ່ການພົບປະລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ກັບທ່ານນາຍົກລັດຖະມົນຕີຍີ່ປຸ່ນ Shinzo Abe. ທ່ານນາຍົກລັດຖະມົນຕີຍີ່ປຸ່ນ Shinzo Abe ຢັ້ງຢືນວ່າ: ຍີ່ປຸ່ນຈະສືບຕໍ່ໜູນຊ່ວຍຫວຽດນາມໃນການພັດທະນາເສດຖະກິດ-ສັງຄົມຜ່ານການສະໜອງທຶນ ODA ຢູ່ໃນລະດັບສູງ, ກໍ່ຄືສືບຕໍ່ໜູນຊ່ວຍຫວຽດນາມ ຍົກສູງກຳລັງຄວາມສາມາດຂອງກຳລັງປະຕິບັດກົດໝາຍບົນທະເລ. 2 ຝ່າຍເຫັນດີເປັນເອກະສັນກັນສືບຕໍ່ສົມທົບ ເພື່ອຜັນຂະຫຍາຍບັນດາໂຄງການຮ່ວມມືເສດຖະກິດສຳຄັນຢ່າງແໜ້ນແຟ້ນ ແລະ ມີປະສິດທິຜົນ, ໃນນັ້ນມີຍຸດທະສາດຫັນເປັນອຸດສາຫະກຳຂອງຫວຽດນາມ ໃນຂອບເຂດການຮ່ວມມື ລະຫວ່າງຫວຽດນາມ ແລະ ຍີ່ປຸ່ນ. ຍູ້ແຮງການຮ່ວມມືໃນຂົງເຂດກະສິກຳ, ພັດທະນາອຸດສາຫະກຳສຳຮອງຂອງຫວຽດນາມ. ທ່ານນາຍົກລັດຖະມົນຕີຫງວຽນເຕິ້ນຢຸ້ງ ຢືນຢັນວ່າ: ຫວຽດນາມຈະສືບຕໍ່ມານະພະຍາຍາມສ້າງສະພາບແວດລ້ອມສະດວກໃຫ້ແກ່ວິສາຫະກິດຍີ່ປຸ່ນ ທີ່ເຂົ້າມາລົງທຶນຢູ່ ຫວຽດນາມ, ໃນນັ້ນຈະຜັນຂະຫຍາຍຫົວຄິດປະດິດສ້າງລວມຫວຽດນາມ-ຍີ່ປຸ່ນ ກ່ຽວກັບການປັບປຸງສະພາບແວດລ້ອມການລົງທຶນຂອງຫວຽດນາມຢ່າງມີປະສິດທິຜົນ. 2 ຝ່າຍກໍ່ແລກປ່ຽນກ່ຽວກັບບັນດາບັນຫາໃນພາກພື້ນ ແລະ ສາກົນ ເຊິ່ງຕ່າງຝ່າຍຕ່າງມີຄວາມສົນໃຈ, ເຫັນດີເພີ່ມທະວີການຮ່ວມມືໃນບັນດາເວທີປາໄສຫຼາຍຝ່າຍ.
ທີ່ການພົບປະກັບທ່ານນາຍົກລັດຖະມົນຕີຈີນ ຫຼີເຄືອຊຽງ, ທ່ານນາຍົກລັດຖະມົນຕີຫງວຽນເຕິ້ນຢຸ້ງ ຢັ້ງຢືນວ່າ: ພັກ, ລັດຖະບານ ແລະ ປະຊາຊົນຫວຽດນາມຖະນຸຖະໜອມ, ຮັກສາ ແລະ ຫວັງຢາກປັບປຸງການພົວພັນຖານບ້ານໃກ້ເຮືອນຄຽງມິດຕະພາບທີ່ເປັນມູນເຊື້ອ ແລະ ເພີ່ມທະວີການຮ່ວມມືຮອບດ້ານລະຫວ່າງ 2 ປະເທດ ໃຫ້ພັດທະນາຢ່າງສົດໃສແລະ ໝັ້ນຄົງ. ທ່ານນາຍົກລັດຖະມົນຕີຫງວຽນເຕິ້ນຢຸ້ງ ສະເໜີໃຫ້ 2 ຝ່າຍຄວນສືບຕໍ່ການພົບປະເຈລະຈາຂັ້ນສູງ ເພື່ອເພີ່ມທະວີຄວາມໄວ້ເນື້ອເຊື່ອໃຈ, ຊຸກຍູ້ການຮ່ວມມື ເຊິ່ງຕ່າງຝ່າຍຕ່າງມີຜົນປະໂຫຍດໃນທຸກຂົງເຂດ.
ກ່ຽວກັບບັນຫາທະເລຕາເວັນອອກ, ທ່ານນາຍົກລັດຖະມົນຕີຫງວຽນເຕິ້ນຢຸ້ງ ເນັ້ນໜັກວ່າ: ສະເໜີໃຫ້ 2 ຝ່າຍຄວບຄຸມສະພາບການບົນທະເລເປັນຢ່າງດີ, ບໍ່ຄວນມີການກະທຳເຮັດໃຫ້ສະພາບການບົນທະເລສັບສົ້ນຂຶ້ນຕື່ມ, ຊຸກຍູ້ບັນດາກົນໄກເຈລະຈາໃຫ້ບັນລຸຄວາມຄືບໜ້າ, ແລະ ປະຕິບັດບັນດາຂໍ້ຕົກລົງ, ຫຼັກການພື້ນຖານ, ຊິ້ນຳນຳພາການແກ້ໄຂບັນຫາບົນທະເລ ລະຫວ່າງຫວຽດນາມ-ຈີນ; ເຄົາລົບກົດໝາຍສາກົນ, ພ້ອມກັນຮັກສາສັນຕິພາບ, ສະຖຽນລະພາບໃນພາກພື້ນ ແລະ ໂລກ. ສ່ວນທ່ານນາຍົກລັດຖະມົນຕີຈີນຫຼີເຄືອຊຽງ ຢືນຢັນວ່າ: ລັດຖະບານຈີນ ຍາມໃດກໍ່ຍຶດໝັ້ນທິດນຳ:ບ້ານໃກ້ເຮືອນຄຽງມິດຕະພາບ, ການຮ່ວມມື ເຊິ່ງຕ່າງຝ່າຍຕ່າງມີຜົນປະໂຫຍດ ກັບຫວຽດນາມ, ຍາມໃດກໍ່ປາດຖະໜາວ່າການແກ້ໄຂບັນດາບັນຫາຫຍຸ້ງຍາກເກີດຂຶ້ນໃນການພົວພັນລະຫວ່າງ 2 ປະເທດ, ພ້ອມກັນຊຸກຍູ້ການພົວພັນ ລະຫວ່າງ 2 ພັກ, 2 ລັດ ພັດທະນາຢ່າງສົດໃສ ແລະ ໝັ້ນຄົງ.
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແລະ
ປະທານາທິບໍດີ ຝະລັ່ງ Francois Hollande
|
ທີ່ການພົບປະກັບປະທານາທິບໍດີ ຝະລັ່ງ Francois Hollande , 2 ຝ່າຍໄດ້ຕີລາຄາສູງບັນດາໝາກຜົນແຫ່ງການຮ່ວມມື 2 ຝ່າຍທີ່ບັນລຸໄດ້ໃນໄລຍະທີ່ຜ່ານມາ ແນໃສ່ຜັນຂະຫຍາຍຄູ່ຮ່ວມມືຍຸດທະສາດຫວຽດນາມ-ຝະລັ່ງ. ການນຳທັງ 2 ໄດ້ໝັ້ນໝາຍຈະສົມທົບກັນຢ່າງແໜ້ນແຟ້ນໃນການຈັດກອງປະຊຸມກ່ຽວກັບການປ່ຽນແປງຂອງດິນຟ້າອາກາດຄັ້ງທີ 21 ຂອງ ສ.ປ.ຊ ຊຶ່ງຈະຖືກຈັດຂຶ້ນຢູ່ປາຣີໃນປີ 2015. ປະທານາທິບໍດີຝະລັ່ງໄດ້ສະແດງຄວາມເຫັນດີເປັນເອກະສັນກ່ຽວກັບຄວາມສຳຄັນຂອງການຮັບປະກັນສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນອາຊີປາຊີຝິກ, ໃນນັ້ນມີການຮັບປະກັນສັນຕິພາບ, ຄວາມໝັ້ນຄົງປອດໄພ ແລະ ສິດເສລີໃນການເດີນເຮືອ, ແກ້ໄຂການພິພາດຜ່ານການເຈລະຈາ ແລະ ມາດຕະການໂດຍສັນຕິວິທີບົນພື້ນຖານເຄົາລົບກົດໝາຍສາກົນ ແລະ ສັນທິສັນຍາກ່ຽວກັບກົດໝາຍທະເລປີ 1982.
ທີ່ການພົບປະລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ກັບທ່ານນາຍົກລັດຖະມົນຕີອີຕາລີ Matteo Renzi , ການນຳທັງ 2 ໄດ້ເຫັນດີນຳການຮ່ວມມືເສດຖະກິດກາຍເປັນເສົາຄ້ຳຫຼັກໃນການພົວພັນຄູ່ຮ່ວມມືຍຸດທະສາດ, ສູ້ຊົນນຳວົງເງິນການຄ້າ 2 ສົ້ນຂຶ້ນເຖິງ 5 ຕື້ USD ໃນປີ 2015. ກ່ຽວກັບບັນຫາທະເລຕາເວັນອອກ, ທ່ານນາຍົກລັດຖະມົນຕີອີຕາລີ Matteo Renzi ຢືນຢັນສະໜັບສະໜູນການຮັບປະກັນສັນຕິພາບ, ຄວາມໝັ້ນຄົງປອດໄພ ແລະ ສິດເສລີໃນການເດີນທະເລ, ແກ້ໄຂການພິພາດຜ່ານການເຈລະຈາ ແລະ ມາດຕະການໂດຍສັນຕິວິທີບົນພື້ນຖານເຄົາລົບກົດໝາຍສາກົນ ແລະ ສົນທິສັນຍາກ່ຽວກັບກົດໝາຍທະເລ….ອີຕາລີຢືນຢັນສືບຕໍ່ສະໜັບສະໜູນການເພີ່ມທະວີການພົວພັນລະຫວ່າງຫວຽດນາມ - EU , ໃນນັ້ນມີການຊຸກຍູ້ EU ໃຫ້ສັດຕະຍາບັນສັນຍາຄູ່ຮ່ວມມື ແລະ ການຮ່ວມມື PCA ….
ທີ່ການພົບປະລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ກັບທ່ານນາຍົກລັດຖະມົນຕີ ຊູແອດ Stefan Lofven ທ່ານນາຍົກລັດຖະມົນຕີທັງ 2 ໄດ້ເຫັນດີວ່າ 2 ຝ່າຍຄວນເພີ່ມທະວີການແລກປ່ຽນ ແລະ ພົບປະໃນຂັ້ນຕ່າງໆ, ສົມທົບກັນສ້າງເງື່ອນໄຂເພື່ອໃຫ້ບັນດານັກລົງທຶນ 2 ປະເທດໄດ້ພົວພັນແລກປ່ຽນ, ພິເສດໃນຂົງເຂດ ເຕັກໂນໂລຢີຂຽວ, ສະອາດ, ຄົມມະນາຄົມ, ສາທາລະນະສຸກ….
ທີ່ການພົບປະລະຫວ່າງທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ກັບທ່ານນາຍົກລັດຖະມົນຕີ ອຽກລັງ Enda Kenny , ທ່ານນາຍົກລັດຖະມົນຕີທັງ 2 ໄດ້ເຫັນດີຍູ້ແຮງການຮ່ວມມືໃນຂົງເຂດການສຶກສາບຳລຸງສ້າງ, ການປ່ຽນແປງຂອງດິນຟ້າອາກາດ, ກະສີກຳ….
ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ກໍໄດ້ພົບປະກັບ ທ່ານນາຍົກລັດຖະມົນຕີແຟງລັງ Alexander stubb, ທ່ານນາຍົກລັດຖະມົນຕີທັງ 2 ໄດ້ເຫັນດີສົມທົບກັນຢ່າງແໜ້ນແຟ້ນຊຸກຍູ້ການພົວພັນ 2 ຝ່າຍໃຫ້ພັດທະນາຢ່າງແຂງແຮງໃນໄລຍະທີ່ຈະມາເຖິງ. ທ່ານນາຍົກລັດຖະມົນຕີທັງ 2 ຍັງໄດ້ແລກປ່ຽນຢ່າງເລິກເຊິ່ງກວ້າງຂວາງກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈ, ເຫັນດີສືບຕໍ່ຮ່ວມມື, ສະໜັບສະໜູນກັນໃນບັນດາເວທີປາໄສຫຼາຍຝ່າຍ ແລະ ສາກົນ.
ຕອນເຊົ້າວັນທີ 17/10, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ມີການພົບປະກັບປະທານາທິບໍດີ ສະວິດ Didier Burkhalter, ທ່ານນາຍົກລັດຖະມົນຕີ ລູກສຳບວກ Xavier Betten ແລະ ທ່ານນາຍົກລັດຖະມົນຕີ ໂປໂລຍ Ewa Kopacz.
ທີ່ການພົບປະກັບທ່ານປະທານາທິບໍດີ ສະວິດ, ທ່ານນາຍົກລັດຖະມົນຕີ ຫງວຽນເຕີນຢູ້ງ ເນັ້ນໜັກວ່າ: ລັດຖະບານ ຫວຽດນາມ ຍາມໃດກໍ່ສ້າງເງື່ອນໄຂສະດວກໃຫ້ແກ່ວິສາຫະກິດຕ່າງປະເທດລົງທຶນ, ດຳເນີນທຸລະກິດຢູ່ ຫວຽດນາມ ແລະ ປາດຖະໜາວ່າ: ບັນດາວິສາຫະກິດ ສະວິດ ເປີດກ້ວາງການດຳເນີນທຸລະກິດ, ລົງທຶນກັບ ຫວຽດນາມ, ພິເສດແມ່ນໃນບັນດາຂົງເຂດເຊິ່ງ ສະວິດ ມີທ່າແຮງ ແລະ ຫວຽດນາມ ມີຄວາມຕ້ອງການ. ທ່ານປະທານາທິບໍດີ ສະວິດ Didier Burkhalter ສະແດງຄວາມປາດຖະໜາຢາກມາຢ້ຽມຢາມ ຫວຽດນາມ ໃນໂອກາດ ສະວິດ ເປີດສະຖານກົງສູນໃຫຍ່ຢູ່ນະຄອນ ໂຮ່ຈີມິນ.
ທີ່ການພົບປະລະຫວ່າງ ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາຍົກລັດຖະມົນຕີ ລູກສຳບວກ Xavier Betten, 2 ຝ່າຍເຫັນດີເປັນເອກະສັນເພີ່ມທະວີການແລກປ່ຽນການຄ້າ ແລະ ຊຸກຍູ້ການຮ່ວມມືໃນບັນດາຂົງເຂດບໍລິການ, ຂົນສົ່ງ, ທ່ອງທ່ຽວ… ທ່ານນາຍົກລັດຖະມົນຕີ ລູກສຳບວກ ເນັ້ນໜັກວ່າ ຈະສົມທົບກັນຊຸກຍູ້ ອີຢູ ໃຫ້ສັດຕະຍາບັນສັນຍາຄູ່ຮ່ວມມື ແລະ ຮ່ວມມື (PCA) ແລະ ປະຕິບັດສຳເລັດການເຈລະຈາສັນຍາການຄ້າເສລີ (FTA) ລະຫວ່າງ ຫວຽດນາມ ແລະ ອີຢູ ໂດຍໄວ.
ໃນການພົບປະລະຫວ່າງ ທ່ານນາຍົກລັດຖະມົນຕີ ຫງວຽນເຕີນຢູ້ງ ແລະ ທ່ານນາຍົກລັດຖະມົນຕີ ໂປໂລຍ Ewa Kopacz, ນາຍົກລັດຖະມົນຕີ 2 ທ່ານເຫັນດີເປັນເອກະສັນແລກປ່ຽນບັນດາການຢ້ຽມຢາມຂັ້ນສູງ, ຊຸກຍູ້ການຮ່ວມມືຮອບດ້ານ, ພິເສດແມ່ນກ່ຽວກັບເສດຖະກິດ, ການເງິນ, ກະສິກຳ. ທ່ານນາຍົກລັດຖະມົນຕີ ຫງວຽນເຕີນຢູ້ງ ສະເໜີໃຫ້ ໂປໂລຍ ໃຫ້ສັດຕະຍາບັນສັນຍາຮ່ວມມື ແລະ ຄູ່ຮ່ວມມືຮອບດ້ານ ຫວຽດນາມ - ອີຢູ (PCA), ປະຕິບັດສຳເລັດການເຈລະຈາສັນຍາການຄ້າເສລີ (FTA) ລະຫວ່າງ ຫວຽດນາມ ແລະ ອີຢູ ໂດຍໄວ.