ທ່ານນາຍົກລັດຖະມົນຕີ ຫງວຽນເຕິ໋ນຢຸງພົບປະເຈລະຈາກັບ
ທ່ານປະທານສະພາສູງຟີລິບປິນ Franklin Drilon
(ພາບ,: Đức Tám – TTXVN)
(vovworld) - ວັນທີ 22/5, ໃນຂອບເຂດການຢ້ຽມຢາມ ແລະ ເຮັດວຽກຢູ່ຟີລິບປິນ ແລະ ເຂົ້າຮ່ວມເວທີປາໄສເສດຖະກິດໂລກ ເຂດອາຊີຕາເວັນອອກ ຢູ່ນະຄອນຫຼວງມານີລາ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ມີການພົບປະເຈລະຈາກັບປະທານສະພາຕຳ່ຟີລິບປິນ Feliciano J. Belmonte . ທ່ານປະທານສະພາຕຳ່ຟີລິບປິນ ສະແດງຄວາມວິຕົກກັງວົນຢ່າງເລິກເຊິ່ງຕໍ່ການກະທຳຂອງຈີນ ທີ່ຕັ້ງຮ້ານເຈາະນຳ້ມັນ ໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ, ໄຫຼ່ທະວີບຂອງຫວຽດນາມ.
ທີ່ການພົບປະເຈລະຈາກັບທ່ານປະທານສະພາສູງຟີລິບປິນ Franklin Drilon. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຖືວ່າ ຫວຽດນາມ ແລະ ຟີລິບປິນ ຄວນເພີ່ມທະວີການຮ່ວມມື, ສາມັກຄີພ້ອມກັບອາຊຽນ ແລະ ສາກົນຕຳໜິຕິຕຽນການກະທຳຂອງຈີນຢູ່ ທະເລຕາເວັນອອກ ແລະ ສະໜັບສະໜູນຫຼັກໝັ້ນແກ້ໄຂຄວາມເຄັ່ງຕຶງດ້ວຍສັນຕິວິທີ, ຕາມກົດໝາຍສາກົນ, ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລປີ 1982 ແລະ DOC.
ກ່ຽວກັບການພົວພັນສອງຝ່າຍ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຢືນຢັນວ່າ, ດ້ວຍການພົວພັນຖານບ້ານໃກ້ເຮືອນຄຽງມິດຕະພາບ. ຫວຽດນາມ ປາຖະໜາຢາກພ້ອມກັບຟີລິບປິນ ນຳການພົວພັນລະຫວ່າງສອງປະເທດໃຫ້ຂຶ້ນສູ່ລະດັບສູງໃໝ່, ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ຄວາມສະຫງົບປອດໄພ, ສະຖຽນລະພາບ ແລະ ການພັດທະນາໃນພາກພື້ນ.
ແລະ ກໍ່ໃນວັນທີ 22/5. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ເຂົ້າຮ່ວມ ແລະ ກ່າວຄຳເຫັນທີ່ວາລະປຶກສາຫາລື “ຊຸກຍູ້ປະຊາຄົມເສດຖະກິດອາຊຽນຜ່ານການເພີ່ມທະວີສົມທົບກັນລະຫວ່າງພາກລັດ - ເອກະຊົນ“. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຖືວ່າ ເພື່ອໃຫ້ການຮ່ວມມືນີ້ປະກອບສ່ວນຢ່າງມີປະສິດທິຜົນ ເຂົ້າໃນວິວັດການກໍ່ສ້າງປະຊາຄົມເສດຖະກິດອາຊຽນ, ຄວນມີການສະໜັບສະໜູນຢ່າງແຮງຂອງລັດຖະບານຕ່າງໆ, ສ້າງນະໂຍບາຍລວມຂອງອາຊຽນ ກ່ຽວກັບການຮ່ວມມື ລະຫວ່າງພາກລັດ - ເອກະຊົນ ແລະ ບັນຊີລາຍຊື່ໂຄງການເຊື່ອມຕໍ່ອາຊຽນ ຕາມຮູບການຄູ່ຮ່ວມມືລະຫວ່າງພາກລັດ - ເອກະຊົນ ດ້ວຍບັນດາເງື່ອນໄຂລະອຽດ, ດຶງດູດບັນດານັກລົງທຶນພາກເອກະຊົນ, ພ້ອມທັງມີກົນໄກໜູນຊ່ວຍ, ຕິດຕາມກວດກາ ເພື່ອປະຕິບັດໂຄງການໃຫ້ສຳເລັດຜົນ. ທ່ານນາຍົກລັດຖະມົນຕີ ຫງວຽນເຕິ໋ນຢຸງ ຢືນຢັນວ່າ ດ້ວຍບັນດາຄວາມມານະພະຍາຍາມຢ່າງລຽນຕິດ ແລະ ເປັນປະຈຳຂອງລັດຖະບານ, ສະພາບແວດລ້ອມແຫ່ງການດຳເນີນທຸລະກິດຂອງຫວຽດນາມ ຈະນັບມື້ນັບດີກວ່າ, ສ້າງເງື່ອນໄຂສະດວກໃຫ້ບັນດານັກລົງທຶນຕ່າງປະເທດທຳມາຫາກິນຢ່າງມີປະສິດທິຜົນຢູ່ຫວຽດນາມ.
ຕອນຄຳ່ວັນທີ 22/5, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ພ້ອມກັບຄະນະຜູ້ແທນຫວຽດນາມ ໄດ້ເດີນທາງອອກຈາກມານີລາ ກັບເມືອຮ່າໂນ້ຍ, ສິ້ນສຸດການເຂົ້າຮ່ວມເວທີປາໄສເສດຖະກິດໂລກ ກ່ຽວກັບອາຊີຕາເວັນອອກ ແລະ ການຢ້ຽມຢາມ, ເຮັດວຽກຢູ່ຟີລິບປິນ.